Read Uab Meto ULANGAN 4 Bible Online

ULANGAN 4 - Uab Meto bible

ULANGAN 4

¹Oke te Nai Musa nak neu nonot nane nak, “Mituin nai ale aplenat le au unoina neu ki, he nati' nabe'i hi moni talantia mitua pah le hi naif sin UISNENO le of anfe neu ki.

²Sa' le au uplenat ani, kais amsato ai mipalan an-an es amsa. Mituin nai hi UISNENO In aplenat sin le au fe ani sin neu ki.

³Hi mit milali kim ale sa' le hi UISNENO anmo'e anbi Tubu Peor. Sekau ma sekau le nausi neu Baal anbi bale nane In nale'un nani sin,

⁴mes hi le mi'ki mibala neu hi UISNENO fe hi moni mibala talantia neno le i.

⁵Ale plenat nane au unoina ani neu ki onle au UISNENO naplenat nani neu kau. Mituin nai ale nane ok-oke anbi pah le of hi amtam meune ma mitua ambine.

⁶Amtao ma anmo'e mani ale nane ok-oke nok aki'at. Kalu hi anmo'e onane, onane te hi mahinem nane anfani etus ma tonas neu uf-uf nane. Leka sin nen neu plenat-plenat nane, sin of nak, ‘Namneo uf anaek nane lo ahinet ma akeot kun!’

⁷Uf anaek me ka le anmu'i uisneno le anhaumak nis onle nane talantia leka hit atoti onle hit UISNENO le anhaumak nok kit? In natae leka hit atsakoi atoti tuntakus na'ko In.

⁸Ma uf anaek me ka le anmu'i plenat-plenat amneot onle plenat-plenat le au unoina neu ki anbi neno i?

⁹Ampanat ma mimnau nai lek-leko, he nati' anbi hi monim ok-oke hi kam nikan fa sa' le him saksi milali. Minu'un neu hi anah ma hi upuf sin

¹⁰neu neno nane, leka hi amhake anbi hi UISNENO In human In matan anbi Tubu Sinai. Anbi tubu nane In nakua a'an neu kau nak, ‘Amnibun mubuab nonot nane. Au lomi he sin anen sa' le Au he utiaba, he nati' sin nanoina anmoni natuin Kau anbi sin monin ok-oke, ma he nati' sin nanoina sin anah-anah sin he natuin Kau.’

¹¹Minu'un neu hi anah-anah sin neu onme hi aim ma amhake ambi tubu in un le ai masu mesokan an amu nan onle nope mafena ma in ai anpin antia neno atnanan.

¹²Nalali te UISNENO nakua a'an neu ki na'ko ai ma hi amnen In hanan, mes hi ka mit fa In anbi humaf sa' es amsa.

¹³Anbi nane In naton neu ki sa' le mes hi anmo'e he minokab lasi manta'en le In anmo'e nani nok ki. Aplenat Bo'mese le In antui nalali neu fatu nua en nane mes hi minaoba mani.

¹⁴UISNENO anlenu kau he unoina ki ok-oke ale plenat le mes hi mituin mani anbi pah le of hi amtam meune ma mitua ambine nane.”

¹⁵“Mimnau lek-leko nai! Leka UISNENO nakua a'an neu ki na'ko ai in nanan anbi Tubu Sinai, hi ka mit fa sa'-sa'.

¹⁶Es nane te ampanat nai he nati' kais hi misanab natuin hi anmo'e neu hi aomenu le'u mahuma he miluli ma mibes anbi humaf sa' amsa, atoni ka ai bife ka,

¹⁷ai kolo ka, ai ika ka, ai mu'it anonok ai mu'it bian anteni.

¹⁸

¹⁹Kaisa misanab natuin hi miluli mibes ma miusi neu ale sa' le hi mit anbi neno atnanan: manas, funan, ma afkun-afkun. Hi UISNENO nafetin nonot bian he sin naluli nabes neu ale sa'-sa' nane.

²⁰Mes hi le nane uf le In nafetin ki na'ko Mesir, bale le anhamu'i ki nok matani. In neki ki ampoi mi'ko pah nane, he nati' amfani In nonot kun onle anbi neno le i.

²¹Mes hi UISNENO nato'an kau natuin hi, ma In ansup nak of au ka lak afini fa Noe Yordan he tam eu pah maafa le of anfe Ia nani neu ki.

²²Ka lo fa anteni hi of amlak ma mitua pah maafa nane; mes au ka ok fa, natuin au of amate a bi i.

²³Mimnau lek-leko! Kais amnikan lasi manta'en le hi UISNENO anmo'e neu ki. Mituin nai In aplenat sin; ka nabe'i fa anmo'e neu hi aom le'u mahuma anbi humaf sa' amsa neu he miluli ma mibes,

²⁴natuin hi UISNENO on ai le notu ma neku nani. In kan lomi fa he tanesa In papmese nok sa' es amsa.

²⁵Onane amsa leka hi mitua pah nane a lo ma mihoni anah ma upuf, kais misanab natuin hi anmo'e neu hi aom le'u mahuma anbi humaf sa'-sa'. Taos ma mo'et nane lasi amle'ut mese anbi hi UISNENO In human In matan ma of antao ma anmo'e In talantia In nato'.

