Read Uab Meto ULANGAN 26 Bible Online

ULANGAN 26 - Uab Meto bible

ULANGAN 26

¹“Leka hi amtam milali neu pah le hi UISNENO anfe neu ki ma hi mitua milali ambine,

²onane te pah afan ahunut na'ko ale sa' le hi amnibun na'ko hi pah mes hi mitam neu poni mese, ma hi meki neu bale le hi UISNENO anbeti nani.

³Amnao meu Ana' fuat knino le anmepu anbi tabu nane ma hi mak neune mak, ‘Au uton neu hi UISNENO nak au tam ulali neu pah le In anba'an nalali neu hit be'i hit na'i sin neu hen fe nani neu kit.’

⁴Ana' fuat knino of ansimo poni nane na'ko ho nimam ma in antao neu hi UISNENO In baki tulu matan.

⁵Nalali te anbi hi UISNENO In human In matan, ho mes amtek a'at i mak: ‘Koi UISNENO, au be'i au na'i sin atoni Aram le anao neu me-me. In neki in ume nanan sin neu Mesir he natua anbi nane onle natnanib sin. Leka sin anao neu bale nane sin ka namfau fa, mes sin anfani uf anaek mese ma nabe'i nok matani.

⁶Atoni Mesir antao ma anmo'e kai nok amle'ut ma naseke kai ma amepu on ate.

⁷Oke te hai am anbai ma amtoti Ko, hai UISNENO, am tuntaku' kai. Ho amnen hai han anbait ma Ho mit hamu'it, susal ma hai nukat.

⁸Nok kuasat ma be'it matani le anaek Ho mufetin kai na'ko Mesir. Ho anmo'e ale ataka-ataka ma ale sanmakat-sanmakat oke te napoitan ale lasi-lasi le neki hakataus neu musu.

⁹Nalali te Ho meki kai neu bale i ma amfe pah maafa ma alekot i neu kai.

¹⁰Es nane te, koi UISNENO, au utulu fua tulu ahunut na'ko pah i in afan le Ho amfe mulali neu kau.’ Oke te mibela poni nane anbi hi UISNENO In human In matan ma miluli mibes meu In.

¹¹Mitulu hi nekam natuin ale mnahat le hi UISNENO anfe nalali neu ki ma hi ume nanan. Amhone atoni Lewi ma atoni anao amnemat le natua nabua nok ki he nati' sin nok anbi amlilat ma amoket nane.

¹²Leka anbi ton tenu hi mes mitulu fua tulu tnatas bati bo' mase na'ko hi pah afan neu Ana' fuat knino Nai Lewi, atoni anao mnemat, li'anmanat ma bife banu, talantia anbi hi kot mese-mese sin napeni mnahat he sin anbukae. Leka hi anmo'e milali te,

¹³hi mak neu hi UISNENO mak, ‘Na'ko bati bo' mese pah in afan le mes natulu neu Ko. Koi UISNENO, katit fa akle'o amsa he nabala anbi au ume; au fe ulali ok-oke neu atoni Lewi, atoni anao amnemat, li'anmanat ma bife banu, onle au UISNENO naplenat nalali neu kau. Na'ko UISNENO In aplenat neu fua tulu tnatas bati bo' mese katit fa le au he tanhai.

¹⁴Na'ko fua tulu tnatas nane kle'o amsa au ka uah ani fa anbi tabu au kul ma kae, ai au eki anpoi na'ko ume anbi tabu au fe malahi kau, ai au fe ani on balab neu atoni amates. Au utuin ulali neu Ko, koi UISNENO, ale sa' le Ho muplenat au unaoba ulali.

¹⁵Na'ko Ho bale knino anbi neno tunan Ho amlomi he amkiso ma amfe tetus neu Ho nonot Israel; amfe tetus amsa neu pah amu'it ma alekot le Ho amfe mulali neu kai matomnok Ho han manba'an neu hai be'i hai na'i sin.’ ”

¹⁶“Neno i UISNENO naplenat ki he amtao ma anmo'e ale plenat nane; amtao ma anmo'e ale plenat nane nok aki'at ma nok hi nekam oke ma hi monim oke.

¹⁷Neno i hi amsimo hi UISNENO on hi Uisneno kun. Hi manta'en he nati' mituin In ma amtao mituin ale In lekat lulut ma In aplenat sin.

¹⁸Neno i UISNENO ansimo ki on In to kun, onle In anba'an nalali neu ki, ma In anlenu ki he amtao mituin In aplenat.

¹⁹UISNENO of anmo'e ki he amnesin ale uf-uf bian le In anmo'e nalali sin, ma of sin anpules ki ma antola ki. Hi amfani hi UISNENO In to onle In anba'an nalali.”