Read Uab Meto ULANGAN 20 Bible Online

ULANGAN 20 - Uab Meto bible

ULANGAN 20

¹“Leka hi amnao he maken amlaban hi musu-musu sin, kais hi mimtau leka hi amkiso sin aklet makenat ma sin bikase le amfaun ma sin solalus sin le namfau anesin ki. Hi UISNENO le nafetin ki na'ko Mesir, of anbab ki.

²Leka hi fe ka maken fa, Ana' fuat knino mese mes anfonat anao mat ma amnolok neu ki on i,

³‘Au bia ki ok-oke, amnen nai! Neno i amnao mat he amaken. Kais mimtau ai hi nekam na'bau ai hi nekam na'oni.

⁴Hi UISNENO of In nok ki ma anbab ki, ma In of anfe mnisat neu ki.’

⁵Nalali te hi solalus anakaf sin mes natiaba uab a'at i neu ki, ‘Ai anbi ki anmu'i atoni le nahakeb nalali ume fe'u mes in fe kan hainiki fa ka? Leka anmu'i, nabe'i in anao anfani. Natuin leka in anmate anbi makenat, atoni teta of natua in ume.

⁶Ai anbi ki anmu'i atoni le fe in ansen nalali in lene tua min kase ma le fe kan seu fa in tua min kase in fuan? Leka anmu'i, nabe'i in anao anfani. Natuin leka in anmate anbi makenat atoni teta of antamis in tua kase in oen.

⁷Ai anbi ki anmu'i atoni le fe anmafutu nek nok li'anfeto mese ma of hen mafe nok in ka? Leka anmu'i, nabe'i in anao anfani. Natuin leka in anmate anbi makenat in nanan, atoni teta of anmafe nok bife le fe in anmafut nek nokan.’

⁸Ale hi solalus anakaf sin amsa mes naton neu ki lasi i, ‘Ai anbi ki anmu'i atoni le nekan namneku ma namtau? Leka anmu'i, nabe'i in anao anfani, he nati' kais in nale'un nek matani atoni bian.’

⁹Leka ale hi solalus anakaf sin namolok nalali neu sin solalus sin, mes anbeti anakaf neu solalus pukan mese-mese.

¹⁰Leka hi amnao he mipe' kot mese, amfe sona nahun neu tuaf abit kot nane he nati' sin nana'tok.

¹¹Leka sin anfani sin eno-eno naek ma sin nana'tok, sin al sin ok-oke mes anfani hi ate ma anmepu mepu mafena neu ki.

¹²Mes leka tuaf abit kot nane kan lomi fa he nana'tok ma anlomi nesi hen maken, hi mes mipe' kot nane.

¹³Namuni te, leka hi UISNENO In nok ki talantia hi misik man kot nane, hi mes mimate ale atoni mone tuafen kot nane ok-oke.

¹⁴Mes nabe'i hi maiti ale bife, ale li'ana sin, sin mu'it ma ale sa' anbi kot nane. Ale amaus ma ale bale' na'ko musu-musu nane nabe'i him pake sin. Hi UISNENO nana'at ale nane ok-oke neu ki.

¹⁵Onle nane hi mes amtao ma anmo'e mani neu kot-kot le na'lo na'ko pah le hi mitua ambine.

¹⁶Mes leka kot nane anbi pah le hi UISNENO anfe neu ki, ale sin tuafen ok-oke mes hi mimate mani sin.

¹⁷Onle hi UISNENO anfe plenat neu ki, hi mes mile'un mani atoni-atoni Het, Amori, Kanaan, Feris, Hewi ma Yebus.

¹⁸Hi mimate sin, he nati' kais sin anmo'e ki misanab neu hi UISNENO nok nanoina ki taos mo'et hainisit neu ale sin uisneno teta.

¹⁹Leka hi mipe' kot mese ma hi mis ma ambe'u kot nane neno lo, kaisa hi mile'un hau mafua anbi nane. Hi miah sin fuan, mes kais mile'un in un, natuin hau ufen nane ka hi musu-musu fa.

²⁰Hau bian nabe'i hi mifae ai amse' mani neu hen fani baki makenat talantia kot nane hi mis ma ambe'u mani.”