Read Uab Meto ULANGAN 5 Bible Online

ULANGAN 5 - Uab Meto bible

ULANGAN 5

¹Nai Musa nabuab to Israel ok-oke, oke te nak neu sin nak, “Au bia ki ok-oke, amnen nai ale plenat le au fa neu ki anbi neno i. Hi minoina ale plenat nane, ma mituin sin nok aki'at.

²Anbi Tubu Sinai hit UISNENO anmo'e lasi

³manta'en mese ka al fa nok hit na'if sin mes nok kit ala kit anbi i.

⁴Na'ko ai anbi tubu nane in tunan UISNENO anlomi namolok nok ki.

⁵Mes natuin hi mimtausan ai nane ka nabe'i fa amhaumak a'tubu, onane te anbi tabu nane au hake anbi UISNENO ma hi atnanam neu he utiaba UISNENO In a'an neu ki. UISNENO nakua a'an nak,

⁶‘Au ho UISNENO es kau le eki ki ampoi mi'ko Mesir, bale le an aten ki anbine.

⁷Kais miusi uisneno teta. Al miusi neu Kau.

⁸Kais anmo'e neu hi aom le'u mahuma le papmese on sa' es amsa le anbi neno tnanan, ai anbi pah pinan ai anbi oe in nanan anbi pah pinan in nupun.

⁹Kais miluli mibes neu le'u mahuma onle nane natuin Au hi UISNENO ka lomi fa he minesa Kau papmese nok ale sa' es amsa. Atoni-atoni le an un to'an neu Kau Au mes a'kas sin talantia batan tenu nok batan ha.

¹⁰Mes Au ulile Au manekak neu atoni nifun-nifun na'ko atoni-atoni le sin nek Kau ma sin natuin Au plenat.

¹¹Kais hi amtek Au kanak nok lafu-lafu, natuin Au, hi UISNENO a'kas sekau ma sekau le antek Au kanak nok lafu-lafu.

¹²Mimnau Neno Snasat ma miliatas on neno le aknino kun, natuin Au, hi UISNENO es uplenat ani neu ki.

¹³Au fe neu ki neno ne he hi amepu,

¹⁴mes neno hitu nane Neno Snasat le Au beti uteta neu Kau, hi UISNENO. Anbi neno nane ka nabe'i fa he atoni mese amsa hen mepu, leko he hi, hi anah-anah sin, hi ate-ate sin, hi mu'it, ai atoni anao amnemat le natua anbi hi pah. Hi ate-ate sin mes sin nasnas onle hi amsa.

¹⁵Mimnau nai nak afi ahunut hi amsa an aten ki anbi Mesir, oke te hi UISNENO nafetin ki neki be'it matani anae le'uf. Es nane te Au fe plenat neu ki he miliatas Neno Snasat.

¹⁶Mimtausan ma ampanat hi ama ma hi aina; nane Au plenat, hi UISNENO, he nati' hi mipeni alekot ma ua mnanu anbi pah le of Au fe neu ki.

¹⁷Kaisa hi mamaten.

¹⁸Kaisa hi mapaisa.

¹⁹Kaisa hi mibak.

²⁰Kaisa hi meki saksi moel ma poi neu atoni bian.

²¹Kaisa amsinmak atoni bian in sa'-sa': in nain, in fenai, in ate-ate sin, in mu'it sin, in bikase luke mnanu ai sa'-sa' le in-ini.’

²²Nane ale plenat le UISNENO anfe nani neu ki leka hi amnibun mibuabom anbi tubu. Leka In nakua a'an nok hana naek na'ko ai ma nope le mafaun. In anfe ale plenat nane, ma ka bian fa. Oke te In antui nani fatu tuis nua ma anfe neu kau.”

²³“Leka tubu ok-oke anputu ma hi amnen hanaf na'ko mesokan, ale hi uf anakaf sin ma amnasi na'ko to nem neu kau.

²⁴Sin nak, ‘Hit UISNENO nalile nalali In masan apinat leka hai amnen In nakua a'an na'ko ai. Neno le i hai amsaksi milali nak namneo oni neu mansian anmoni nabala, maski Uisneno nakua nalali In a'an neune.

²⁵Mes nansa hai mes hem tao amteni hai asmanam? Ai nae le'uf nane of nale'un kai! Hai miteb mak of hai mate leka hai amnen hai UISNENO nakua a'an anteni.

²⁶Ai anmu'i mansian le anmoni nabala leka in anen nalali Uisneno amonit nakua In a'an na'ko ai?

²⁷Es nane te, amnao nai Musa, amnen nai ale sa' le hit UISNENO In namolok oke te mutiaba neu kai sa' le In naton nalali neu ko. Hai of amnen ma mituin.’

²⁸Leka In anen hi uab nane, UISNENO nakua a'an neu kau nak, ‘Au nen ulali sa' le to nane sin nak, ma sa' le sin nak le nane namneo.

²⁹Bait kalu sin anmu'i nekaf onane! Ma sin namtausan Kau piut, ma natuin ale Au plenat, talantia sin ma sin sufan napeni alekot nabal-bal.

³⁰Amnao nai esle' i ma amlenu to nane he sin anfani neu sin um-ume mese-mese.

³¹Mes ho, Musa, amfani aum nai ma mumaika ambi i mok Kau; of Au fe neu ko ale plenat malekat lulut sin. Munoina neu sin ale Au plenat, he nati' sin natuin anbi pah le Au fe ani neu sin.’

³²Au bia ki ok-oke, mituin nai nok aki'at sa' le hi UISNENO naplenat nani neu ki. Kais amtanhai plenat mese amsa na'ko plenat-plenat nane.

³³Amtao ma anmo'e mituin ale plenat le hi UISNENO naplenat neu ki he nati' hi mipeni alekot ma nabe'i hi mibala anbi pah le of hi mitua ambine.”