Read Uab Meto YOHANES 10 Bible Online

YOHANES 10 - Uab Meto bible

YOHANES 10

¹“Au u'uab alekot neu ki: Atoni le antam neu bibi kase o'of ma ka natuin fa eno, mes ansae natuin bahan, in atoni abakat ma atoni asikat.

²Mes atoni le antam natuin eno, in atukus bibi kase kun.

³Apao eno nasoitan eno neu in, ma bibi kase sin amnen in hanan ma in anboin ini bibi kase sin mes-mese natuin sin kanan ma antopu napoitan sin.

⁴Leka ini bibi kase sin anpoin, in nao nahun ma bibi kase nane sin natuin in, fun sin nahin in hanan.

⁵Mes kalu atoni mata teme of sin ka natuinef, mes sin naen nasaitan atoni nane fun sin ka nahin fa in hanan.”

⁶Usif Yesus na'uab lasi leta i neu sin, mes sin ka nahin fa sa' le In na'uab nane neu sin.

⁷Yesus nak anteni neu sin, “Au a'at i namneo, Au eno Kau neu ale bibi kase nane.

⁸Ale atoni le nem nahun na'ko Kau, nane sin abakat ma asikat ma bibi kase nane sin ka nenaf sin hanan.

⁹Au eno Kau, sekau le antam natuin Kau, in napeni honis, ma in of antam ma anpoi ma napeni mnahat.

¹⁰Abakat in nem, al he nabak ma namate ma nale'un. Mes Au aum he nati' sin napeni honis, ma anmoni nok athoes.

¹¹Au atukus alekot Kau. Atukus alekot nana'at In monin neu ini bibi kase sin.

¹²Mes atoni ma sebo' le ka atukus fa ma ka bibi tuaf fa, leka in nit asu fui nem, of in naen nasaitan ale bibi kase sin. Oke te asu fui nane anheke ma nasitab ale bibi kase sin.

¹³In naen kun fun in atoni sebo' ma in kan lae nan fa ale bibi kase nane.

¹⁴Au atukus alekot Kau ma Au uhin Au bibi kase sin ma Au bibi kase sin nahin Kau.

¹⁵On Ama nahin Kau, ma Au uhin Ama, ma Au una'at Au monik neu Au bibi kase sin.

¹⁶Ma anmu'i anteni bibi kase bian le ka na'ko fa o'of. Mes Au he Nibun sin amsa ma of sin nen Au hanak. Ma of sin anfani pukan mese ma atukus mese kun.

¹⁷Ama a'nek Kau, fun Au una'at Au monik he simo ufani sin.

¹⁸Katit fa atoni mese he nait sin na'ko Kau, mes Au fe ani natuin Au lomik, Au mu'i kuasat he fe ani, ma Au mu'i kuasat he aiti ufani. Mepu nane Au simo na'ko Au Ama.”

¹⁹Fun lasi matoes anbol anbi atoni-atoni Yahudi sin atnanan natuin a'at nane.

²⁰Atoni namfaun sin na'uab nak, “In nitu sae, ma namaun, nansa' him nen In ka?”

²¹Mes bian na'uab nak, “Nane ka atoni aniut saes fa in uab. Nabe'i ka nitu naleko atoin mat folo in matan ka?”

²²Namuni te Neno Naek Anhainiki Ume Uisneno bi Yerusalem natiabon. Neno nane nae'ku nok olas mainikin.

²³Ma Yesus nanoina anbi Ume Uisneno bi Nai Salomo in ke'an.

²⁴Atoni Yahudi sin nem nabuan neu In ma nak, “Usif, tal leka ka Ho mumautu hai nekam he na'unu? Kalu Ho Neno Anan Ko, Hom eut kai muti.”

²⁵Yesus natae sin nak, “Au eut ulali neu ki, mes hi kam palsaif. Ale mepu le Au mo'e ani anbi Au Ama In kanan, nane es neki saksi neu Kau.

²⁶Mes hi kam palsaif, natuin hi kam tamaf meu Au bibi sin.

²⁷Au bibi kase sin amnen Au hanak ma Au uhin sin ma sin natuin Kau.

²⁸Au fe honis nabal-bal neu sin ma of sin ka namle'un fa talan te nabal-bal. Ma katit fa atoni mese he nasik sin na'ko Au nimak.

²⁹Au Ama le anfe sin neu Kau nesi na'ko ale sa'. Ma katit fa atoni mese he nasik nan sin na'ko Au Ama niman.

³⁰Au ma Amaf nane lo mese kun.”

³¹Onane te atoni Yahudi sin naiti anteni fatu hen poli Yesus.

³²Mes Yesus nak neu sin, “Au ulile mepu alekot namfaun neu ki, le Au simo na'ko Au Ama. Na'ko ale mepu nane sin, mepu me ka es anmo'e ki he nati' him poil Kau meki fatu?”

³³Atoni Yahudi sin natae nak, “Haim poil Ko, ka natuin fa mepu alekot le Ho mo'e sin mes natuin Hom tek mule'un Uisneno. Ma natuin Ho mansian Ko, Ho munesa Ho aom mok Uisneno.”

³⁴Usif Yesus nak neu sin, “Ai kan tui nani fa anbi hi Plenat Knino nak: Uisneno nakua a'an nak: ‘Hi uisneno ki?’

³⁵Hit tahin nak sa' le matui bi Sulat Knino mes natiabon talan nabal. Es nane kalu Uisneno antek sin le ansimo In a'an nak ‘uisneno’,

³⁶nansa' hi mak, Au tek ule'un Uisneno In kanan, fun Au ak, Au le i Uisneno In Anah? Uisneno es anbati Kau ma ansonu Kau neu pah pinan.

³⁷Bati Au ka mepuf Au Ama In mepu, kais him palsai Kau.

³⁸Mes bait Au meup ani ma hi kam palsai Kau fa, ampalsai nai neu ale mepu nane, he nati' hi mihin mak Ama anbi Kau ma Au bi Ama amsa.”

³⁹Sin nami anteni hen heke Yesus, mes In nafetnon na'ko sin niman.

⁴⁰Nalali te Yesus anfani neu Noe Yordan panin, neu bale le Nai Yohanes nasub oe anbin, oke te namaika anbi nane.

⁴¹Ma atoni namfaun nem neu In ma nak, “Nai Yohanes kan mo'ef lasi taka mese amsa, mes ale lasi le Nai Yohanes na'uab nani antom atoni i lo namneo.”

⁴²Oke te ale atoni amfaun le anbi nane sin anpalsai neu Yesus.