Read Uab Meto ULANGAN 16 Bible Online

ULANGAN 16 - Uab Meto bible

ULANGAN 16

¹“Miliatas Neno Naek Paskah anbi funan Abib he nati' hi minaeb hi UISNENO, natuin anbi funan nane, nok fai, In napoitan ki na'ko Mesir.

²Amnao nai meu bale le UISNENO anbeti nani he amlolo mu'it mese na'ko hi bibi ai hi bibi kase ka ai hi bijae ka on fua tulu Paskah neu he minaeb ma miliatas hi UISNENO.

³Fua tulu Paskah nane mes hi miah mani nok utunu' le kan pake fa lalu haef. Anbi neno hitu in nanan hi mes miah utunu' le kan pake fa lalu haef, onle anbi tabu him poi misaitan pah Mesir nok manapat. Hi miah utunu' nane nai, utunu' le antek nak utunu' hamu'it, he nati' anbi hi monim hi mimnau neno hi ampoi misaitan Mesir, bale le anhamu'i ki anbine.

⁴Anbi neno hitu in nanan anbi pah nanan ok-oke ka nabe'i fa he es amsa nabela lalu haef anbi in ume. Sisi mu'it le anlolo anbi fai ahunut nane mes hi miah mani oke anbi fai nane amsa.

⁵Mu'it neu Neno Naek Paskah mes hi amlolo anbi bale le hi UISNENO anbeti nani, ma ka nabe'i fa anbi bale bian anbi pah ok-oke le In anfe nani neu ki. Lasi nane mes hi amtao ma anmo'e mani anbi tabu neno hen tes, onle anbi tabu hi ampoi misaitan pah Mesir.

⁷Hi mihan sisi nane ma miahan anbi bale le hi UISNENO anbeti nani, oke te noka fa onane te amfani nai neu hi ume.

⁸Neno ne anmakatuin hi mes miah utunu' le ka nok fa lalu haef. Ma anbi neno hitu mes hi mibua he miluli mibes neu hi UISNENO. Kaisa hi mepu anbi neno nane.”

⁹“Amso'i klei hitu na'ko neno ahunut him lefi ane kase,

¹⁰oke te hi anmo'e nai Fesat Sekit ma mnonut he miliatas hi UISNENO. Anbi neno nane he meki hi fua tulu nek alomit neu In natuin mnahat le In anfe neu ki.

¹¹Anbi hi UISNENO In human In matan, anbi bale le In anbeti nani, hi mes mimlil ma mimoke bua'-bua' mok hi anah sin, hi ate-ate sin ma atoni Lewi, atoni anao amnemat, li'anmanat ma ale bife banu le natua anbi hi kot-kot sin.

¹²Mituin ale plenat In nok nek aki'at nai, ma kais him nikan nak afi ahunut hi amsa hi ate ki anbi pah Mesir.”

¹³“Leka hi amseki ma monu milali hi ane kase ok-oke ma ale hi tua min kase in fuan hi maes milali ok-oke, hi mes anmo'e Fesat La' Hau no' neno hitu in a'lon.

¹⁴Hi mimlil ma mimoke nai bua'-bua' mok hi anah sin, hi ate-ate sin, atoni Lewi, atoni anao amnemat, li'anmanat ma ale bife banu le namaika anbi hi kot-kot sin.

¹⁵Neno hitu in a'lon hi mes anmo'e fesat nane ma miliatas hi UISNENO anbi bale le UISNENO anbeti nani. Mimlil ma mimoke nai, natuin hi UISNENO anfe nalali tetus neu hi pah in afan ma hi mepu.

¹⁶Ale atoni Israel sin mes nem naluli nabes neu hi UISNENO anbi bale le In anbeti nani hae tenu anbi ton mese, esle' Neno Naek Paskah, anbi Fesat Sekit ma mnonut ma Fesat La' Hau no'. Atoni mese-mese mes neki fua tulu

¹⁷natuin in be'in in matanin, anmatom nok mnahat in amfaun le hi UISNENO anfe nani neune.”

¹⁸“Anbi kot mese-mese le hi UISNENO anfe neu ki, hi mes maiti ale alef lasi ma ameput-ameput bian he nafek lasi nok amneot neu to.

¹⁹Leka sin naiti lasi tfeka, sin ka nabe'i fa nafek lasi natuin sin nek alomit ai anpesi ao biaf. Sin ka nabe'i fa amsa hen simo noni mate, natuin noni mate nane nafolob atoni matan, he atoni ahinet ma atoni nek muti, talantia sin naiti lasi tfeka ka nok fa amneot.

²⁰Hi mes amneot ki piut, he nati' hi mibala ma amoni nok alekot anbi pah le hi UISNENO anfe neu ki.

²¹Leka hi anmo'e baki tulu neu hi UISNENO, kais him tao hau le'u mahuma ataka Asyera anbi baki tulu in aon bian,

²²ma kais hi mihakeb hau le'u he miluli mibes neu uisneno teta natuin hi UISNENO kan lomi fa taos mo'et le nane.