Read Uab Meto ULANGAN 33 Bible Online

ULANGAN 33 - Uab Meto bible

ULANGAN 33

¹Nahun na'ko fe ka nasaebon fa, Nai Musa, haef Uisneno, anfe tetus ma athoen neno neu nonot Israel nok uab a'at i:

²“UISNENO nem na'ko Tubu Sinai; In ansae on neno ansae antoman Edom ma In nem na'ko Tubu Paran ma In antana In to. In nem nok ahake neno tunan nifun bo'mese; ai anpin anbi In aon bian a'ne'u.

³Namneo, UISNENO In anek In to In naneo ma nahafo ale atoni le anfani In-ini. Aim he hit taluli tabes anbi In haen ma tatuin In plenat-plenat sin.

⁴Plenat le Nai Musa anfe neu kit hit tatuin, mu'if le maupa naek na'ko to i.

⁵Anbi tabu Israel sin nibun nabua nok ale sin anakaf sin, UISNENO anfani Kesel neu In to.”

⁶Antom uf Nai Ruben, Nai Musa nak, “So nati' uf Nai Ruben ka namle'u nit fa, maski sin atoni ka namfau fa.”

⁷Antom uf Yehuda in nak: “Koi UISNENO, amnen nai han sakoit Nai Yehuda; mumeseb sin anfani nok in nonot sin. Amaken amseka sin, koi UISNENO, so Ho ambab sin he nati' sin anlaban musu.”

⁸Antom uf Nai Lewi in nak: “Nok Urim ma Tumim Ho muton Ho lomim, nao nok atoni Lewi, Ho ate aki'at. Ho amsu' mulali sin anbi Masa, matoe ma amaban mok sin anbi oe mata Meriba.

⁹Sin na'ki neu Ko anesin ale sa'-sa', nesin sin amaf ma sin ainaf ma nesin sin biaf ma sin benuf. Sin natuin Ho plenat-plenat sin, Ho fef bela sin nanokab.

¹⁰Sin nanoina Ho to sin he natuin Ho plenat sin ma sin natulu fua tulu anbi Ho baki tulu in fafon.

¹¹Koi UISNENO, amtuntaku uf le i he nati' sin nabe'i ma anmateni, so nati' Ho amlomi sin mepu. Mule'un ale sin musu sin talantia sin ka nabe'i fa he anfen anteni.”

¹²Antom uf Nai Benyamin in nak: “Le i uf le UISNENO In anek nani, In naneo ma nahafo sin anbi manas ma fai nok ma In namaika anbi sin atnanan.”

¹³Antom Nai Yusuf in sufan in nak: “So nati' UISNENO anfe tetus neu sin pah neki ulan, ma nok oe na'ko pah pinan in nupun.

¹⁴So nati' ton masenu ma anmaseka nok haunu sin fuan fuan alekot le namnatu anbi in un.

¹⁵So nati' in nuaf-nuaf sin na'ko batan un-unu nahenu nok pah in afan le mabeti.

¹⁶So nati' in pah nathoe nok ale sa' le leok le'uf, ma natuin UISNENO In nek lomin In anfe tetus neune le nakua In a'an na'ko kislubu le anpin. So nati' tetus nane ansanu neu Nai Yusuf in sufan, natuin in anakaf neu in biaf in benuf sin.

¹⁷Nai Yusuf anmu'i be'it ma matani on bijae keso mese, ma in sunan lo bijae keso fui nane nifun-nifun Nai Manasye ma nifun natun Nai Efraim. In naut uf-uf sin ma in anbe'u sin talantia pah pinan in tu'an.”

¹⁸Antom uf-uf Nai Zebulon ma Nai Isakhar in nak: “So nati' Nai Zebulon napeni alekot natuin in anpoi ma anao naoni, ma Nai Isakhar napeni halinat anbi in um-ume sin.

¹⁹Sin anhone ale uf-uf neu sin tubu sin ma natulu fua tulu amneot anbi nane. Sin napeni mu'if na'ko tasi, ma na'ko snaen anbi tasi ninen.”

²⁰Antom uf Nai Gad in nak: “Pules ma liatas neu Uisneno le anmenuab Nai Gad in pah. Nai Gad anhat ma anpao on meo asu mese hen pisu nimaf ai he pasu anbi anakan.

²¹Pah alekot abainesit in naiti neu in aon kun ma nana'at lasi plenat neu sin. Sin antao natuin UISNENO In aplenat ma In lekat lulut sin leka ale anakaf Israel sin al-al sin nibun nabuabon.”

²²Antom uf Nai Dan in nak: “Nai Dan onle meo asu tipu le an ele anpoi na'ko Basan.”

²³Antom uf Naftali in nak: “UISNENO In tetus ma In athoen neno ma In manekan nathoe neu Naftali; in pah na'ko Nifu Galilea talantia bian a'ne'u.”

²⁴Antom uf Nai Asyer in nak: “Tetus ma athoen neno neu Asyer anesi na'ko uf-uf bian sin; so nati' in biafen anfani anek namnau in, ma hau bub fua mina anmoni namlia anbi in pah.

²⁵So nati' ale eno-eno naek niti molo ma besi nanini ma natau in kot-kot sin he nati' sin anmoni ka namtau fa ma sin antainine.”

²⁶“Hoi Israel! Katit fa uisneno teta on hi Uisneno; In ansae anfini neno kuni peni nok amnisat ma In nape' nope ma anpoi neu he antuntaku ki.

²⁷Uisneno lo In anfani aninit neu ki, In nukun abal-balat antuntaku ki. In anli'u musu na'ko hi humam ma hi matam ma anlenu ki he mile'un sin.

²⁸Onane te Nai Yakub in sufan of anmoni nok tainine anbi pah le ane kase ma tua mina mtasa nathoe anbine, ma le anpofi neki pinis ma akum na'ko neno kuni peni.

²⁹Ua alekot neu ko, hoi Israel! Katit fa uf mese onle ho le UISNENO nafetin ko. UISNENO onle suni ma ben besi tika neu ko; he nati' anpesi ko ma anfe mnisat neu ko. Ho musu-musu sin of sin nem neu ko ma antoti he nati' ho amnek mumnau sin, ma ho of amhali muklati sin.”