Read Uab Meto ULANGAN 28 Bible Online

ULANGAN 28 - Uab Meto bible

ULANGAN 28

¹“Leka hi mituin hi UISNENO ma hi mi'ki amtao mituin ale In aplenat sin le au fe neu ki anbi neno i, In mes anmo'e ki amfani uf le mateka anfun ma natef pah pinan.

²Mituin hi UISNENO nai, onane te ale tetus i ok-oke of anfe nani neu ki:

³Tetus ma athoen neno neu hi kot-kot sin ma ale hi lene-lene sin.

⁴Tetus ma athoen neno neu ki, talantia hi anah-anah sin namfau, hi pah in afan natsaku ma hi bijae ma hi bibi kase ansato ma namfau naek.

⁵Tetus ma athoen neno neu hi sekit ma mnonut ma mnahat le hi anmo'e na'ko ane kase nane.

⁶Tetus ma athoen neno neu hi mepu ma hi mnamit.

⁷Leka es hen laban ki, UISNENO of nis ma anbe'u hi musu. Sin mes anlaban ki nok lek-leko, mes sin of naen ansiksan'ok.

⁸Hi UISNENO of anfe tetus ma athoen neno neu hi mepu ma hi mnamit ma nahenu ale hi lopo-lopo sin nok ane kase. In of anfe tetus ma athoen neno neu ki anbi pah le of In anfe neu ki.

⁹Leka hi mituin hi UISNENO ma amtao mituin ale In aplenat sin hi of In anmo'e ki amfani on In to kun, onle In anba'an nalali.

¹⁰Ale uf anbi pah pinan of sin nit nak hi to mabeti UISNENO, ma sin of namtausan ki.

¹¹UISNENO of anfe neu ki anah namfau. Hi mu'it of namfau ma hi pah in afan of natsaku anbi pah le UISNENO anba'an nalali neu hi be'i hi na'i sin neu hen fe neu ki.

¹²UISNENO of nasanut ulan anbi in tabu na'ko In bale bela le nathoe anbi neno tunan. In of anfe tetus ma athoen neno neu ale hi mepu ma hi mnamit, talantia nabe'i hi anfe amlapat neu uf-uf namfau, mes hi es of kan fe lapat ki fa.

¹³Hi UISNENO of anmo'e ki amfani nakaf neu uf-uf, ma ka atuin fa na'ko kotin. Leka hi mi'ki ma mituin UISNENO In aplenat sin le au fe neu ki anbi neno i, hi of mileko piut ma of hi ka miskotu mit fa.

¹⁴Mes ka nabe'i fa hi misaitan ale plenat-plenat nane he nok lanan sa' amsa sa' ka. Hi kais miluli mibes ma am aetnom meu ale uisneno teta bian.”

¹⁵“Mes leka hi ka mituin fa hi UISNENO, ma ka mi'ki fa he minaoba ale In aplenat sin ma In lekat lulut sin le au fe neu ki anbi neno i, onane te ale kasat le i of ansanu nem neu ki:

¹⁶Kasat neu ale hi kot-kot sin ma hi lene-lene sin.

¹⁷Kasat neu hi mnonut ane kase ma mnahat ale hi anmo'e na'ko ane kase.

¹⁸Kasat neu ki, talantia hi anah sin ka namfau fa, hi pah ka maafa fa, ma hi bijae ma hi bibi ma hi bibi kase sin kan namfau fa.

¹⁹Kasat neu ale hi mepu ma hi mnamit sin.

²⁰Leka hi mo'e amle'ut ma him tite UISNENO, In of nasanut nem neu ki amle'ut ma nale'un nani ki ok-oke, anbi ale hi moet sin, of anbi tabu tule es.

²¹Menas neu menas of ansanu nem neu ki, talantia namuni te katit fa es amsa na'ko ki le he nabala anbi pah le hi mitua nane.

²²UISNENO of ankas ki neki menas-menas le natlak, fu'un ma mu'an ma men mainikin. In of nasanut nem neu ki maputu ma anin ma manas maputu talantia hi pah in afan namle'u. Amle'ut-amle'ut nane of nem neu ki talantia of hi mimle'u.

²³Ulan of kan sanu fa ma hi pah of manu on besi.

²⁴UISNENO of ka nasanut fa ulan neu ki, mes anfe neu ki ulan afu skuku ma asnaen talantia hi mimle'u mani oke.

²⁵Leka hi ka mituin fa hi UISNENO, In of anmo'e ki talantia hi musu-musu sin nis ma anbe'u ki. Hi of minaoba makenat nok alekot, mes hi of maen misan'om. Ale uf anbi pah pinan of sin namtau leka sin nit hi susal mafena.

