Read Uab Meto ULANGAN 18 Bible Online

ULANGAN 18 - Uab Meto bible

ULANGAN 18

¹“Uf Nai Lewi ok-oke amfe neu sin mepu Ana' fuat knino, nok nane te sin ka nabe'i fa hen simo pa' ma nama' na'ko nain anbi Israel. Sin mes anmoni na'ko tulu tnatas ma fua tulu bian le natulu neu UISNENO.

²Sin ka nabe'i fa he napeni nain onle uf-uf bian, natuin UISNENO anfani pa' ma nama' sin bale bela, onle UISNENO anba'an neu sin.

³Leka atoni mese natulu fua tulu bijae ai bibi kase, onane te mu'it nane in pusun atomatas, a'su'in ma in taifen mes nana'at sin neu ale Ana' fuat knino anfani sin pa' ma sin nama'.

⁴Hi ane kase ahunut, hi tua mina mtasa in anakan, mina bub fua mina anakan ma bibi kase nafun, nane amsa anfani sin pa' ma sin nama'.

⁵Na'ko ale uf Israel ok-oke, hi UISNENO anbeti nalali uf Lewi anfani Ana' fuat knino talantia nabal-bal.

⁶Leka atoni Lewi mese le na'ko kot me amsa anbi Israel in nem neu bale le UISNENO anbeti ma anlomi natua anbi nane,

⁷in nabe'i antuthae hi UISNENO on Ana' fuat knino on atoni-atoni Lewi bian le anmepu anbi bale nane.

⁸In mes ansimo mnahat papmese onle ale Ana' fuat knino bian, sa' le in ansimo na'ko in-ini sin, nane amsa neu in.”

⁹“Leka hi amtam milali neu pah le hi UISNENO anfe neu ki, kaisa hi anmo'e mituin lasi amle'ut le uf-uf anbi nane sin antao ma anmo'e.

¹⁰Anbi ki kaisa anmu'i le natulu sin anah-anah sin on fua tulu mnotu. Ma kais atoni mese amsa hen fani aban ataka, nami ataka-ataka, anpake le'u-le'u ai

¹¹lasi mahine le'u-le'u sanmakat, ai anmo'e malutas nok smanaf-smanaf atoni amates.

¹²Atoni-atoni le antao ma anmo'e ale taos mo'et amle'ut le nane hi UISNENO, kan lomi fa lasi nane, ma es nane te uf-uf nane In anli'u sin na'ko hi humam hi matam.

¹³Es nane te so nati' hi am aetnom nai neu hi UISNENO nok hi nekam ok-oke.”

¹⁴Nalali te Nai Musa nak, “Uf-uf anbi pah le of hi mitua nane sin natuin ale aban ataka ma nami ataka-ataka. Mes hi UISNENO ka nafetin ki fa he hi amtao ma anmo'e lasi nane.

¹⁵Mes na'ko hit nonot kun In of ansonu neu ki Mafefa knino mese onle au es i, ma hi mes mituin mani.

¹⁶Anbi tabu hi mibua anbi Tubu Sinai, him toti he nati' kais him nen amteni hi UISNENO In hanan ma kais hi mit amteni In anbi ai le anpin-pin natuin hi mimtau he mate.

¹⁷Es nane te UISNENO nakua a'an neu kau nak, ‘Sin han totis nane leko.

¹⁸Na'ko sin nonot kun of Au sonu neu sin Mafefa knino mese onle ho. Au of uton neu sin sa' le mes in hen tao ma anmo'e, oke te in of natiaba neu nonot nane ale sa' le Ho muplenat.

¹⁹In of namolok natuin Au kanak, ma Au of a'fe kasat neu sekau le kan lomi fa he nen ma natnin in.

²⁰Mes leka Mafefa knino mese in nahelnon ma natiaba natuin Au kanak mes Au ka lenu fa in hen mo'e onane, in mes anmate: ai natiba uab na'ko uisneno teta in mes anmate.’

²¹Oni hi mitan anbi hi nekam nanan mak, ‘Hai he mihin onme ka nak nane a'an na'ko mafefa knino le nem na'ko UISNENO ai kahaf?’

²²Leka Mafefa knino mese namolok natuin UISNENO In kanan, mes sa' le in namolok nane kan bol nani fa, onane te sa' le in namolok nane ka na'ko fa UISNENO. Mafefa knino nane namolok natuin kun in kanan ma kais hi mimtausan in.”