Read Uab Meto ULANGAN 30 Bible Online

ULANGAN 30 - Uab Meto bible

ULANGAN 30

¹“Tabu i nabe'i hi ambeti he tetus ka ai he kasat ka onle au uton ulali neu ki. Leka hi mitef milali mok ale mafena nane ma amoni ambi uf ateta bale le hi UISNENO nasiteb ma nasana ki, hi of mimnau neu lasi betis le au fe ani neu ki.

²Leka hi ma hi sufam sin anlomi he anfani neu UISNENO, ma nok hi nekam ok-oke hi mituin In aplenat sin le au fe ani neu ki anbi neno i,

³onane te hi UISNENO of In nek ma namnau ki. In of neki ki amfani aim mi'ko ale uf-uf le In nasiteb ma nasana ki anbine, ma of anmo'e ki hi amoni nok alekot anfani.

⁴Maski hi misan'om ambi me-me anbi pah pinan ok-oke, hi UISNENO of In nibun nabuab ki ma neki ki amfani.

⁵Ma nabe'i hi mipeni mifani hi pah anteni le afi ahunut hi be'i hi na'i sin natua nani. Ma In of anmo'e ki amoni mileko nesi anteni, ma hi amfaumen anae le'uf nesin na'ko hi be'i hi na'i sin.

⁶Hi ma hi sufam of anfe neu sin nekaf le anlomi he natuin, talantia hi amnek hi UISNENO nok hi nekam ok-oke ma nabe'i hi mitua piut anbi pah nane.

⁷Ale kasat nane In of nasanut neu hi musu-musu sin le kan lomi ki fa ma nameku ki.

⁸Hi of mituin mifani UISNENO ma minaoba ale In aplenat le au fe neu ki anbi neno i.

⁹Hi UISNENO of anmo'e ale hi mepu sin neki alekot neu ki, of hi mu'i anah namfau ma hi mu'it of ansae, ale hi lene sin of napoitan afan nathoe neu ki. UISNENO nok amlilat anmo'e ki amfani alekot, onle In anmalin amsa anfe alekot neu hi be'i hi na'i sin.

¹⁰Mes hi of he mituin hi UISNENO ma anmo'e mituin ale In aplenat le matui anbi sulat i in nanan, sulat Plenat UISNENO. Hi mes he mili'om amfani meu In nok hi nekam ok-oke.

¹¹Plenat le au fe neu ki ka mafen le'uf fa neu ki ma ka mnanu fa ma ka lo le'uf fa neu ki.

¹²In balan ka es fa neno tunan, talantia hi mitoti mak, ‘Sekau ka hen sae neu neno tunan he naiti neki nem neu kit, he nati' nabe'i hit atnen ma tatuin tani ka?’

¹³In balan amsa ka es fa tasi bian, talantia hi mitoti mak, ‘Sekau ka es of hen lak neu tasi bian he neki nem neu kit, he nati' nabe'i hit atnen ma tatuin tani ka?’

¹⁴Kais hi mitoti onane, natuin aplenat nane anhaumak nis nok ki. Hi mihin milali ma nabe'i hi amtek on oe ansai, al he mitis ma minokab mani.

¹⁵Neno i nabe'i hi ambeti nai he alekot ka ai amle'ut ka, he amonit ka ai he maten ka.

¹⁶Neno i au fe plenat neu ki he nati' hi amnek mimnau hi UISNENO ma amnen ma mituin In ma amtao mituin ale In lekat lulut ma In aplenat sin he nati' hi mipeni alekot ma amfani nonot le amnek. Hi UISNENO ma of anfe tetus ma athoen neno neu ki anbi pah le ka lo fa anteni hi mitua mani.

¹⁷Mes leka hi ka mituin fa ma kam lomi fa he amnen, ma hi mifetin hi aom he nasekeb ki he miluli mibes neu ale uisneno teta,

¹⁸mes nale'un ki, ma hi uam hi ton of ka namnanu fa anbi pah le ka lo fa anteni hi mitua mani. Mimnau nai! Lasi nane au uton ulali neu ki anbi neno i.

¹⁹Tabu i nabe'i hi ambeti nai he amonit ka ai he maten ka, he tetus UISNENO ka ai he In kasat ka. Neno tunan ma pah pinan au haman sin he sin anfani saksi neu ki neu hi lasi tfeka. Ambeti nai amonit.

²⁰Amnek mimnau hi UISNENO, mituin In nai, ma mi'ki nai meu In. Hi ma hi sufam sin of anmoni ma ua mnanu anbi pah le UISNENO anba'an nalali neu hi be'i hi na'i Nai Abraham, Nai Ishak ma Nai Yakub.”