Read Uab Meto ULANGAN 32 Bible Online

ULANGAN 32 - Uab Meto bible

ULANGAN 32

¹“Amnen nai, hoi neno kuni peni, au lomi he u'uab ma umolok; hoi pah pinan musbini ho lukem nai!

²So nati' au noina ansanu on ulan, ma au u'uab a'at sin anloli fua mese-mese on pinis ma akum, on ul sabkani ansanu nem neu hun no mate, ma on ul sako ansanu nem neu luet ma mana'.

³Au of ampules uliatas UISNENO In kanan. Amsaksi ma miton nai hit Uisneno In apinat!

⁴UISNENO nane hi apesit le abe'it ma matani, In mepu namtis ma namno'u, ma ale In lanan sin namneo ma namnono. Hi Uisneno nane aki'at, lasi ka amneot kan mu'i fa anbi In, In antao ma anmo'e alekot ma amneot.

⁵Mes hi nane to le ka aki'at fa, ma ka nabe'i fa anteni he hi amfani In to, to le nahenu nok nekaf ka amneot ma sanat.

⁶Onle nane ka hi amseunbanin UISNENO In lasi alekot, hoi atoni-atoni amonot ma kan mu'i fa nekaf? Ait hi ka Ama fa, hi Apakaet, le anmo'e ki amfani uf mese?

⁷Mimnau nai afi neno ahunut, amkiso ton-ton batan-batan afinit. Mitoti nai neu hi mnasi sin, he nati' sin naton neu ki.

⁸Leka Amnanut Afin-finit anbati pah, uf mese-mese natetab nani in pah nok uisneno teta mese on in akuasat.

⁹Mes Nai Yakub in sufan le i UISNENO anbeti nani neu In aon anmes kun.

¹⁰In napeni sin leka sin fe anao neu me-me anbi pah luman anbi mnela snaen. Oke te In naneo ma nahafo sin ma anpanat sin on bale bela.

¹¹Onle kol teme le nanoina in ana' he naplel in anheke in ana' anbi in ninen le naufon ma in antuntaku in ana' anbi in ninen sin fafon,

¹²onane UISNENO neknon kun antopu In to, kan mu'i fa uisneno teta mese le nok in.

¹³In anmo'e sin naplenat ale tubu-tubu; sin nah ale lene-lene sin afan ma sin ninu oni hau fui na'ko tubu fatu. Sin napeni mina na'ko hau bub fua mina le anmoni anbi nain mafatu.

¹⁴Sin bijae, bibi ma bibi kase napoitan susu anaek; sin mu'it lo leok le'uf kun, sin ane kase ma sin tua mina mtasa lo leok le'uf anesi anteni kun.

¹⁵UISNENO In to anfani amu'it, mes anlomi hen malaban, sin anpok ana' le'uf kun, namsen nok amnahat. Oke te sin nasaitan Uisneno, sin Apakaet ma sin antite sin Afetin le abe'it.

¹⁶Sin naluli nabes neu uisneno teta, talantia UISNENO naktino sin, In to'as anfen natuin lasi amle'ut nane.

¹⁷Sin natulu fua tulu neu smanaf-smanaf amle'ut le ka Uisneno fa, neu ale uisneno teta le sin ka nahin nani fa, uisneno teta fe'u le sin amaf sin ka namtausan fa.

¹⁸Sin kan sian fa sin Afetin le abe'it sin anikan sin Uisneno le anfe amonit.

¹⁹Leka UISNENO nit lasi nane te, In nato', ma antite In anah-anah sin.

²⁰In nak, ‘Au ka lomi fa he tuntaku sin anteni; maut he Au kiso neu onme sin amsopun le nane. Natuin to nane anak fatu ma namneo-namneo ka na'ki fa.

²¹Sin anmo'e Kau uktino neu le' ka Uisneno fa, ma Au uto'an neu sin uisneno teta. Ma Au mo'e Au to naktino neu le' ka to, ma nato'an neu to amonot anesit.

²²Au to'as of anpin on ai le notu antia amates sin balan. Ai nane notu pah pinan ma ale in afan, ma tubu-tubu talantia in aba'an sin.

²³Au uf usanut nem neu sin amle'ut piut-piut, Au uklao sin eki Au as'anef ok-oke neu sin.

²⁴Sin of anmate natuin men mainikin ma lasi amnahas, ma natuin menas le neki hakataus. Au ufetin sin he mu'it abulalut anheke ma anpisu sin, ma kaun koko malaso ansau sin.

²⁵Lasi makenat neki maten anbi lanan-lanan; lasi hakataus anbol nem neu ale atoni anbi ume. Atoni munif ma li'feto munif mes nale'un sin, onane amsa li'ana susu ma atoni le namnasien.

