Read Uab Meto ULANGAN 17 Bible Online

ULANGAN 17 - Uab Meto bible

ULANGAN 17

¹Kais hi mitulu bijae ai bibi kase le anmu'i amle'ut anbi in aon neu hi UISNENO, natuin In kan lomi nani fa.

²Leka him nen nak anbi kot mese anmu'i atoni le nasanab neu hi UISNENO natuin antanhai lasi manba'an,

³ma In aplenat natuin an aetnon neu uisneno teta bian ai neu manas ka, funan ka ai afkun-afkun ka,

⁴onane te hi mes amtae mani nok lek-leko. Ma leka namneo-namneo lasi amle'ut nane anbol nalali anbi Israel,

⁵atoni le nasanab nalali nane hi mes meki anpoi na'ko kot ma ampoli meki fatu talantia in anmate.

⁶Mes al nabe'i namate in leka anmu'i atoni asaksit nua ai anesi na'ko nane; ka nabe'i fa namate atoni mese al natuin saksit na'ko atoni mese.

⁷Ale asaksit sin mes anpoli nahunun fatu ahunut neu atoni nane, oke te to ok-oke natuin. Nok nane te hi mineku amle'ut nane.

⁸Leka anmu'i lasi mese le ale alef lasi kuan ka nafek nabe'i fa natuin mafen le'uf, onle lasi maote mamaten nok asafanu ai ka nok fa asafanu, matoes mabanat natuin lasi mu'if ai anmapap eun, hi mes amnao meu bale le hi UISNENO anbeti nani.

⁹Mitlak hi lasi nane neu ale Ana' fuat knino Nai Lewi ma neu alef le fe nanaoba mepu, oke te mifetin lasi nane he sin nafek nani.

¹⁰Sin es anfe lasi tfeka, ma hi mes anmo'e nok lek-leko sa' le sin naton neu ki.

¹¹Amsimo sin lasi tfeka ma amtao ma anmo'e sa' le sin natetab nani talantia lasi-lasi an-ana.

¹²Sekau le hen laban alef lasi ai Ana' fuat knino le fe nanaoba mepu, mes mimate mani; nok nane te hi mineku lasi amle'ut nane anbi Israel.

¹³Ale to ok-oke of sin nen antom lasi nane ma sin namtau, talantia katit fa anteni le nabe'i hen mo'e onane.”

¹⁴“Leka pah le hi UISNENO le anfe neu ki anfani nalali hi ini, ma hi mitua milali ambi nane, oni of hi amsinmakan kesel mese onle uf-uf le natua anfun natef nan ki.

¹⁵Ampanat lek-leko he nati' atoni le hi maiti anfani kesel so nati' atoni nane atoni le hi UISNENO anbeti nani. In mes atoni le na'ko hi nonot kun; kais hi maiti atoni anao amnemat mese hen fani hi kesel.

¹⁶Kesel ka nabe'i fa he anmu'i bikase namfau neu in solalus sin ma ka nabe'i fa he anlenu to le i he sin anao anfani neu Mesir hen sos bikase, natuin UISNENO nakua nalali a'an nak In to ka nabe'i fa he sin anao anfani neu pah nane.

¹⁷Kesel ka nabe'i fa he anmu'i fenai namfau, he nati' kais in anbeo ma ankoti UISNENO. In amsa ka nabe'i fa he namu'ib in aon neki noni muti ma noni mnatu.

¹⁸Leka naki'ab atoni mese anfani kesel, mes anfe neune sulat mese le matui nahenu nok plenat-plenat Uisneno le antui natnanib na'ko Sulat uf le Ana' fuat knino Nai Lewi nabela nani.

¹⁹Sulat nane mes anhaumak in piut, ma anbi in amonin ok-oke in mes anso'i nani he nati' in nanoina he naliatas in UISNENO ma nok aki'at in natuin ale plenat le matui anbi sulat nane in nanan.

²⁰Leka in anso'i sulat nane nok aki'at, in of ka nak fa nak in aon naleko anesi na'ko atoni-atoni le nonot mese nok in, ma of in kan ele ma antanhai fa UISNENO In aplenat nok lanan he onme amsa. Oke te in ma in anah sin of sin naplenat sin nonot na'ko batnes nao neu batnes.