Read Uab Meto ULANGAN 22 Bible Online

ULANGAN 22 - Uab Meto bible

ULANGAN 22

¹Leka bijae mese ka ai bibi kase mese ka hi nonot in-ini ansek ma hi mit mu'it nane, kaisa him asafanu onle hi ka mihin fa, mes so hi meki mifani mu'it nane neu in tuan.

²Leka in tuan ume na'lo, ai hi ka mihin fa mu'it nane in tuan, hi meki mu'it nane neu hi ume. Leka in tuan nem ma nami, mina'at mu'it nane neu in.

³Hi amtao ma anmo'e onane amsa leka hi mitef bikase luke mnanu mese ka, ai tainusat tuka mese ka, ai sa' es hi nonot sin ini.

⁴Leka bikase luke mnanu mese ai bijae mese hi nonot sin ini natsel anbi lanan, kaisa him asafanu ka mihin fa, mes ambab in mifena mu'it nane hen fen anfani.

⁵Bife ka nabe'i fa hen pake on atoni ma atoni ka nabe'i fa hen pake on bife, natuin atoni le anmo'e onle nane hi UISNENO kan lomi fa.

⁶Leka hi mitef kolo kuna mese anbi hau u'mese ai anbi nain ma kolo ainaf fe in anu' in teko sin antoko nabua nok in ana' sin, kaisa amheke kolo ainaf nane.

⁷Nabe'i hi maiti kolo nane in ana' sin, mes mifetin ainaf naplel he naen, he nati' hi uam amnanu ma amoni nok alekot.

⁸Leka hi mihakeb ume fe'u, hi mes anmo'e baki funam natef hi ume penen amnela. Onane te hi mifetnom na'ko tusa na' leka es anmofu na'ko ume in penen anmela nane ma anmate.

⁹Kaisa him sen hi lene tua min kase meki fini bian so al tua min kase kun. Leka him sen amsa, ka nabe'i fa him abul in fuan nane, leko na'ko tuamin kase, ai na'ko fini bian in fuan.

¹⁰Kais him foi afu meki bijae ma bikase luke mnanu sin anhel besi foi bua'-bua'.

¹¹Kais him pake bale pake le anmo'e na'ko manafu ma pilu muti le antenu nabuab sin.

¹²Him tao tani haineka anbi hi tainusat pankenu ha sin.”

¹³“Taleta onle atoni mese anmafe nok li'feto munif mese, ma namuni te atoni nane kan lomi anteni fa bife nane.

¹⁴In natlak lasi nane nok moel ma poi nak in fenai nane ka ao teme fa anbi tabu in anmafe nok bife nane.

¹⁵Anbi lasi nane mnasi na'ko bife nane mes sin naiti pilu muti mafet mamonet ataka li'feto ao temef na'ko bife nane le anbi pilu muti nane, le naton anfani ataka nak sin anah anbi tabu nane fe ao temef. Pilu muti nane sin mes nalile ma naton neu ale anakaf kot anbi bale lef lasi.

¹⁶Li'feto nane in amaf mes namolok neu sin nak, ‘Au una'at ulali au anah neu atoni i anfani in fenai, mes in kan lomi anteni fa.

¹⁷In natlak nok moel ma poi nak in fe ka ao temef fa leka in anmafe nok in. Mes in ataka es i nak au anah anbi tabu nane fe ao temef. Amkiso milek-leko ataka anbi pilu muti mafet mamonet i!’

¹⁸Onane te ale anakaf kot bale nane mes sin no'en atoni nane ma anbeso in.

¹⁹Sin amsa mes naopab atoni nane noni muti natun mese ma nana'at noni nane neu li'feto nane in amaf, natuin in nale'un nalali lasi alekot na'ko bife Israel mese. Ma bife nane mes anfani atoni nane in fenai ma ka nabe'i fa hen polin in anbi in amonin.

²⁰Mes leka lasi tlakas nane namneo ma kan mu'i fa ataka nak bife nane ka ao temef fa anbi tabu in anmamone,

²¹onane te mes neki bife nane neu in amnasi ume enon. Anbi bale nane ale atoni na'ko kot nane mes anpoli bife nane neki fatu talantia in anmate. Bife nane in anmo'e nalali lasi amle'ut mese le namaeba hit nonot natuin in anmo'e lasi mapaisa fe in kan mamone fa le fe in natua anbi in amaf ume. Nok hi mimate in hi mineku lasi amle'ut nane.

²²Leka napeni atoni mese fe antup nabua nok bife mamone mese, mes namate sin nua sin. Nok nane te hi mineku lasi amle'ut nane.

²³Taleta onle anbi kot mese in nanan atoni mese fe antup nabua nok li'feto mese le anmafutu nekaf nalali nok atoni bian.

²⁴Anbi lasi nane mes neki sin anpoi na'ko kot ma anpoli sin neki fatu talantia anmate. Mes namate li'feto nane natuin in kan anbai fa hen toti tuntakus, natuin lasi nane anbol anbi kot nanan, leka hi anbai nabe'i anen in hanan. Ma mes namate atoni nane natuin in antup nabua nok li'feto le anmafutu nekaf nalali nok atoni bian. Nok namate sin nua sin, hi mineku lasi amle'ut nane.

²⁵Mes in lasi teta kun leka atoni mese anheke li'feto mese anbi lene ma antup nabua nokan, mes li'feto nane anmafutu nekaf nalali nok atoni bian. Anbi lasi nane al atoni es mes namate nani.

²⁶Li'feto nane ka nabe'i fa hen mo'e sa'-sa' neune natuin in kan mo'e fa lasi sa' esle' nabe'i he namate nani. Lasi nane papmese onle atoni mese nem naskeken es ma namate nani.

²⁷Lasi atoni anheke li'feto mese anbi lene, ma maski li'feto nane in anbai antoti hen bab in, mes katit fa esle' nem hen bab in.

²⁸Bati onle hi mipeni atoni mese anheke li'feto ao temef mese ma antup nabua nokan li'feto nane fe kan mafutu fa nekaf nok es.

²⁹Anbi lasi nane atoni nane mes anbaen noni mnatu mafet mamonet neu li'feto nane in amaf nok upa' noni muti bo'nim. Li'feto nane mes anfani in fenai natuin atoni nane naseke in ma antup nabua nokan ma ka nabe'i fa hen polin in anbi in amonin.

³⁰Ka nabe'i fa es nale'uf in amaf ma antup nabua nok in amaf in fenai mese.”