Read Uab Meto ULANGAN 7 Bible Online

ULANGAN 7 - Uab Meto bible

ULANGAN 7

¹“UISNENO of In neki ki neu pah le of hi mitua ambine, ma uf namfau le of hi amli'u sin na'ko nane. Anbi hi matam In of anli'u uf hitu le namfau nesin ki ma le nabe'i anesin ki, esle' atoni-atoni Het, Girgasi, Amori, Kanaan, Feris, Hewi ma Yebus.

²Leka UISNENO In nana'at uf-uf nane neu hi kuasat in nanan ma hi mis ma ambe'u sin, nati' hi mimate sin ok-oke. Kais hi amnek ma mimnau sin ai hi anmo'e lasi manta'en mok sin.

³Hi ka nabe'i fa he mafe ma mamone mok sin, ma kais mifetin hi anah-anah sin he anmafe ma anmamone nok sin,

⁴he nati' sin kais na'lo ma naskotun hi anah-anah sin na'ko UISNENO he naluli ma nabes neu uisneno teta bian. Leka hi miluli ma mibes neu uisneno teta bian. UISNENO nato' ma In of nale'un ki nok manoe.

⁵Es nane te, ampukai mani ale baki tulu uf-uf nane, miskuku ale sin ni fatu le antek sin nak le'u, mibelat ale ataka-ataka Asyera, ma motu mani ale sin le'u mahuma le sin naluli ma nabes neune.

⁶Amtao ma anmo'e ale nane ok-oke natuin UISNENO in-ini ki. Na'ko ale uf-uf anbi pah pinan ok-oke hi es UISNENO anbeti ki he amfani In to le anesi na'ko ale uf.

⁷UISNENO anek ma namnau ki ma anbeti ki, ka natuin fa hi amfaumen nesi na'ko ale uf-uf bian; mes namneo-namneo hi uf abaut anesi anbi pah pinan.

⁸Mes UISNENO anbeti ki natuin In anek ma namnau ki ma anlomi he nanokab In fef bela le In antao ma anmo'e nok hi na'if sin. Es nane te In nafetin nalali ki neki kuasat le anae le'uf ma napoitan ki na'ko lasi aten Kesel Mesir.

⁹Mimnau nai nak UISNENO nane In anmeskun Uisneno ma In Uisneno aki'at kun. UISNENO In nanokab In fef bela ma nalile In manekan na'ki nabal talantia batan nifun-nifun neu atoni le anek ma namnau In ma natuin In plenat-plenat sin.

¹⁰Mes In anseunbanin ma ankas sekau ma sekau le an unto'an neu In.

¹¹Es nane te, mituin nai ale plenat le au utiaba neu ki anbi neno le i.”

¹²“Leka hi ampanat plenat-plenat nane, ma amtao ma anmo'e nok aki'at, onane te UISNENO amsa of na'ki neu fef bela le In anmo'e nani nok ki. In mes nalile In manekan le na'ki nabal neu ki, onle In anba'an nani neu hi na'if sin.

¹³In of anek ma namnau ki ma anfe neu ki tetus, talantia hi sufam hi ka'um namfau ma hi amfaumen ansato namfau anfin-fin. In of anfe tetus neu hi nain ma hi lene sin talantia napoitan ane kase, tua mina mtasa, ma mina bub fua mina. In of anfe tetus neu ki talantia hi bijae ma hi bibi ma bibi kase ansato namfau. Ale tetus nane of hi amsimo anbi pah le UISNENO anfe nani neu ki, matom nok In fef bela neu hi na'i hi be'i sin.

¹⁴Na'ko ale uf anbi pah pinan, katit fa es amsa le napeni tetus nathoe anfin-fin onle hi. Na'ko hi ok-oke ma na'ko ale hi mu'it ok-oke katit fa es amsa le hen kiu.

¹⁵UISNENO of naneo ma nahafo ki na'ko ale menas ma na'lob ma naskotun ale amle'ut le hi amsaksi anbi Mesir, mes ale amle'ut-amle'ut nane of In neki ma nasanut nani neu hi musu-musu sin.

¹⁶Ale uf le hi UISNENO nana'at nani neu ki mes hi mile'un mani sin; kais milile hi nek amnaut neu sin. Kais miluli ma mibes neu sin uisneno teta, natuin taos mo'et onane neki amle'ut nem neu ki.

¹⁷Oni hi mitenab uf-uf nane sin amfaun anae le'uf anesin ki talantia hi ka mibe'i fa hem li'u sin.

¹⁸Mes kais hi mimtausan sin, mimnau nai sa' le hi UISNENO antao ma anmo'e neu Kesel Mesir ma in to ok-oke.

¹⁹Hi mimnau nai ale lasi amle'ut le him saksi mani meki hi matam, sanmakat-sanmakat, ma matani anaek le UISNENO anpake he nafetin ki. Onane amsa UISNENO of antao ma anmo'e ale uf le hi mimtausan sin.

²⁰Ma UISNENO of anfe lasi amtaus anae le'uf anbi sin, talantia atoni-atoni le sin naen ma natol'on amsa of sin namle'u.

²¹Es nane te kais hi mimtausan uf-uf nane. UISNENO of In naneo ma nahafo ki. In le nane Uisneno anaek ma matani.

²²Uf-uf nane of In anli'u sin mese-mese na'ko hi humam ma hi matam. Ka nabe'i fa hi mile'un sin nok laba, he nati' mu'it fui abulalut kais namfau nis ma neki amle'ut neu ki.

²³Onle nane hi UISNENO of nana'at hi musu-musu sin neu ki. In of anmo'e sin kan tainine fa talantia sin namle'u.

²⁴In of nana'at sin kesel sin neu ki. Hi of mimate sin, ma sin kankenu of him nikan sin. Katit fa es amsa le hen hake namepnon anbi hi human ma hi matam; sin al-al sin oke of hi mile'un sin.

²⁵Motu mani ale sin le'u mahuma le sin naluli ma nabes neune. Kais him sinmak sin noni muti ai sin noni mnatu le na'ki anbi sin ma kais hi maiti sin neu hi aomen. Leka him tanhai plenat nane of hi amate, natuin hi UISNENO an unto'an neu luli besa le'u mahuma.

²⁶Kais amtao le'u mahuma mese anbi hi ume nanan, he nati' sukat le antoman sin kais antoman ki amsa. Lasi nane hi mes amanisin ma him kiso on lasi le'uf, natuin UISNENO ansukat nani.”