Read Uab Meto ULANGAN 15 Bible Online

ULANGAN 15 - Uab Meto bible

ULANGAN 15

¹“Leka ton hitu namsopu hi mes anmo'e sako tusa.

²Hi minaob mani onle i. Ale atoni Israel le anfe anlapat noni neu atoni mese na'ko in nonot, mes ansako nani tusa nane, natuin lasi tfeka UISNENO tusa nane In ansako nalali, es nane te ka nabe'i fa he hi amtoti amteni.

³Hi nabe'i amtoti noni le hi amfe amlapat neu atoni anao amnemat, mes ka nabe'i fa he hi amtoti amteni noni le hi amfe amlapat neu atoni na'ko hi nonot.

⁴Hi UISNENO of anfe tetus neu ki anbi pah le In anfe neu ki. Anbi hi nonot of kan mu'i fa atoni amamu'it,

⁵so leko him nen hi UISNENO, ma amtao mituin nok lek-leko ale sa' le au uplenat ulali neu ki anbi neno le i.

⁶Hi UISNENO of anfe neu ki tetus onle In anba'an nani neu ki. Hi of amfe amlapat noni neu uf namfau, mes hi alki of ka mitus fa, hi of miplenat uf namfau, mes sin of ka naplenat ki fa.

⁷Leka hi mitua milali pah le of hi UISNENO anfe neu ki, oke te anbi kot mese anmu'i atoni mese na'ko hi nonot le anlabu, kaisa al hi mimnau neu hi aom anmes ma amtite neu hem bab in.

⁸Mes, so hi amnek mimnau in ma amfe amlapat neu atoni nane fauk-fauk le in anlomi.

⁹Kais amtite he amfe amlapat neu in nok uab natuin ton sako tusa anpaumaken. Leka mifetin tenab amle'ut nane antam neu hi nekam. Kais hi kam lomi fa neu hem fe amlapat, atoni nane of ansakoi neu UISNENO he natlak ki, onane te of nasanab ki.

¹⁰Amfe nai neu in nok nek amlilat ma nek alekot, onane te hi UISNENO of anfe tetus neu ale hi mepu sin.

¹¹Anbi atoni Israel of anmu'i piut atoni fauk-fauk le anmamu'if ma anlabu. Es nane te au uplenat neu ki he nati' hi amnek mahoe neu sin.”

¹²“Leka atoni mese ai bife mese na'ko hi nonot nasosa in aon ma anfani hi ate, in mes anmepu neu ki ton ne in a'lon.

¹³Ate le hi mifetin nane ka nabe'i fa he hi amlenu in he nao nok nim luman.

¹⁴Amfe neune nok nek mahoe na'ko sa' le hi UISNENO anfe neu ki esle' bibi ma bibi kase, ane kase ma tua mina mtasa.

¹⁵Hi mimnau natuin afi ahunut hi ate ki amsa anbi Mesir oke te hi UISNENO nafetin ki; es nane te au fe plenat i neu ki.

¹⁶Mes leka ate nane kan lomi fa he nao natuin in nek namnau ki nok hi ume nanan ma anlomi he natua nabala nok ki,

¹⁷meki in neu hi ume eno ma amheti in luken, of in anfani hi ate talantia in amonin namsopu. Onane amsa mes hi amtao ma anmo'e neu hi ate bife sin.

¹⁸Leka hi mifetin ate mese, kais hi amnaben nek mafena, natuin anbi ton ne in a'lon in anmepu nalali neu ki nok baen kan tia fa ameput mese in baen. Amtao ma anmo'e plenat nane, onane te hi UISNENO of anfe tetus neu ale hi mepu.”

¹⁹“Bijae ana' ma bibi ana' (nok bibi kase ana' le nahonis nahunun sin mes mitulu neu hi UISNENO. Bijae nane ka nabe'i fa him pake he mepu meki ma bibi kase nane ka nabe'i fa he hi am eu in funun ai in nafun.

²⁰Anbi hi UISNENO In human In matan hi mok hi ume nanan sin hi mes miah mani mu'it nane in sisi, anbi bale le UISNENO anbeti nani.

²¹Mes leka mu'it nane namle'u, onle hae hela ka ai mat folo ka ai namle'u mafena bian anteni, ka nabe'i fa he hi mitulu neu hi UISNENO.

²²Atoni mese-mese, he aknino ka ai alahit ka nabe'i hi miah mani anbi ume, onle hi miah sisi lus anaek ai sisi lus ana'.

²³In na' ka nabe'i fa he hi miahan, mes am opan mani neu nain on oe.”