²⁶Au lomi he uneku sin ok-oke, he nati' kais namnau anteni sin.

²⁷Mes Au ka lomi fa he Israel in musu sin nanaebon; kais-kaisa si nahin ansan ma sin nauab nak sin nis ma anbe'u Au to,’ mes Au es atao ma mo'e ani.

²⁸Israel nonot mese le kan mu'i fa nekaf antai lasi; ma katit fa lasi mahine anbi sin.

²⁹Bait leka sin nahin, sin of antai nahin lasi, ma sin natenab nahin sin neno amsopun.

³⁰Leka me atoni mese nabe'i anli'u atoni nifun mese, ma atoni nua nabe'i anmo'e atoni nifun bo'mese he sin naen? Sin UISNENO, nasosa nalali sin; Uisneno abe'it ma matani nasaitan nalali sin.

³¹Israel sin musu sin nahin nak sin aneot ahafot ka onfa aneot ahafot Uisneno Israel.

³²Natuin sin atoni amle'ut on atoni Sodom ma Gomora, on hau tua min kase le menu ma in fuan anmu'i laso.

³³Sin tua mina mtasa nane laso kaun koko malaso.

³⁴UISNENO namnau taos mo'et na'ko musu In to sin ma of ankas sin leka antia in tabu.

³⁵UISNENO of anseunbanin ma of ankas sin, ma ka lo fa anteni sin anmofu ma namle'u; neno sin he namle'u nem anhaumaken.

³⁶UISNENO of nafetin In to ma In nek namnau In ate-ate sin, leka In ankiso sin an ole ma anlimae ma sin be'in matanin namneku nalali.

³⁷UISNENO of natoti In to nak, ‘Es me ka uisneno teta abe'it le hi mipane ma mifnek neu sin?’

³⁸Sin nah baluf le hi mitulu ma mitnat, ma sin ninu tua mina mtasa le hi mitulu. Amlenu sin nem hen tuntaku ki, maut he nati' sin anfani aneot ahafot neu ki.

³⁹Amkiso nai, Au Uisneno Mese kun, katit fa Uisneno al Au. Au umate ma umonib, Au upapa' ma uleko. Leka Au unaoba Au plenat, katit fa es amsa he anlaban.

⁴⁰Natuin Au kun a'mes, Uisneno Amonit, Au aiti Au nimak ma Au sup:

⁴¹Au of uaikab Au suni le nalim-lim, ma Au unaoba lef lasi. Au seunbanin Au musu sin ma Au kas al sin le kan lomi Kau fa.

⁴²Ale Au as'anef sin of Au hut sin eki sin na'; ale alaban le anlaban Kau Au umate sin eki Au suni. Au ka ufetin fa es amsa he anlaban Kau; atoni le Au heke ansin ma le napapa' mes anmate amsa.

⁴³Hoi uf-uf, ampules nai UISNENO In to, natuin UISNENO ankas sin alsin le namate In to. In anseunbanin lasi nek nanaf neu In musu sin mes In ansako In to sin sanat.”

⁴⁴Nai Musa ma Nai Yosua Nai Nun anmone sin antek sit nane, talantia nonot Israel ok-oke sin anen ma natnin nani.

⁴⁵Leka Nai Musa natiaba nalali ale UISNENO In a'an neu nonot Israel,

⁴⁶Nai Musa nak, “Ampanat nai ale plenat le au fe ani neu ki anbi neno le i. Minoina hi anah sin nai, he nati' sin nok aki'at antao natuin ale plenat UISNENO.

⁴⁷Noina nane ka uab molok luman fa mes nane hi monim. Mituin ale plenat nane nai, he nati' hi ua mnanu ki anbi pah le ka lo fa anteni hi mitua mani anbi Noe Yordan aon bian.”

⁴⁸Anbi neno nane amsa UISNENO nakua a'an neu Nai Musa nak,

⁴⁹“Amnao nai meu Nuaf Abarim anbi pah Moab anbi kot Yerikho aon bian. Oke te amsae nai meu Tubu Nebo ma amkiso nai pah Kanaan le ka lo fa anteni Au una'at ani neu nonot Israel.

⁵⁰Ho of amate ambi tubu nane, on Nai Harun ho tataf anmate anbi Tubu Hor.

⁵¹Hi nua ki ka mi'ki fa nok aki'at neu Kau ma hi ka miliatas Kau fa anbi to Israel sin human sin matan anbi tabu hi ambi oe mata Meriba, anhaumak kot Kades, anbi mnela snaen Zin.

⁵²Es nane te ho ka nabe'i fa he amtam Neu pah le Au fe ani neu to Israel; ho al nabe'i amkiso na'ko lo.”