Read Uab Meto ULANGAN 25 Bible Online

ULANGAN 25 - Uab Meto bible

ULANGAN 25

¹Taleta onle atoni Israel nua sin anao neu bale lefi lasi he natlak lasi mese, oke te nafek lasi nak es ka nasanab fa, ma es te es nasanab.

²Leka nafek nalali lasi neu nasanab nak hen beso in, alef lasi mes anlenu in hen tup anbenton. Oke te anbeso in ma in amfaun anmatom nok amle'ut le in anmo'e nalali,

³mes ka nabe'i fa anesi na'ko hae bo'ha. Leka anesi na'ko hae bo'ha nane nak nasi'ut atoni nane anbi atoni amfaut sin matan.

⁴Kais hi ampanfelo bijae fefan le fe anteli ane kase.”

⁵“Leka atoni-atoni le sin olif tataf sin natua nabua oke te es na'ko sin anmate nok ka nahoni fa anmone, onane te bife banu nane ka nabe'i fa he anmamone nok atoni teta na'ko in mone amates. Amates nane in tataf ai in olif mes anmafe nok bife banu nane.

⁶Sin anmone unu mes anfani anah na'ko amates nane, he nati' in anmu'i sufan anbi nonot Israel.

⁷Leka atoni nane kan lomi fa he anmafe nok bife banu amates nane on in fe, bife nane mes anao neu amnasi anbi kot nane ma nak, ‘Au baef kan lomi fa he nanaoba in lasi sutais hen fe neu in biaf atoni mese sufan neu Israel.’

⁸Oke te ale amnasi anbi kot nane mes no'en atoni nane ma namolok nok in.

⁹Leka in antite nabala amates nane in fe in mes anhaumak in anbi ale mnasi kot sin matan, ankasu atoni nane in peni haef, nakinu in human ma nak, ‘Onle i mes antao ma anmo'e atoni le kan lomi fa he anfe sufa ka'uf neu in biaf.’

¹⁰Nonot atoni nane of antek sin anbi Israel on ‘Nonot atoni le makasu peni haef.’ ”

¹¹“Leka atoni nua fe anmatufun, ma es te in fenai nahelnon he nasoni in mone in nenu in niman ma ana' atoni nane in ahonin,

¹²amketu ampolin bife nane in niman ma kais amnek mimnau in.

¹³Kais hi mi'kake nok ampake atnais ma su'at le kan matom fa.

¹⁵Ampake atnais ma su'at le alekot he nati' hi ua mnanu ki anbi pah le hi UISNENO anfe neu ki.

¹⁶Hi UISNENO kan lomi fa atoni le anlomi he na'kake.”

¹⁷“Hi mimnau neu onme atoni Amalek antao ma anmo'e ki anbi tabu hi ampoi mi'ko Mesir.

¹⁸Sin ka namtausan fa Uisneno ma anli'u ki ma anken ki na'ko hi kotim leka hi fe amhae ma hi matanim oke, ma oke te sin namate ale hi atoni-atoni sin le nok susal mafena sin anao anbi kotin.

¹⁹Es nane te, leka hi UISNENO anfe nalali pah nane neu ki ma hi amtainine na'ko ale musu le natua anfun natef nan ki, ale atoni Amalek nane ok-oke mes hi mimate mani sin talantia ka namnau anteni fa sin. Kais amnikan!”