Read Uab Meto ULANGAN 6 Bible Online

ULANGAN 6 - Uab Meto bible

ULANGAN 6

¹“Hi UISNENO anlenu kau he unoina ki ale plenat i neu ki he nati' hi amtao ma anmo'e mani anbi pah le ka lo fa anteni hi mitua ambine.

²So nati' hi ma hi sufam sin anbi hi monim ok-oke mimtausan hi UISNENO ma mituin ale In plenat sin le au utiaba neu ki, he nati' hi mipeni ua mnanu anbi pah nane.

³Es nane te amnen nai au bia ki ok-oke, amtao ma anmo'e ale nane nok aki'at, he nati' hi mipeni alekot ma amfani uf anaet anbi pah amu'it ma maafa, onle hi UISNENO anba'an nalali neu hi na'if sin.

⁴Au bia ki ok-oke, mimnau nai! Al UISNENO, ma al UISNENO nane hit Uisneno kun!

⁵Amnek hi UISNENO meki hi nekam ok-oke: Milile ma miton lasi nane anbi hi monim ma anbi hi taos hi mo'et.

⁶Kais nabe'i fa hi amnikan ale plenat le au fe neu ki anbi neno le i.

⁷Minoina hi anah-anah sin nai. So nati' hi mimolok neu sin ale lasi nane anbi hi ume nanan ma leka hi ambi lanan, anbi tabu hi misnas ma anbi tabu hi amepu.

⁸Amfutun anbi hi nimam ma amtao anbi hi ilam he nati' hi mimnau piut-piut.

⁹Amtui sin anbi hi ume nanan ma anbi hi eno sutai.”

¹⁰“Hi UISNENO anba'an neu hi be'i hi na'i sin Nai Abraham, Nai Ishak ma Nai Yakub nak In of anfe pah nane neu ki. In kot-kot sin anaek ma maafa, ma hi es ka mifena fa sin.

¹¹Sin um-ume sin nahenu nok ale bale' alekot, ma hi es ka mitua, ma mihenu fa sin. Hi of mipeni ale oe mata, ma hi es kam oe hani fa sin. Hi of mipeni ale lene tua min kase ma bub fua mina, ma hi es kam sen fa sin. Leka UISNENO neki ki neu pah nane, ma hi mu'i ale sa' le hi amlomi he miah,

¹²ampanat nai lek-leko he nati' kais him nikan UISNENO le nafetin nalali ki na'ko Mesir, bale le an aten ki anbine.

¹³Mimtausan hi UISNENO, ma miluli mibes alkun neu In, ma leka hi amsup, amtao ma anmo'e alkun In kanan.

¹⁴Kais miluli mibes neu uisneno teta le uf-uf natua anfun natef ki sin naluli nabes neu uisneno teta nane.

¹⁵Leka hi miluli mibes neu uisneno teta bian, hi UISNENO In to'as of ansanu nem neu ki ma nale'un ki ok-oke, natuin hi UISNENO le anbi hi sonam hi atnanam kan lomi fa he hi minesa In nok sa' es amsa.

¹⁶Kais hi amsu' hi UISNENO onle hi amtao ma anmo'e anbi Masa.

¹⁷Mituin ale plenat le hi UISNENO anfe neu ki.

¹⁸Amtao ma anmo'e ale sa' le natuin UISNENO naleko ma amneot, onane te of hi mipeni alekot. Pah maafa le UISNENO anba'an neu hi be'i hi na'i sin, of anfani hi ini kun,

¹⁹ma hi of amli'u hi musu-musu sin onle UISNENO anba'an nalali neu ki.

²⁰Anbi neno amunit hi anah sin of sin natoti neu ki nak, ‘Nansa UISNENO hit Uisneno anlenu kit tatuin ale plenat le nane?’

²¹Hi mes mitae mak on i, ‘Afi un-unu hit atfani ate Kesel Mesir, oke te UISNENO nafetin kit neki be'it ma matani anaek.

²²Hai meknom amsaksi neu UISNENO antao ma anmo'e ale lasi sanmakat-sanmakat ma lasi amle'ut neu atoni Mesir ma sin kesel ma ale in ana' plenat sin.

²³In nafetin kit na'ko Mesir ma neki kit neu i, ma anfe neu kit pah i onle In anba'an nalali neu hit be'i ma hit na'i sin.

²⁴Hit UISNENO anlenu kit het tanaoba ale plenat nane ma tamtausan In. Leka hit atmo'e onane, In of anpanat hit nonot piut he nati' anmoni nok alekot piut.

²⁵Leka nok aki'at hit tatuin ale plenat le hit UISNENO naplenat nani neu kit, onane te In of anlomi nan kit.’ ”