Read Uab Meto ULANGAN 27 Bible Online

ULANGAN 27 - Uab Meto bible

ULANGAN 27

¹Nalali te nok ale mnasi-mnasi Israel, Nai Musa natiaba a'an i neu to nane nak, “Mituin ale plenat le au fe ulali neu ki anbi neno i.

²Anbi neno hi amlak Noe Yordan he amtam meu pah le hi UISNENO anfe neu ki, hi mes mihakeb fatu naek fauk-fauk oke te amlape meki ao.

³Amtui neu fatu-fatu nane ale a'an na'ko plenat-plenat i. Leka hi amtam milali meu pah amu'it ma alekot le UISNENO anba'an neu ki Uisneno hi be'i hi na'i sin,

⁴ma leka hi amlak milali Noe Yordan, hi mes amnao meu Tubu Ebal. Anbi nane hi mes mihakeb ma amlape fatu-fatu nane meki ao onle au uplenat ulali neu ki anbi neno i.

⁵Anbi bale nane amsa hi mes mihakeb neu hi UISNENO baki tulu mese na'ko fatu-fatu le fe kan mepu fa sin neki mepu besi,

⁶natuin ale baki tulu le hi mihakeb neu hi UISNENO mes anmo'e na'ko fatu le ateme. Anbi baki tulu nane in fafon hi mes mitulu fua tulu mnotu.

⁷Ma hi mitulu nai amsa fua tulu halan nekaf ma miah nai ambi nane ma mimlil ma mimoke nai anbi hi UISNENO In human ma In matan.

⁸Anbi fatu-fatu nane fafon le hi amlape sin meki ao nane mes hi amtui nok aknino ale a'an na'ko plenat-plenat Uisneno.”

⁹Nalali te Nai Musa nok ale Ana' fuat knino Nai Lewi, nak neu ale to Israel nak, “Au bia ki ok-oke, mitena ma amnen nai! Neno i hi amfani milali UISNENO In to.

¹⁰Es nane te hi amnen ma mituin hi UISNENO ma amtao ma anmo'e ale In aplenat sin le au fe ulali sin neu ki anbi neno i.”

¹¹Oke te Nai Musa nak neu to Israel nak,

¹²“Leka hi amlak milali Noe Yordan, uf Nai Simeon, Nai Lewi, Nai Yehuda, Nai Isakhar, Nai Yusuf ma Nai Benyamin mes sin anhake anbi Tubu Gerizim tunan anbi tabu antek tetus ma athoen neno neu to i.

¹³Anbi tabu antek kasat, uf Nai Ruben, Nai Gad, Nai Asyer, Nai Zebulon, Nai Dan ma Naftali mes sin anhake anbi Tubu Ebal tunan.

¹⁴Atoni-atoni Lewi mes antek a'an le i nok hanan le na'aik ma atoni Israel mes natae nak, ‘Amin’.

¹⁵Atoni-atoni Lewi: ‘Kasat neu atoni le antao ma anmo'e le'u mahuma na'ko fatu ai hau, ai noni molo, ma naluli nabes neune nok atol-tolo'; UISNENO kan lomi fa luli besa neu uisneno teta!’ Ma to ok-oke natae nak: ‘Amin!’

¹⁶‘Kasat neu atoni le ka namtausan fa in amaf ma in ainaf ma nafetin anpolin sin.’ ‘Amin!’

¹⁷‘Kasat neu atoni le natnanib in aon bian lene nakat.’ ‘Amin!’

¹⁸‘Kasat neu atoni le nasekeb atoni mat folo.’ ‘Amin!’

¹⁹‘Kasat neu atoni le nasik atoni anao amnemat in sa'-sa', li'anmanat ma bife banu.’ ‘Amin!’

²⁰‘Kasat neu atoni le nasi'ut in amaf natuin antup nabua nok fenai mese na'ko in amaf.’ ‘Amin!’

²¹‘Kasat neu atoni le antup nabua nok mu'it.’ ‘Amin!’

²²‘Kasat neu atoni le antup nabua nok in fetof honi, ai nok in fetof le sin amaf mese ai ainaf mese.’ ‘Amin!’

²³‘Kasat neu atoni le antup nabua nok in ain babaf.’ ‘Amin!’

²⁴‘Kasat neu atoni le namate atoni nok atol-tolo.’ ‘Amin!’

²⁵‘Kasat neu atoni le ansimo noni mate he namate atoni le ka nasanab fa.’ ‘Amin!’

²⁶‘Kasat neu atoni le ka nanokab fa plenat ma noina Uisneno nok taos mo'et.’ ‘Amin!’ ”