Read Uab Meto ULANGAN 31 Bible Online

ULANGAN 31 - Uab Meto bible

ULANGAN 31

¹Nai Musa nauab anteni neu to Israel nak,

²“Anbi neno i au ton natun mese bo'nua ma au ka ube'i teni fa he fani atukus anonot neu ki. Anesi na'ko nane te UISNENO nakua nalali In a'an nak au ka nabe'i fa he lak Noe Yordan.

³Hi UISNENO In neknon kun of In anao nahunun ki ma nale'un nani ale uf-uf le natua anbi nane, talantia nabe'i hi mitua sin pah. Nai Yosua of anfani atukus anonot neu ki, onle UISNENO nakua nalali In a'an.

⁴UISNENO of nale'un uf-uf nane, onle In nis ma anbe'u Nai Sihon ma Nai Og, kesel atoni Amori, ma nape' naskuku sin pah.

⁵UISNENO of anfe neu ki lasi mnisat neu sin, oke te sin mes hi anmo'e sin matom nok sa' le au uton ulali neu ki.

⁶So nati' mihelan hi nekam nai, mibe'i ma matani nai! Kais mimtausan sin, natuin hi UISNENO In neknon kun of anbab ki. In of ka naoleb ki fa ma ka nasaitan ki fa.”

⁷Oke te Nai Musa anhaman Nai Yosua, ma anbi to Israel ok-oke sin human ma sin matan in nak neu in nak, “So nati' ho nekam nahel ma anmatani nai, Yosua! Ho es of amtopu nonot i hen toko pah le UISNENO anba'an nalali neu sin be'i sin na'i.

⁸UISNENO In neknon kun ana' ma antopu ko ma anbab ko. In of ka naoleb ko fa ai ka nasaitan ko fa. Es nane te kais mumtau ai am ole.”

⁹Oke te Nai Musa antui UISNENO In aplenat sin ma anfe nani neu ale Ana' fuat knino Nai Lewi le sin napeni mepu hen panat ma anpanote Peti Fef Bela, ma neu ale anakaf Israel.

¹⁰In anfe plenat neu sin nak, “Leka ton hitu namsopu, anbi ton sako tusa anbi Fesat La' Hau no',

¹¹hi mes amso'i ale plenat-plenat i nok hanaf naaik neu ale atoni-atoni Israel le nem naluli nabes neu hi UISNENO anbi bale le In anbeti nani.

¹²Amlenu ale atoni, bife ma ale li'ana ma atoni anao amnemat le natua anbi hi kot-kot sin anibun nabuaok he anen so'it plenat nane, he nati' sin nanoina naliatas hi UISNENO ma na'ki natuin In plenat-plenat sin.

¹³Nok lanan nane hi anah sin le fe ka nen fa hi UISNENO In aplenat nabe'i sin anen ma nanoina he naliatas UISNENO leka sin fe anmoni anbi pah le ka lo fa anteni hi mitua mani anbi Noe Yordan aon bian.”

¹⁴Nalali te UISNENO nakua a'an neu Nai Musa nak, “Ho monim ka lo fa anteni. Es nane te, hom haman Nai Yosua ma meki in nem neu Au Um-ume, he nati' Au fe neu in lekat lulut.” Ma Nai Musa ma Nai Yosua sin anao neu Um-ume UISNENO,

¹⁵ma UISNENO nalil'on neu sin anbi ni nope anhaumak Um-ume in eno.

¹⁶UISNENO nakua a'an neu Nai Musa nak, “Ho uam he namsopuen. Leka ho musaebom, to Israel of ka na'ki anteni fa neu Kau ma nasuan lasi manba'an le Au mo'e ulali ok sin. Sin of nasaitan Kau he naluli nabes neu ale uisneno teta le sin of naluli nabes anbi pah le ka lo fa anteni hi amtam meune.

¹⁷Leka lasi nane anbol, Au to'as nane of ansae anfin-fin neu sin. Au of usaitan sin ma ule'un sin. Lasi amle'ut mafena namfau of anbol nem neu sin, oke te of sin nahin nak ale lasi nane anbol natuin Au, sin Uisneno, Au ka ok fa sin.

¹⁸Anbi tabu nane Au ka lomi fa he tuntaku sin, natuin sin naluli nabes nalali neu ale uisneno teta ma sin anmo'e amle'ut.

¹⁹Tabu i amtui sit i ma munoina sin nai neu to Israel on saksit mese neu sin.

²⁰Au of eki sin neu pah amu'it ma alekot, onle Au ba'an ulali neu sin be'i sin na'i sin. Anbi nane sin mes anmoni nok amlilat ma napeni ale amnahat le sin anlomi. Mes namuni te sin of naklel'ok ma naluli nabes neu ale uisneno teta. Sin of antite Kau ma nasuan Au lasi manba'an,

²¹ma lasi amle'ut namfau of nem anbol neu sin. Mes sit i mes sin ansi piut ma anpake on saksit neu sin. Fun tabu i, fe Au ka eki fa sin neu pah le Au ba'an ulali, Au uhin ulali sin tenab sin ne'ob.”

²²Anbi neno nane amsa Nai Musa antui sit nane, oke te nanoina neu to Israel.

²³Namuni te UISNENO nakua a'an neu Nai Yosua, Nai Nun anmone, nak, “So nati' ho nekam nahel, ma anmatani, Yosua! Ho of amna' ma amtopu to Israel hem tam Neu pah le Au ba'an ani neu sin, ma Au of tuntaku sin.”

²⁴Oke te Nai Musa antui plenat Uisneno anbi sulat mese. In antui nok lek-leko na'ko a'at ahunut talantia a'at amsoput.

²⁵Leka in antui nalali te, in nak neu ale Ana' fuat knino Nai Lewi le ansimo mepu hen panat ma anpanote Peti Fef Bela, nak,

²⁶“Maiti nai sulat Plenat Uisneno le i, ma amtao anbi Peti Fef Bela hi UISNENO, he nati' in nabala nane piut on saksit mese neu to nane.

²⁷Au uhin sin anak fatu ma anlomi he anlaban. Leka fe au amoni amsa sin anlaban UISNENO; sa' anteni, leka au mate ulali!

²⁸Tabu i amlenu ale anakaf to ma ale to meo nakaf sin nabua anbi au humak au matak, he nati' au utiaba lasi-lasi i neu sin. Neno tunan ma pah pinan au haman sin anfani saksi neu sin.

²⁹Au uhin nak leka au mate ulali, atoni-atoni nane of anfani atoni amle'ut ma antite ale sa' le au unoina neu sin. Ma of amle'ut anbol nem neu sin, natuin sin anmo'e UISNENO nato' natuin sin anmo'e sa' le In nakain nani.”

³⁰Nalali te Nai Musa antek sit i talantia namsopu ma nonot Israel ok-oke sin anen ma natnin.