Read Uab Meto ULANGAN 34 Bible Online

ULANGAN 34 - Uab Meto bible

ULANGAN 34

¹Oke te Nai Musa nasaitan mnela Moab ma ansae neu Tubu Nebo, anao neu Pisga in tunan anbi Yerikho in aon bian neno saen. Anbi nane UISNENO nalile neu in pah nane ok-oke, esle': Pah Gilead anao neu bian a'li talantia kot Dan;

²pah Naftali ok-oke; pah Efraim ma Manasye, pah Yehuda anao neu neno tesan talantia Tasi Tnana;

³Yehuda aon bian a'ne'u ma mnela na'ko Zoar anao neu Yerikho, kot le nahenu nok bone kase.

⁴Oke te UISNENO nakua a'an neu Nai Musa nak, “Nane pah le Au manba'an ani neu Nai Abraham, Nai Ishak ma Nai Yakub he nati' nana'at nani neu sin sufan. Au ulile ani neu ko, Musa, mes Au ka ufetin ko fa he ho amnao ambi nane.”

⁵Oke te Nai Musa UISNENO In ate anmate anbi pah Moab, onle afi UISNENO naton nalali neune.

⁶UISNENO ansub in anbi nonof mese anbi Moab anbi kot Bet-Peor aon bian, mes antia neno le i katit fa es amsa he nahin in naukel.

⁷Nai Musa leka in anmate in uan ton natun mese bo'nua. In be'in matanin kan sanu fa ma in ankisot fe naknino.

⁸Ma nonot Israel sin ankae ma ankul neu Nai Musa anbi mnela Moab neno bo'ha am tenu in a'lon.

⁹UISNENO anfe athoen neno neu Nai Yosua Nai Nun anmone lasi mahine natuin Nai Musa anlek nalali he anseka in. Nonot Israel sin anen ma natuin Nai Yosua ma nanaoba ale plenat le UISNENO anfe nalali neu sin nao nok Nai Musa.

¹⁰Anbi Israel katit fa anteni mafefa knino onle Nai Musa le namolok humaf nok humaf nok UISNENO.

¹¹Katit fa es amsa le he antao ma anmo'e ale lasi ataka ma ale lasi sanmakat onle Nai Musa antao ma anmo'e neu pah Mesir, in kesel ma ale in ana' plenat sin anmatom nok UISNENO In aplenat.

¹²Katit fa esle' he antao ma anmo'e taos mo'et le matani ma neki lasi amtaus onle Nai Musa antao ma anmo'e anbi nonot Israel sin human sin matan ok-oke.