Read Uab Meto ULANGAN 14 Bible Online

ULANGAN 14 - Uab Meto bible

ULANGAN 14

¹“UISNENO In to es ki. Es nane te leka hi amkae ma amkul neu atoni amates, kais mipapa' hi aom ai am eu hi nakam antom hi ilam onle uf-uf bian anmo'e.

²UISNENO In ini es ki; na'ko ale uf anbi pah pinan, hi es Uisneno anbeti nani ki he hi amfani In to.”

³“Kaisa hi miah sisi na'ko mu'it le UISNENO antek nak amle'ut.

⁴Hi nabe'i miah sisi mu'it-mu'it le i: bijae, bibi kase, bibi,

⁵lus, bibi kase fui, bibi fui, lus ana'

⁶ma ale mu'it le in aku'en masbake ma la nakniti.

⁷Hi ka nabe'i fa he miah sisi mu'it le Sin aku'en ka masbake fa ma le ka nakniti fa. Kais miah sisi bikase paha snaen, ifo pah panis ai ukum pah panis. Ale mu'it nane amle'ut maski sin nakniti, sin aku'en ka masbake fa.

⁸Kais hi miah sisi fafi. Mu'it nane amle'ut, natuin maski in aku'en masbake, mes in ka nakniti fa. Ka nabe'i fa hi miah in sisi, ka nabe'i fa he him le'o ai ampoe in aon amates.

⁹Hi nabe'i he miah ale ika le po'an mahinis ma po'an mafaun.

¹⁰Mu'it le anmoni anbi oe in nanan mes kan mu'i fa in apo'an he manihis ai he mafaun nane amle'ut ka nabe'i fa hi miah.

¹¹Nabe'i he miah ale sisi kolo le ka amle'ut fa.

¹²Mes anmu'i kolo fauk-fauk le ka nabe'i fa hi miah in sisi, esle': kol teme naek, kutlu, ale kol teme, isu, kol ka', kol paha snaen, ma ale kolo le onle kolo ka' ma ale kolo oe, kolo asnaen, sasi ma ba'u.

¹⁹Ale kauna kiba ma sabuit le manine nane le'uf ma amle'ut, ka nabe'i fa hi miah in sisi.

²⁰Mu'it manine le ka le'uf fa ma ka amle'ut fa nabe'i hi miah.

²¹Mu'it le anmate anmes ka nabe'i fa hi miah, mes atoni anao amnemat le natua nabua nok ki nabe'i sin nah, ai nabe'i hi misosa neu atoni ai nonot bian. Hi le nane nonot le anbeti nateta ki neu hi UISNENO. Sisi bibi kase ana' ai bibi ana' ka nabe'i fa mihan nok in ainaf in susu.”

²²“Anbi ton mese-mese in nanan hi mes mipoitan hi bati bo' na'ko hi lene sin afan.

²³Anbi hi UISNENO In human In matan, anbi bale le In anbeti, hi mes miah fua tulu bati bo' na'ko hi ane kase, tua mina mtasa, mina bub fua mina ma bijae ana' ma bibi ma bibi kase an-unu le nahonis nahunun. Him tao ma anmo'e lasi nane he nati' minoina hi monim piut hem tola hi UISNENO.

²⁴Leka bale le hi UISNENO anbeti na'lo lo le'uf na'ko hi ume, talantia bati bo' na'ko hi lene afan le him fe neu hi UISNENO hi ka meki mani fa neu bale nane,

²⁵onane te hi misosa pa' na'ko hi lene in afan nane, ma hi meki in noni tulu nane neu bale hi UISNENO anbeti neu ki.

²⁶Noni nane hi amsos sa' amsa le him lomi — bijae ai bibi, bibi kase, tua mina mtasa ai tua mina mtasa bian — oke te anbi bale nane, anbi hi UISNENO In human In matan, hi ma hi ume nanan sin hi miah bua'-bua' ma mimlil ma mimoke nai.

²⁷Kais hi mifetin ma ampolin atoni Lewi sin le natua anbi hi kot-kot sin; hi mimnau nai natuin sin le nane kan mu'i fa nain.

²⁸Anbi ton tenu namsopu te, hi mes meki hi bati bo' na'ko hi lene sin afan ma him nibun mibuab anbi hi kot-kot sin.

²⁹Mnahat nane neu atoni Lewi natuin sin kan mu'in fa nain, ma neu atoni anao amnemat, li'anmanat, ma ale bife banu le anmoni anbi hi kot-kot sin. Sin nabe'i nem ma naiti ale sa' le sin anlomi. Leka sin antao ma anmo'e onane, onane te hi UISNENO of anfe tetus neu ale hi mepu sin.”