Read Uab Meto ULANGAN 19 Bible Online

ULANGAN 19 - Uab Meto bible

ULANGAN 19

¹“Leka uf-uf nane hi UISNENO nale'un nalali sin ma In anfe sin pah neu ki, ma leka hi maiti milali sin kot-kot sin ma sin um-ume sin ma hi mitua ambi nane,

²pah nane mes hi ambati mani anfani pa' tenu, es-es nok kot aninit ma ahafot mese le nok laba taen teu kot nane he nati' ale atoni le namate atoni nabe'i sin naen neu bale nane.

⁴Leka atoni mese ka nok fa asafanu namate nalali atoni bian le ka in musu fa in nabe'i naen neu kot mese na'ko kot nane ma nabe'i in anmoni nabala.

⁵Onle atoni nua sin anao bua'-bua' antam neu nasi hen ote hau. Fe atoni mese an ote hau, fani anakan anpoi na'ko in haun ma antoman in biaf talantia anmate. Onane te atoni le namate nalali in biaf ka nok fa asafanu in ka nasanab fa ma nabe'i in naen neu kot mese na'ko kot tenu aninit ma ahafot nane he nati' in anmoni. Leka al anmu'i kot aninit ma ahafot mese, oni in a'lon le nane lo le'uf, ma amates nane in-ini sin le anmu'i sutais neu hen seunbanin lasi maten nane sin anli'u atoni nane ma sin namate atoni le ka nasanab fa.

⁷Es nane te au uplenat ki he mibalab kot tenu.

⁸Leka hi UISNENO anmenuaba nalali hi pah onle In anba'an nalali neu hi na'if sin, ma pah nane ok-oke anfe nalali neu ki,

⁹hi mes anbeti kot aninit ma ahafot tenu anteni. (Pah nane of anfe nani neu ki leka hi amtao ma anmo'e ale sa' le au uplenat ani neu ki neno i, ma leka hi amnek mimnau hi UISNENO ma hi amoni mituin In aplenat sin.)

¹⁰Amtao ma anmo'e mani he nati' kais hi misanab natuin hi mimate atoni le ka nasanab fa anbi pah le hi UISNENO anfe neu ki.”

¹¹“Mes in lasi teta kun leka atoni mese an eka in musu nok asafanu ma nok nek mas'unu namate in, oke te in naen neu kot mese na'ko kot aninit ma ahafot nane he naninbon ma nahaofton.

¹²Anbi lasi nane ale anakaf anbi kot nane sin mes no'en atoni nane oke te nana'at in neu atoni amates nane in-ini sin he sin anseunbanin lasi maten nane, he nati' sin namate in.

¹³Kais amnek mimnau in. Mifetin Israel na'ko opan na' nane, he nati' hi moni nok alekot.”

¹⁴“Leka hi amtia milali pah le hi UISNENO anfe neu ki, kais hi mitnanib nakat nain na'ko hi aombin sin le natetab nani anbi batan ahunut.”

¹⁵“Atoni mese anfani saksi ka nanokbon fa neu atoni mese he nasanab; so mak saksi nua neu lasi nane.

¹⁶Leka atoni mese anlomi he namofu atoni bian ma natlak in neki lasi moel ma poi anbi bale lef lasi, onane te

¹⁷sin nua sin mes anao neu bale luli besa le UISNENO natetab nani he nati' ale Ana' fuat knino ma ale alef lasi le fe nanaoba mepu sin nafek atoni nane sin lasi.

¹⁸Ale alef lasi nane sin mes antae nok lek-leko ma leka natonon nak atoni nane nale'uf in biaf atoni Israel,

¹⁹in mes nanaoba lasi tfeka le in musu natlak nani. Nok nane te hi mineku mani amle'ut onane.

²⁰Ale atoni ok-oke of sin anen lasi nane ma anfani namtau, talantia katit fa anmo'e amle'ut onane.

²¹Kais amnek mimnau sin anbi lasi-lasi onle nane. In lasi tfeka nane esle': Smanaf anseka smanaf, mataf anseka mataf, nisif anseka nisif, nimaf anseka nimaf ma haef anseka haef.”