Read Uab Meto YOHANES 1 Bible Online

YOHANES 1 - Uab Meto bible

YOHANES 1

¹Bi neno un-unu te A'an Knino esan. A'an Knino nane nok Uisneno, ma A'an Knino nane lo Uisneno kun.

²In nok Uisneno bi neno un-unu.

³Anmo'e ale sa' natuin In, ma na'ko ale sa' le anbol, katit fa sa' esle' anmo'e ankoit In.

⁴A'an Knino nane neki honis, ma honis nane meusine neu mansian.

⁵Meusine nane ansinek bi mesokan, ma mesokan kan kub nani fa.

⁶Uisneno anlelu atoni es nem, kanan Nai Yohanes.

⁷In nem on saksi hen etun ma naton meusine nane, he nati' ale atoni anpalsai natuin in.

⁸Meusine nane ka es fa in, mes in nem hen saksi meusine nane.

⁹Meusine amneot le hen tana ale atoni, nem nalali neu pah pinan.

¹⁰In anbi pah pinan ma anmo'e pah pinan natuin In, mes pah pinan ka nahin fa in.

¹¹In nem neu In ini sin, mes sin kan simo fa In.

¹²Mes ale atoni le ansimo In, In anfe kuasat neu sin he nati' sin anfain anah Uisneno, le sin anpalsai anbi In kanan.

¹³Le ka nahoni sin fa na'ko nesaf ma na' ai na'ko aof ta'uf natuin mansian, mes natuin Uisneno kun.

¹⁴A'an Knino nane anfain mansian, ma namaika bi hit atnanak. Hit tit talali In apinat, le anfe nalali neu In on Amaf In Anmone mes tilo. Anbi In hit tit Uisneno ma In manekan neu kit.

¹⁵Nai Yohanes ansaksi neu In ma anhunun nak, “In kun esle' i, le au ak ulali ki, of In nem namunin kau, le In anaek nesin kau, fun In esan nahunun kau.”

¹⁶Fun na'ko In athoes hit ala kit atsimo halinat piut.

¹⁷Nai Musa es anfe plenat knino, mes manekat ma aki'at nem na'ko Yesus Neno Anan.

¹⁸Katit fa esle' nit Uisneno, mes Uisneno Anmone mes tilo, le anbi Amaf aifan, In es nalile nani neu kit.

¹⁹Ma Nai Yohanes ansaksi nak on i, leka atoni Yahudi na'ko Yerusalem ansonu Ana' fuat knino sin fauk ma atoni Lewi sin neu in he natan neune nak, “Ho sekau ko ka?”

²⁰Nai Yohanes naton muti ma ka namo'e fa nak, “Au ka Neno Anan kau fa.”

²¹Oke te sin natan neu in nak, “Kalu onane ho sekau ko ka? Nai Elia ka?” Ma in natae nak, “Kahaf!” “Ai ho mafefa knino ko ka?” In natae nak, “Kahaf!”

²²Onane te sin nak neu in, “Ho sekau ko ka? Fun hai he miton neu sin le ansonu kai. Neu hom tek ho aom mak sa' ka?”

²³Nai Yohanes natae nak, “Au hanaf kau, le anhunun bi mnela paha snaen nak: Minono nai lalan Usif tunan, onle Mafefa Knino Nai Yesaya in a'an.”

²⁴Ma anbi ale atonin le ansonu sin nane anmu'i atoni Farisi sin fauk.

²⁵Sin natan neune nak, “Kalu ho ka Neno Anan ko fa, ma ka Nai Elia, ma ka mafefa knino le he nem, nansa' ka es ho muslani atoni?”

²⁶Nai Yohanes natae sin, nak, “Au uslani ki eki oe, mes In kun anhake bi hi atnanam le hi ka mihinef.

²⁷In nem namunin kau, ma au ka tamaf ota he sefi Ini penhae tanin.”

²⁸Ale lasi nane anbol bi Betania, le anbi Noe Yordan panin, bale Nai Yohanes naslani atoni.

