Read Uab Meto ULANGAN 9 Bible Online

ULANGAN 9 - Uab Meto bible

ULANGAN 9

¹“Amnen nai au bia ki ok-oke! Neno i amlak Noe Yordan neu he mitua pah uf-uf le anaek anesin ki ma nabe'i nesin ki. Sin kot-kot nane anae le'uf nok baki lape le amnanu le'uf antia neno atnanan.

²Atoni-atoni anbi nane atoni anaek ma aoken abe'it ma matani; sin onle otu, ma hi amnen milali nak katit fa atoni mese amsa le nabe'i hen laban sin.

³Mes neno i hi of amsaksi neu onme hi UISNENO In anao nahunun ki onle ai le notu nani ale sa'. In of nis ma anbe'u sin anbi hi humam ma hi matam, talantia nabe'i him li'u sin ma mile'un sin nok manoe onle UISNENO In anba'an nani.

⁴Leka hi UISNENO anli'u nalali sin neu ki, kais hi mitenab mak In neki ki anbi nane ma hi amu'i pah nane natuin hi alekot ki ma amtao mituin hi UISNENO In alomin talantia hi amtam ota hem simo mani pah nane. Ka on fa nane! UISNENO anli'u uf-uf nane neu ki natuin sin atoni amle'ut kun. UISNENO nafetin ki he hi maiti sin pah, natuin In anlomi he nanokab In fef ba'an neu hi na'if sin Nai Abraham, Nai Ishak ma Nai Yakub.

⁶Mihin nai nak hi UISNENO ka nana'at ki fa pah alekot nane neu ki natuin him tam ota hem simo mani. Kahaf! Hi le i uf le anak fatu ki.

⁷Mimnau neu onme hi anmo'e hi UISNENO anbi mnela snaen. Na'ko neno hi misaitan Mesir talantia hi aim amtia bale i, hi amlaban UISNENO.

⁸Fun anbi Tubu Sinai hi anmo'e UISNENO nato' anae le'uf, talantia In anlomi he nale'un ki.

⁹Au a'sae eu tubu nane he simo fatu manba'an le UISNENO anmo'e nok ki. Neno bo'ha ma fai bo'ha in a'lon au umaika bi tubu nane in tunan nok ka uah ma ka inu fa.

¹⁰Nalali te UISNENO anfe neu kau fatu bena nua nane le Uisneno In neknon kun antui sin. Anbi fatu nane In antui nani a'an le In nauab neu ki na'ko ai in nanan; leka hi amhake ambi tubu in haen.

¹¹Ma leka neno bo'ha ma fai bo'ha namsopu te, UISNENO anfe neu kau fatu nua fef ba'an nane.

¹²Oke te UISNENO nakua a'an neu kau nak, ‘Amsanu lab-lab nai, natuin ho to le ho meki mupoitan sin na'ko Mesir sin anmo'e nalali amle'ut. Si anbeo nalali na'ko ale Au plenat-plenat sin, ma sin anmo'e le'u mahuma he naluli ma nabes.’

¹³UISNENO amsa nakua a'an neu kau nak, ‘Au uhin to nane a'nak fatu nae le'uf.

¹⁴Kais am eka Kau. Au he ule'un sin talantia mes ka tamnau ateni fa sin. Mes ho Au mes anmo'e ko amfani amaf neu uf mese le nabe'i nesi na'ko sin.’

¹⁵Oke te au uklel'ok, ma au eki fatu nua en fef ba'an nane anbi au nimak nua sin, au sanu tubu nane le fe anpin-pin.

¹⁶Au it neu hi amtanhai milali hi UISNENO In aplenat sin. Hi misanab milali neu UISNENO natuin hi anmo'e neu hi aomen le'u mahuma bijae mese na'ko noni molo.

¹⁷Onane te anbi hi humam ma hi matam au polin fatu bena nua en nane talantia anpe' naskuku pisa-pisa.

¹⁸Oke te hae mese anteni au li'tu ululi ma ubes anbi UISNENO In human ma In matan anbi tubu in tunan neno bo'ha ma fai bo'ha in a'lon, au ka uah ma ka inu fa. Au anmo'e lasi nane natuin hi misanab milali neu UISNENO nok sa' le hi amo'e lo amle'ut kun, talantia In nato'.

¹⁹Au umtausan to'as UISNENO le anpin-pin neu ki talantia In anlomi he nale'un ki, mes hae mese i amsa UISNENO In anlomi he anen kau.

²⁰UISNENO amsa nato'an Nai Harun anae le'uf talantia he namate in, onane te au onen toti antom in amsa.

²¹Le'u mahuma bijae noni molo le hi anmoe au polin utam ani anbi ai in nanan. Oke te au uskuku ani ma au aul uskuku on afu malule, ma afu skuku nane au polin utam ani neu noe ana' in nanan le ansai na'ko tubu nane.

²²Onane amsa anbi Tabera, Masa ma Kibrot-Taawa, hi anmo'e UISNENO In nato'.

²³Oke te anbi tabu UISNENO anlenu ki misaitan Kades-Barnea neu he amnao mat ma mitua pah le of anfe nani neu ki, hi amlaban hi UISNENO In aplenat, hi kam lomi fa he miteb ai mituin In.

²⁴Na'ko neno au uhin ki, hi amlaban UISNENO piut-piut.

²⁵Au uhin UISNENO In neku nisin neu he nale'un ki. Onane te anbi neno bo'ha ma fai bo'ha in a'lon au li'tu ulali ma ubes anbi UISNENO In human

²⁶ma In matan ma au onen ak on i: Koi UISNENO Anesit Afinit, kaisa mule'un Ho to mabeti i, to le Ho mufetin ma Ho meki sin anpoi na'ko Mesir nok be'it ma matani ma Ho kuasat le anae le'uf.

²⁷Mumnau Ho ate-ate sin Nai Abraham, Nai Ishak ma Nai Yakub, ma kais hom kiso sin monit a'nak fatu, lasi amle'ut ma sanat to i.

²⁸Leka Ho mule'un Ho to amsa, onane te atoni Mesir of sin nauab nak Ho ka mube'i fa he meki Ho to neu pah le Ho amba'an neu sin, ma Ho meki sin neu mnela snaen he mumate sin, natuin Ho am unto'an neu sin.

²⁹Mes mumnau, koi UISNENO, natuin sin le i nonot le Ho ambeti sin anfani Ho to ma Ho meki sin na'ko Mesir meki be'it matani ma Ho kuasat le anae le'uf kun.”