Read Uab Meto ULANGAN 23 Bible Online

ULANGAN 23 - Uab Meto bible

ULANGAN 23

¹“Atoni le anbo'e nalali ai le anketo in amonin ka nabe'i fa hen tam UISNENO In to.

²Atoni le nahonis kan bi fa mafet mamonet in nanan ma ale in sufan sin talantia batan bo'mese amsa, ka nabe'i fa hen tam UISNENO In to.

³Atoni Amon ma Moab ma sin sufan sin talantia batan bo'mese amsa ka nabe'i fa hen tam UISNENO In to,

⁴natuin sin kan fe ki fa mnahat ma oe leka hi ambi lanan ampoi mi'ko Mesir. Anesi na'ko nane te sin anseb Nai Bileam, Nai Beor anmone na'ko kot Petor anbi Mesopotamia, neu hen sukat ki.

⁵Mes hi UISNENO kan lomi fa he nen Nai Bileam. Mes In nabaina sukat nane ma anfani tetus, natuin In anek namnau ki.

⁶Leka hi fe amoni ma talantia nabal-bal, kais hi ambab uf-uf nane ai amfe neu sin he anmoni nok alekot.

⁷Kais hi amkiso mibaun atoni Edom natuin sin le nane hi biaf hi benuf sin. Onane te kais hi amkiso mibaun atoni Mesir, natuin afi hi mitua ambi sin pah.

⁸Naubon na'ko batan tenu talantia batan-batan amnemat nabe'i sin anfani UISNENO in to.”

⁹“Anbi tabu hi fe amaken, hi mes miskotun hi aom na'ko ale sa' le he nale'un ki.

¹⁰Leka atoni mese nalahi natuin napoitan oe monif anbi tabu in fe antup, in mes nasaitan um-ume ma namaika anbi kotif.

¹¹Neno anmabe onane te in mes naniu ma leka neno antes in nabe'i antam anfani neu um-ume.

¹²Hi mes miloitan bale anbi um-ume kotin he nati' hi ampolin oe.

¹³Leka hi hem nao meu bale nane, meki bale' le hi he meki onane amsa meki hau tuka mese hem hani bola' bale polin maklafu ma hem kub mifani.

¹⁴Hi UISNENO nok ki anbi hi um-ume he naneo ma nahafo ki ma anfe neu ki he nati' hi mis ma ambe'u hi musu-musu sin. Es nane te ampanat nai he nati' hi um-ume naknino piut. So nati' kais napeni sa'-sa' esle' ka maota fa anbi ki, he nati' UISNENO kais nasaitan ki.”

¹⁵“Leka ate mese in naen na'ko in usin ma in nem neu ki ma antoti he nati' hi mineo ma mihafo in, kaisa amlenu in hen fani.

¹⁶In nabe'i natua anbi hi kot mese le in anbeti kun, ma ka nabe'i fa hi amtao ma anmo'e in nok mafena.

¹⁷Atoni Israel, he atoni ka ai he bife ka, ka nabe'i fa hen fani atoni ma bife amakaket anbi bale-bale fuat.

¹⁸Onane amsa noni le napeni na'ko lasi makaket nane ka nabe'i fa he neki neu hi UISNENO In Ume he anbaen in lasi manta'en, natuin hi UISNENO kan lomi fa lasi makaket anbi bale-bale fuat ma baen ai upa' na'ko lasi makaket.

¹⁹Leka atoni anao amnemat natus hi noni, nabe'i hi amtoti hi noni in sufan. Mes leka atoni na'ko hi nonot natus hi noni ai hi mnahat ai hi bale sa' bian anteni ka nabe'i fa hi amtoti in sufan. Mituin plenat nane, onane te hi UISNENO anfe tetus neu ale sa'-sa' le hi amtao ma anmo'e anbi pah le hi mitua ambine.

²¹Leka hi amanta'en lasi sa' es neu hi UISNENO, kaisa hi mitnanib in tabu he minokan hi lasi manta'en nane, natuin hi UISNENO In antoti piut lasi nane, ma hi misanab leka hi ka minokab mani fa.

²²Hi ka misanab fa leka hi ka manta'en fa neu UISNENO.

²³Mes leka nok hi nekam alomit kun hi mo'e lasi manta'en neu hi UISNENO, hi mes he minokab mani.

²⁴Leka hi amnao mituin atoni bian in lene tua min kase, nabe'i hi miah tua min kase in fuan fua fauk le him lomi, mes ka nabe'i fa him seu neu poni nanan.

²⁵Leka hi amnao mituin atoni bian in lene ane kase, hi nabe'i miah ane kase le hi monu meki hi nimam, mes ka nabe'i fa amlefi meki besi lefi.”