²⁶Leka hi amate, hi aom nitu anfani mnahat neu kolo-kolo sin ma mu'it abulalut, ma katit fa esle' hen li'u mu'it-mu'it nane.

²⁷UISNENO of ankas ki neki fu'un ma mu'an onle In antao ma anmo'e neu atoni Mesir. Hi aom of nahenu nok nu'e, papa' ma hune le mahata, mes kan mu'i fa in le'u.

²⁸UISNENO of anmo'e ki amfani amaunut, matfolo ma nek amnekut.

²⁹Anbi manas namtetu hi of amnao mibleleo onle atoni matfolo, mes hi ka mipeni fa lanan. Ale hi mepu ma hi banit of ka maupa fa. Hi mes nameku ki piut-piut ma nasik ki piut, ma katit fa esle' hen bab ki.

³⁰Leka hi ka mituin fa hi UISNENO, ale lasi-lasi i of ansanu nem neu ki: Hi of amafutu nekaf mok li'feto mese ma atoni teta es of anmafe nok li'feto le hi mafutu nekaf mokan. Hi of mihakeb ume, mes hi of ka mitua mani fa. Hi of amsen tua min kase mes hi of ka miah fa in fuan sin.

³¹Hi bijae sin of anlolo sin anbi hi matam, mes hi of ka miah fa in sisi. Hi bikase luke mnanu sin of anpo'o sin ma neki sin anao ma of hi amkiso misain sin ma of kan fe nafani fa sin neu ki. Ale hi bibi kase of anfe nani sin neu hi musu-musu sin ma katit fa esle' hen bab ki.

³²Anbi hi matmen ale hi anah sin of anfe sin onle ate neu atoni anao amnemat. Neno-neno hi matmen of namenan natuin hi mami hi anah sin, mes hi haet nane luman kun, natuin sin of kan fani neman fa.

³³Uf anao amnemat of naiti ale hi pah in afan le hi mipeni nok mepu mafena, mes hi ka mipeni fa sa'-sa' al nameku ki piut-piut nok taos mo'et amle'ut.

³⁴Hi of amfani atoni amaunut natuin sa' le hi mitef mokan.

³⁵UISNENO of anmo'e hi haemen nahenu nok nu'e ma papa' le namen ma ka naleko fa; na'ko hi haem talantia hi anakam of nahenu nok fu'un ma mu'an.

³⁶UISNENO of neki ki mok hi kesel amnao meu pah ateta le hi ka mihin mani fa ma le hi be'i hi na'i ka nahin nani fa amsa. Anbi nane of hi am aetnom meu uisneno teta le anmo'e na'ko hau ma fatu.

³⁷Anbi pah-pah le UISNENO nasiteb ma nasana ki, ale atoni of namtausan ki leka sin nit ki; of sin naakan ki ma anmanis ki.

³⁸Fini namfau le hi amkaki ma amkifu, mes in afan le hi am abul nane an-ana kun, natuin afokat ma alamat neku nani hi luet.

³⁹Hi of amsen ale hi lene tua min kase ma hi ampanat ma ampaloli, mes of kam seu fa tua min kase in fuan ai hi minu tua min kase in oen, natuin kauna neku nani tua min kase in un sin.

⁴⁰Anbi hi pah nanan ok-oke hau bub fua mina anmoni, mes sin fuan of ankolu ma anka'un, talantia hi ka mipeni fa in mina.

⁴¹Hi of mipeni anmone ma anfeto, mes of naiti sin onle atoni le anheke nan sin anbi makenat, talantia hi mineku sin.

⁴²Ale hau ma hi luet of kiba, fokat, lamat ma bian anteni of neku nani sin ok-oke.

⁴³Atoni anao amnemat le natua anbi hi pah sin kuasat of ansae piut, mes hi kuasat of ansanu piut.

⁴⁴Sin anmu'i noni namfau ma of anfe anlapat neu ki, mes hi ka mu'i fa sa'-sa' neu he amfe neu sin. Ma namuni te sin of naplenat ki.

⁴⁵Ale lasi amle'ut nane of anbol nem neu ki ma na'aunu ki talantia hi mimle'u, natuin hi ka mituin fa hi UISNENO ma hi kam tao ma anmo'e fa ale In aplenat le In anfe nalali neu ki.

⁴⁶Ale lasi amle'ut nane anfani on ataka na'ko kasat UISNENO neu ki ma hi anah sin talantia nabal.

⁴⁷UISNENO anfe nalali neu ki tetus ma athoen neno anbi ale lasi, mes hi kam aetnom fa neu In nok nek amneot ma amlilat.

