Read Uab Meto ULANGAN 21 Bible Online

ULANGAN 21 - Uab Meto bible

ULANGAN 21

¹“Leka anbi pah le hi UISNENO anfe neu ki napeni atoni mese anmate anbi mnela le es an ote nisan ma a'otes nane ka nahin nani fa,

²onane te hi anakaf ma hi alef lasi sin mes sin anpoi ma sin anao he sin ansu' a'lon na'ko bale amates nane sin napeni nok kot-kot le anmahaumakan.

³Oke te ale nakaf na'ko kot le anhaumak anesi atoni amates nane mes anbaeti nan bijae tipu mese le fe kan pake fa neu mepu.

⁴Bijae nane sin mes neki neu bale mese anhaumak noe le kan meti nit fa ma le bale nane kan beti nani fa ai kan sen nani fa. Anbi bale nane sin mes an'ipu mu'it nane in to'an ai in neon.

⁵Ale Ana' fuat knino Nai Lewi amsa sin mes he nao neu bale nane natuin sin mes hen fe lasi tfeka neu ale lasi maufinut. Hi UISNENO anbeti sin hen tuthae In ma anfe tetus anbi In kanan.

⁶Oke te ale anakaf kot le anhaumak nis nok amates nane sin mes anfase sin niman anbi bijae nane in fafon

⁷ma nauab nak, ‘Hai es ka mimate fa atoni nane, ma hai ka mihin fa neu sekau es anmo'e lasi nane.

⁸Koi UISNENO, amsako Ho to Israel sin sanat le Ho mufetin sin na'ko Mesir. Amsako kai hai sanat ma kais Ho musaeba kai mafena neu atoni amates le ka nasanab.’

⁹Nok hi amtao ma anmo'e sa' le UISNENO, antoti onane te hi kam sutai fa mafena neu atoni amates nane.”

¹⁰“Leka hi amaken ma hi UISNENO anfe neu ki mnisat, oke te hi amheke atoni,

¹¹ma oni atoni sin le nane anmu'i bife amasat mese le hom lomi he maiti anfani ho fenai.

¹²Ho meki bife nane neu ho ume. Anbi ho ume in mes an eu in nak funu, anketu in aknusan,

¹³ma anseka in bale pake. In mes natua anbi ho ume nanan ma ankae ma ankulu neu in amnasi sin anmate, nan funan mese na a'lon. Nalali te nabe'i ho mafe mokan.

¹⁴Leka anbi neno namuni te ho kam lomi fa in anteni, nabe'i hom lenu in nao anfani kun nok aomina. Ka nabe'i fa ho mo'e in on ate ai ho musosa in, natuin ho museke mulali in ma amtup mokan.”

¹⁵“Taleta oni atoni mese anmafe nua, ma nua sin nahoni anmone, mes anmone le nahonis nahunun ka na'ko fa in fenai le in nek nani.

¹⁶Leka atoni nane anlomi natenab hen bati in amu'in onme neu in anah sin, in ka nabe'i fa hen pesi anah na'ko in fenai le in nek nani ma anfe neu li'ana nane pa' le anfani bale bela anmone nael.

¹⁷In mes anfe kuni nua na'ko in ama'us neu anmone nael, maski anah nane ka anah na'ko fa in fenai le in nek nani. Mes kanaf anmone nael in amaf mes ansimo nani, ma neu li'ana nane mes anfe neune pa le anfani in-ini natuin lekat lulut.”

¹⁸“Taleta oni anmu'i anmone nua le na'nakfatu, anlomi hen laban ma kan lomi fa he nen in amnasi sin noina ma aplenat.

¹⁹Onane in amnasi sin mes neki in neu anakaf sin anbi kot bale sin natua anbine ma antoti he nati' sin nafek lasi neu li'ana nane.

²⁰Sin mes naton neu ale anakaf kot nane nak, ‘Hai anah le i in na'nakfatu, anlomi hen laban ma kan lomi fa he nen ma natuin neu kai; in naklosan noni ma anmafu tua.’

²¹Oke te ale atoni na'ko kot nane mes sin anpoli anah nane neki fatu talantia in anmate. Nok nane te hi mineku lasi amle'ut nane. Ale atoni anbi Israel of sin anen lasi nane ma anfani namtau.”

²²“Leka atoni mese nafek nalali lasi maten neu in natuin lasi amle'ut mese, ma in aon nitu naboni anbi ni mese,

²³onane te nitu nane ka nabe'i fa naboni nabala anbi nane anbi fai mese in nanan, mes so nati' ansub nani anbi neno nane amsa. Nitu le naboni nabala anbi ni neki kasat Uisneno neu pah. Es nane te, amsub nitu nane nai, ha nati' kais hi milahi pah le hi UISNENO anfe neu ki.