²⁶So nati' neno tunan ma pah pinan anbi neno le i anfani saksi nak leka hi ka mituin Kau fa, hi of mimneku labah na'ko pah le hi mitua anbi Noe Yordan in aon bian nane. Hi of ka mitua fa lo anbi nane; of nale'un nani ki ok-oke.

²⁷UISNENO of nasiteb ma nasana ki anbi uf-uf bian ma al fua fauk anbi ki le es anmoni nabala.

²⁸Anbi nane hi mes miluli mibes neu uisneno teta le anmo'e neki nimaf mnasian, uisneno teta na'ko hau ma fatu le ka nit fa ai ka nen fa, ka nah nahin ai naskoko nahin.

²⁹Oke te of hi mami hi UISNENO, ma leka hi mami nok nekam ok-oke of hi mieku ma mitef mok In.

³⁰Leka ale lasi amle'ut nane nem anlaban ki ma hi ambi lasi malelat, hi of amfani neu hi UISNENO ma mituin In.

³¹Hi UISNENO nane lo amanekat anae le'uf kun. In of ka nasaitan ki ai ka nale'un ki fa, ai anikan In lasi manta'en le In anmo'e nalali nok hi na'if sin.

³²So hi amtae milek-leko hi neno afinit, nahun na'ko neno fe ka nahonis ki fa, naubon na'ko neno Uisneno anpakae mansian anbi pah pinan i. Mami anbi pah pinan anfun natef. Ai anmu'i matani onle i anbol anbi neno ahunut? Ai anmu'i atoni le sin anen antom lasi le anbol onle i?

³³Ai anmu'i uf le anmoni nabala leka sin anen nalali uisneno teta mese le nauab neu sin na'ko ai in nanan, onle hi mieku ma mitef mokan?

³⁴Ai anmu'i uisneno teta mese le nabe'i he naiti uf mese na'ko uf-uf bian sin atnanan oke te anmo'e le sin anfani In to kun, onle hi UISNENO anmo'e neu ki anbi Mesir? Hi mit milali meki hi matam neu onme Uisneno nok be'it matani nae le'uf anfe lasi amle'ut ma makenat, anmepu ale lasi sanmakat ma antao ma ale lasi matani.

³⁵Ale lasi nane ok-oke UISNENO nalile nani neu ki he naton neu ki nak UISNENO nane Uisneno kun, ma katit fa bian anteni.

³⁶Na'ko neno tunan In nanenab In hanan neu ki he nanoina ki; anbi pah pinan In nalile nalali neu ki In ai le matani, ma na'ko ai nane In nakua a'an neu ki.

³⁷Natuin In nek namnau hi na'if sin, es nane te In anbeti nalali ki; nok In kuasat le anaek In neki ki ampoi mi'ko Mesir.

³⁸Uf-uf le anae le'uf ma nabe'i anesi In anli'u sin na'ko hi human ma hi matan, he neki ki amtam meu pah le In anfe nani neu ki, pah le neno i anfani hi ini.

³⁹Es nane te mihin nai anbi neno i ma kais amnikan; UISNENO lo In anmeskun Uisneno kun anbi neno tunan ma pah pinan; katit fa bian anteni.

⁴⁰Mituin nai ale plenat le au fe neu ki anbi neno i, onane te hi sufam of napeni alekot ma anmoni piut anbi pah le hi UISNENO anfe neu ki anfani hi ini nabal-bal.”

⁴¹Oke te Nai Musa anlek kot tenu anbi Noe Yordan aon neno saen

⁴²anfani kot aninit, bale atoni nabe'i nafetin in aon leka ka nok fa asafanu in namate atoni le ka in musu fa. In nabe'i naen neu kot mese na'ko kot-kot nane he nati' ka namate fa in amsa.

⁴³Neu uf Nai Ruben naloitan kot Bezer anbi mnela snaen fafon; neu uf Nai Gad naloitan kot Ramot anbi pah Gilead, ma neu atoni Manasye naloitan kot Golan anbi pah Basan.

⁴⁴Oke te Nai Musa anfe plenat ma lekat lulut Uisneno neu to Israel.

⁴⁵Lasi nane in nanaoba leka sin anpoi na'ko Mesir ma sin anbi anonof Noe Yordan aon neno saen, mabaina nok kot Bet-Peor. Pah nane afi Nai Sihon, kesel Amori in pah, le afi unun in naplenat anbi kot Hesybon. Nai Musa ma atoni Israel sin nis ma anbe'u in anbi tabu sin anpoi na'ko Mesir.

⁴⁶

⁴⁷Sin natua pah Kesel Nai Sihon nane, onane amsa pah Kesel Nai Og na'ko Basan, kesel Amori bian le natua anbi Noe Yordan aon neno saen.

⁴⁸Pah nane naufon na'ko kot Aroer anbi Noe Arnon ninen, nao neu bian a'li antia Tubu Siryon, esle' Tubu Hermon,

⁴⁹ma pah ok-oke anbi Noe Yordan aon neno saen anao neu aon bian a'ne'u antia Tasi Maten anbi Tubu Pisga un.