Read Uab Meto ULANGAN 8 Bible Online

ULANGAN 8 - Uab Meto bible

ULANGAN 8

¹“Ale plenat le au fe neu ki anbi neno i mes hi mo'e mani nok aki'at, he nati' hi moni piut, mimfau piut, ma mitua pah le UISNENO anba'an nani neu hi na'i hi be'i sin.

²Mimnau nai! Ton bo'ha in a'lon hi UISNENO In ana' ma antopu ki anbi lanan in a'lon le hi amnao mituin pah asnaen. Hi amnao lanan a'lo nane UISNENO anpake hen su' ki, he nati' In nahin sa' le anbi hi nekam ma of hi mituin In plenat-plenat sin ai kahaf.

³In nafetin ki he hi mimnah, oke te In anfe neu ki manna mak muti he hi ambukae. Hi ma hi na'if sin na'ko un-unu hi ka miah mit fa bukae nane. UISNENO anmo'e onane he nanoina ki nak atoni anmoni ka al fa natuin amnahat mes natuin sa' le anpoi na'ko UISNENO In fefan.

⁴Anbi ton bo'ha i, in a'lon hi bale pake sin kan lapu fa ma hi haem kan mu'an ai kan fu'un fa.

⁵Hi mimnau nai nak UISNENO nanoina ki on amaf mese nanoina in anah-anah sin.

⁶Es nane te amtao ma anmo'e nai hi UISNENO In aplenat sin. Amoni mituin In plenat-plenat sin ma mimtausan In nai.

⁷Hi UISNENO In neki ki amtam meu pah alekot, pah le anmu'i noe namfau ma oe mata namfau, pah le anmu'i noe anbi nain in apinan ansai neu ale nonof ma ansae neu ale nuaf.

⁸Pah nane napoitan in afan huma-huma he ane kase, tua min kase, plelo fua, lin kase, bub fua mina ma oni hau.

⁹Anbi nane of hi ka mimnah fa ai ka manukan fa sa'. In fatu putun sin anmu'i besi, ma na'ko nuaf-nuaf sin hi nabe'i amhani noni molo.

¹⁰Hi of miah ma mimsen nanokab hi nekam, ma him tek alekot neu hi UISNENO natuin pah alekot le In anfe nani neu ki.”

¹¹“Ampanat nai lek-leko he nati' kais him nikan hi UISNENO; kais ampolin plenat mese amsa na'ko ale In aplenat sin le au fe ulali neu ki anbi neno i.

¹²Leka hi miah ma mimsen minokab milali hi nekam ma mihakeb milali um-ume alekot neu hi bale he mitua,

¹³ma leka hi bijae ma hi bibi ma bibi kase namfau, hi noni muti ma hi noni mnatu ma ale hi mu'im bian anteni,

¹⁴ampanat nai lek-leko he nati' kais him fani mimok'om ma amnikan hi UISNENO le nafetin ki na'ko Mesir, bale an aten ki anbine.

¹⁵UISNENO ana' ma antopu kiamnao mok mnela asnaen le menuan ma le neki hakataus, le kaun koko malaso ma kabiti namfau anbine. Anbi pah le anmeto ma kan mu'i fa oe in napoitan oe ansai ba'ko fatu, he nati' hi minu nok alekot.

¹⁶Anbi mnela snaen In anfe neu ki manna (mak muti) anfani hi mnahat, mnahat le hi na'i ma hi be'i ka nahin nani fa. UISNENO antao ma anmo'e nane hen su' ki ma nanebet hi nekam, he nati' namuni te In anmo'e alekot neu ki.

¹⁷Es nane te, kais mitenab anbi hi nekam mak nok hi mepu ma hi matanim anmes kun him fani amu'it.

¹⁸Mimnau nai nak hi UISNENO In neknon kun es anfe neu ki mu'if. In anmo'e nani lasi nane natuin antia neno le i In fe na'ki nabala neu In fef bela le In anmo'e nani nok hi be'i hi na'i.

¹⁹Kais amnikan hi UISNENO ma kais amfani meu uisneno teta neu he miusi ma am aetnom meu sin. Neno i au umnauba ki nak leka hi anmo'e mani amsa, UISNENO mes nale'un ki.

²⁰Leka hi ka mituin fa hi UISNENO, In of nale'un ki amsa, onle In nale'un uf-uf anbi hi humam ma hi matam.”