⁴⁸Es nane te hi mes am aetnom meu ale musu-musu le UISNENO ansonu sin neu hen laban ki. Hi of mimnah, ameno ma monas ki ma amlabu bi ale lasi. UISNENO of nameku ki nok matani talantia hi mimle'u.

⁴⁹Uf mese le hi ka mihin fa in uab UISNENO of ansonu nem neu ki na'ko pah pinan tu'an neu hen laban ki. On kol teme sin of anpas ma anheke ki.

⁵⁰Sin atoni amaunu ma kan mu'i fa manekat neu ale atoni mnasi ai neu ale li'ana.

⁵¹Sin of nalali hi mu'it ma hi pah in afan, ma ka namaika ki fa hi ane kase talantia of hi amate natuin amnahas.

⁵²Sin of anken nape' hi kot mese-mese anbi pah le hi UISNENO le anfe nalali neu ki talantia ale hi baki lape sin le namnanu ma le hi mihelan ma le hi mifnekan nane of natkua ma anmofu.

⁵³Ma leka fe hi musu-musu sin anfun natef nan hi kot-kot sin, hi ka mu'i amteni fa afnekan natuin amnahas, talantia hi miah ma meku mani hi anah sin, anah-anah le hi UISNENO anfe nalali neu ki on halinat knino.

⁵⁴Fun atoni amnanut le nek alekot abainesit of in kan mu'i anteni fa nek afnekan leka musu fe anfun natef nan kot nane, talantia in nah ma neku kun in anah-anah sin fun katit fa amnahat bian anteni. An-ana mese amsa in kan fe nani fa neu in biaf ai neu fenai le in nek nani ai neu in anah sin bian le fe anmoni.

⁵⁵

⁵⁶Ma fun bife amnanut le nek alekot abainesit ma le amu'it abainesit talantia in fe ka nao hae nit fa, of in anmo'e onane amsa. Anbi tabu musu fe anfun natef nan kot nane, bife nane in nekan afnekan namneku natuin amnahas talantia nok atol-tolo' in nah ma neku in anah le nahonis nok li'ana olin na'ko in apun. An-ana mese amsa in kan fe nani fa neu in mone le in nek nani ai neu in anah-anah bian le fe anmoni.

⁵⁷

⁵⁸Leka hi ka mituin fa nok aki'at ale aplenat na'ko hi UISNENO le antui nani anbi sulat i ma hi kam tola fa hi UISNENO apinat ma maskeke.

⁵⁹UISNENO of anfe nem neu ki ma hi anah sin menas-menas le of ka naleko nit fa ma menas-menas amle'ut le of ka nasnas nahin fa.

⁶⁰Menas-menas le neki amtaus neu ki le hi mit anbi Mesir of ansanu nem neu ki ma of hi ka mileko fa.

⁶¹UISNENO amsa of nasanut nem neu ki menas huma-huma ma menas le le'uf kun le kan tek nani fa anbi sulat i in nanan, sulat plenat UISNENO. Oke te UISNENO of nale'un ki.

⁶²Maski hi amfaumen onle afkun anbi neno tunan, al fua faukah anbi ki le of anmoni, natuin hi ka mituin fa hi UISNENO.

⁶³Onle UISNENO anmalin ma anfe alekot neu ki ma ansato ki hi amfaumen, In of anmalin he nale'un ki ma naneku ki. In of anbok ki na'ko pah le of ka lo fa anteni hi mitua mani.

⁶⁴UISNENO of nasiteb ma nasana ki anbi uf-uf anbi pah pinan i ok-oke. Anbi nane hi of miluli ma mibes neu ale uisneno teta le an mo'e nani na'ko han ma fatu le hi ka mihin mani fa ma hi anah sin amsa ka nahin nani fa.

⁶⁵Anbi uf-uf nane hi of ka mipeni fa tainine, ma kan mu'i fa bale le nabe'i hi amtek mak hi ini; UISNENO of anmo'e ki mimtau ma hi nekam afnekan namneku ma kan mu'i fa apanet ma afnekan.

⁶⁶Lasi amle'ut of nateku ki piut anbi hi monim. Manas ma fai of hi mimtau piut natuin lasi maten.

⁶⁷Leka hi mit sa' es hi ansaom ansae ma ansanu natuin hi mimtau. Nok-noka hi of mipane ma mifnek mak so leko anfani kun nai, ma anbi fai of hi mipane ma minek mak so leko anmeusab kun nai.

⁶⁸UISNENO of ansonu anfani ki neu Mesir nok abnao, maski In nakua nalali In a'an nak hi of ka nabe'i fa he amfani amteni meu Mesir. Anbi nane of hi mihelnom he misosa hi aom on ate neu hi musu, mes katit fa es amsa le anlomi hen sos nan ki.”