Read Uab Meto ULANGAN 29 Bible Online

ULANGAN 29 - Uab Meto bible

ULANGAN 29

¹I a'an lasi manba'an le natuin plenat UISNENO Nai Musa antao ma anmo'e nok nonot Israel anbi pah Moab. Lasi manba'an nane on ansato neu manba'an le UISNENO antao ma anmo'e nok sin anbi Tubu Sinai.

²Nai Musa anlenu atoni Israel sin nabua, oke te in nak neu sin nak, “Hi mit milali sa' le UISNENO anmo'e neu Kesel Mesir, neu ale in ana' aplenat sin ma neu in pah ok-oke.

³Hi mit milali amsa ale amle'ut-amle'ut le matain le'uf, ale lasi ataka ma ale lasi sanmakat le UISNENO anmo'e.

⁴Mes antia neno i In fe ka nafetin ki fa he nati' hi mihin ale lasi le hi mieku ma mitef mokan.

⁵Ton bo'ha a'lon UISNENO In ana' ma antopu ki hi amnao mok mnela asnaen, maski onane hi bale pake ma hi peni haef ka namle'u fa.

⁶Hi ka mu'i fa utunu' he hi miah, tua mina mtasa ai mninut maputu bian, mes UISNENO anfe neu ki ale sa' le hi amlomi he nati' hi mihin nak In kun hi UISNENO.

⁷Ma leka hit atam atbi bale i, Kesel Nai Sihon na'ko Hesybon ma Kesel Nai Og na'ko Basan sin nem ma anmaken nok kit. Mes hit tis ma tbe'u sin.

⁸Hit tasik tan sin pah ma hit atbati neu uf Nai Ruben, Nai Gad ma uf Manasye aon bian.

⁹Es nane te so nati' hi mi'ki ma mituin ale lasi manba'an i ok-oke he nati' hi mipeni alekot anbi ale hi mepu ma hi mnamit.

¹⁰Neno i hi al-al ki amhake ambi hi UISNENO In human In matan, ale hi nakaf, mnasi, to meo nakaf, atoni,

¹¹bife, ale hi anah sin, atoni anao amnemat le sin natua anbi hi atnanam ma anbab ki anpolo ma anloi ki oe.

¹²Hi UISNENO anmo'e lasi manba'an nok ki, ma hi al-al ki mibua ambi i neu he amfutu lasi manba'an nane amsimo In lasi sutais sin.

¹³Nok lasi manba'an nane UISNENO anbi neno i nahakeb ki amfani In to, ma In anfani hi Uisneno onle In anba'an nalali neu ki ma neu hi be'i hi na'i Nai Abraham, Nai Ishak ma Nai Yakub.

¹⁴Lasi manba'an nane nok ale in lasi sutais UISNENO anmo'e nalali ka al fa neu hi ames,

¹⁵mes nok ale atoni mese-mese le neno i anhake anbi i, anbi hi UISNENO In human In matan, ma nok sanut mofut sin anbi tabu amnemat.”

¹⁶“Hi fe mimnau neu onme hit amonik anbi Mesir ma neu onme hit atnao tatuin pah uf-uf bian.

¹⁷Hi mit milali sin le'u mahuma le neki mainisit na'ko hau, fatu, noni muti ma noni mnatu.

¹⁸Es nane te ampanat nai he nati' kais es na'ko ki amsa, he atoni ka ai he bife ka, ai na'ko hi ume nanan ka ai le anhake anbi i, le in nekan naklelo ankoti hi UISNENO neu he naluli nabes neu ale uisneno teta uf bian. Taos mo'et onane onle hau ba'at le anmoni ma anfani laso le menu ma namafun.

¹⁹Anbi ki le hi amnen lekat lulut le matani nane kaisa anmu'i le natenab nak in monin of naleko piut, maski in nahelnon he natuin kun in lanan anmes. Lasi nane of nale'un ki ok-oke, atoni-atoni amle'ut ma atoni-atoni alekot.

²⁰UISNENO of kan sako fa sanat onle nane. Mes, in of napeni to'as UISNENO le anpin-pin ma ale amle'ut le matui anbi sulat i in nanan of anbol nem neu Sin, talantia UISNENO nale'un Sin.

²¹UISNENO of anmo'e in anfani leta mese neu uf Israel ok-oke, ma ankas in neki kasat le antek anbi lasi manba'an le matui anbi sulat i in nanan, sulat Plenat UISNENO.

²²Anbi neno namuni te, hi sufam ma atoni anao amnemat na'ko pah a'lot of sin nit ale amle'ut-amle'ut nane ma lasi hamu'it le UISNENO nasanut nem neu hi pah.

²³Ale hi lene sin of anfani pah hu mone le ankub nani neki upat ma masi. In nain ka masena fa ma hun ma naba kan moni fa anbi nane. Hi pah of papmese on kot-kot Sodom ma Gomora, Adma ma Zeboim le UISNENO nale'un nalali leka In to'as anpin-pin anfin.

²⁴Ma pah pinan ok-oke mes natoti nak, ‘Nansa UISNENO anmo'e onane neu sin pah? Nansa talantia In nato' anae le'uf onane?’

²⁵Ma in han taes esle', ‘Natuin sin nasaitan fef bela UISNENO, sin be'i ma sin na'i; fef bela le In anmo'e nok sin anbi tabu In neki sin anpoi na'ko Mesir.

²⁶Sin an aetnon neu ale uisneno teta le sin ka nahine fa, le UISNENO nakain sin naluli nabes neu ale uisneno teta.

²⁷Es nane te UISNENO nato'an In nonot ma nasanut nem neu sin pah ale amle'ut le matui anbi sulat i in nanan.

²⁸UISNENO In to'as In anpe' nok matani, ma anbi to'as nanan le anaek nane In anbok Israel na'ko sin pah ma anpolin sin neu pah ateta mese talantia sin natua anbi nane.’

²⁹Anmu'i lasi fauk-fauk le UISNENO hit Abal- balat natolo' nani; mes In kasat nane In naton nalali neu kit, ma hit tok hit sufa ka'uf sin mes tatuin tani talantia nabal-bal.”