²⁹Nokfa onane te Nai Yohanes nit Yesus nem neu in ma in nak, “Kiso Ana' Bibi Kase Uisneno, le ansako pah pinan sin sanat.

³⁰In kun le afi au ak neu ki: Atoni mese of nem namunin kau, mes In anaek nesin kau, fun In esan nahunun kau.

³¹Ma au amsa afi ka uhin In; es nane au aum ma uslani eki oe, he nati' In nalilon neu to Israel.”

³²Ma Nai Yohanes ansaksi nak, “Au it Smanan Knino ansanu nem na'ko neno tunan on kol ot kase ma nabala anbi In.

³³Ma au amsa ka uhinef, mes Uisneno le anlelu kau he uslani eki oe, nakua a'an neu kau nak: Leka ho mit Smanan Knino ansanu neu atoni es ma nabala anbi In, In kun es of naslani neki Smanan Knino.

³⁴Ma au it ulali In ma au saksi ak: Uisneno Anmone esle' i.”

³⁵Nokfa onane te Nai Yohanes anhake anteni bi bale nane nok in asimo lasi sin nua.

³⁶Ma leka in kiso nit Nai Yesus nao natuin nane te in nak, “Kiso Ana' Bibi Kase Uisneno!”

³⁷Leka sin nua sin nen a'at nane te sin nao natuin Yesus.

³⁸Mes Yesus naklelon ma nit sin le sin natuin In, oke te In nak neu sin, “Hi mami sa' ka?” Sin natae nak, “Pak, Ho mutua esme ka?”

³⁹In nak neu sin, “Aim nai, ma of hi mit.” Oke te sin neman ma nit In natua anbi me. Ma bi neno nane sin namaika nok In, oni leku ha neon mabe.

⁴⁰Es na'ko atoni nua in le amnen Nai Yohanes in uab oke te nao natuin Yesus esle' Nai Andreas, Nai Simon Petrus olif.

⁴¹Nai Andreas nae'ku nahun nok in tataf Nai Simon ma in nak neune, “Hai mie'ku milali mok Mesias (le in oten nak: Neno Anan).”

⁴²Ma in nokan nem neu Yesus. Leka Yesus nit nalali te In nak, “Hoi Simon, Nai Yohanes anmone, of nakanab ko Nai Kefas (le in oten Nai Petrus).”

⁴³Nokfa onane te Yesus nafek he nao neu pah Galilea. In nae'ku nok Nai Filipus ma nak neu in, “Mutuin Kau nai!”

⁴⁴Nai Filipus na'ko Betsaida, le Nai Andreas ma Nai Petrus sin kuan.

⁴⁵Nai Filipus nae'ku nok Nai Natanael ma nak neu in, “Hai mie'ku milali In, le Nai Musa antek nani bi plenat knino ma mafefa knino sin antui nalali, esle' Yesus, Nai Yusuf anmone na'ko Nazaret?”

⁴⁶Mes Nai Natanael nak neu in, “Nabe'i ka lasi alekot hen poi na'ko Nazaret?”

⁴⁷Nai Filipus nak neune, “Aum nai ma mail kum.” Yesus nit Nai Natanael nem neu In oke te nak neune, “Kiso, i lo atoni Israel namneo. Katit fa lasi moel anbi In.”

⁴⁸Nai Natanael natae nak, “Ho muhin kau onme ka Anaf?” Yesus nak, “Nahunun na'ko Nai Filipus anboin ko, Au tit ulali ko, ambi bubuk un.”

⁴⁹Nai Natanael nak neu Yesus, “Pak, Ho Uisneno Anmone Ko, Ho Kesel to Israel Ko!”

⁵⁰Yesus natae nak, “Natuin Au eut ko ak: Au tit ko ambi hubuk un es hom palsai ka? Of ho mit lasi le nanae nesin na'ko nane.”

⁵¹Oke te Yesus nak neune, “Au ak ko, of ho mit neno tunan natfei ma ahake Uisneno sin ansae ma ansanu neu Anmone Pah To.”