Read Uab Meto YOHANES 11 Bible Online

YOHANES 11 - Uab Meto bible

YOHANES 11

¹Anmu'i atoni mese le namen, kanan Nai Lazarus. In namaika anbi Betania, bi Maria ma in olif bi Marta sin kuan.

²Bi Maria nane esle' afi anop min fomeni neu Usif Yesus In haen ma nose nameto neki ini nakfunu.

³Ma sin naofe esle' Nai Lazarus amenat nane. Sin nua sin ansonu hanaf neu Yesus nak, “Uisneno, hai naof le Hom nek mani, in namen.”

⁴Leka Yesus In nen hanaf nane te In nak, “Menas nane ka neki fa neu maten, mes he nalile Uisneno In apinat. Ma natuin menas nane of nanaeb Uisneno In Anmone.”

⁵Fun Yesus In nek bi Marta ma in tataf ma Nai Lazarus.

⁶Mes leka In nen hanaf nak Nai Lazarus namen, In namaika fe neno nua anbi bale le In anbin.

⁷Nalali te In nak neu In asimo lasi sin, “Aim het fain teu pah Yudea.”

⁸Asimo lasi sin nak neu In, “Pak, aif neno i atoni Yahudi sin hen poil nis Ko neki fatu, mes Hom loim hem fani amteni meu nane ka?”

⁹Mes Yesus natae nak, “Ai neno mese kan mu'if leku bo'es am nua ka? Atoni le na'oni fe manas, in kan tofu fa haen fun in nit meusine pah pinan.

¹⁰Mes atoni na'oni nok fai, of antofu haen, fun kan mu'if meusine anbi in.”

¹¹Yesus na'uab onane, oke te In nak neu sin, “Hit bae Nai Lazarus antup, mes Au nao he ufena ani na'ko tupas.”

¹²Ma asimo lasi sin nak neu In, “Uisneno, kalu in tup, of in naleko.”

¹³Usif Yesus na'uab neu Nai Lazarus anmaten. Mes sin natenab nak Nai Lazarus antup leko.

¹⁴Es nane Yesus na'uab muti neu sin nak, “Nai Lazarus anmaten.

¹⁵Mes Au malin natuin leku nane, Au ka binef. Fun lasi nane neki alekot neu ki, he nati' him palsai. Aim nai het nao es leku i.”

¹⁶Oke te Nai Tomas, le antek in kanan Nai Didimus, nak neu in bia in, asimo lasi bian, “Aim nai het nao het mate tokan.”

¹⁷Leka Yesus nem ante, In napeni ansub nalali Nai Lazarus neno ha anbi nuat naukel.

¹⁸Kuan Betania anhaumak Yerusalem, oni kilo tenu.

¹⁹Atoni Yahudi sin namfaun neman neu bi Marta ma bi Maria hen halin sin, fun sin naof anmate.

²⁰Leka bi Marta amnen, nak Yesus ankoenon nem, in nao nae'ku nokan. Mes bi Maria nabala anbi ume.

²¹Bi Marta nak neu Yesus, “Uisneno, bait afi Hom bi i, oni au naof nane kan matef.

²²Mes tomas i au uhin, nak Uisneno of anfe Ko sa' le Hom amtoti neu In.”

²³Yesus nak neu bi Marta, “Ho naof nane of anfen anfani.”

²⁴Bi Marta nak neu In, “Au uhin, ak Nai Lazarus of anfen anfani leka atoni amates sin anfen anfani bi neno hatas amsoput.”

²⁵Yesus natae nak, “Lasi amates anfen anfani ma lasi honis esle' Au. Atoni le nekan nateb knino neu Kau, of anmoni, maski in maet nalali.

²⁶Ma atoni amonit le nekan nateb knino neu Kau, of kan maet nitaf talan te nabal-bal. Ho nekam nateb lasi i ka?”

²⁷Bi Marta natae nak, “Koi Uisneno, au nekak nateb, Ho Neno Anan Ko, Uisneno Anmone, In kun le of ankoenon nem neu pah pinan.”

²⁸Leka in na'uab nalali onane te in nao ma anboin in tataf bi Maria ma naseo neune nak, “Ama Anoni es i ma In no'en ko.”

²⁹Leka bi Maria in nen onane te, in fen ma nao neu Yesus.

³⁰Bi leku nane Usif Yesus fe kan tamaf neu kuan. In fe anbi bale le bi Marta nae'ku In anbin.

³¹Leka atoni Yahudi sin le fe anhalin bi Marta anbi ume, nit bi Maria anfen laba ma anpoi. Sin amsa anpoi natuin in, fun sin natenab nak in he nao neu naukel ma hen kae anbi nane.

³²Leka bi Maria nem ante bale le Yesus anbin ma ankiso nit In, in anli'tu ma nabes anbi Yesus haen ma nak neu In, “Uisneno, bait afi Hom bi i, au naof nane kan matef.”

³³Leka Yesus nit bi Maria ankae, ma atoni Yahudi sin le nem nokan sin amsa ankae, In nekan namle'u. In nekan antu' ma nak,

³⁴“Him sub es me ka?” Oke te sin natae nak, “Uisneno, aum nai ma amkiso.”

³⁵Oke te Yesus ankae.

³⁶Ma atoni Yahudi sin nak, “Kiso In nek nisan.”

³⁷Mes atoni fauk anbi sin nak, “In naleko atoni matfolo, leka me In ka nabe'i fa hen mo'e atoni i he kais anmate ka?”

³⁸Oke te Yesus nekan namle'u anteni, nalali te In nao neu naukel nane. Naukel nane, nuat mese le antobe neki fatu.

³⁹Ma Yesus nak, “Maiti fatu i.” Mes amates nane in fetof bi Marta nak neu In, “Uisneno, in nafoben, fun in maet neno haen.”

⁴⁰Usif Yesus natae nak, “Ai Au ka ak ulali fa neu ko: Kalu hom palsai teb-teb, of ho mit Uisneno In apinat.”

⁴¹Oke te sin naiti fatu nane. Ma Yesus anbaisenu neu neno tunan ma nak, “Syukur ma terima kasih neu Ko, Ama, fun Hom nen mulali Kau.

⁴²Au uhin, ak Hom nen Kau piut. Mes natuin atoni amfaun le anhake fun ma natef Kau, Au u'uab on i he nati' sin anpalsai, nak Ho es amlelu Kau.”

⁴³Ma leka In na'uab nalali onane te anhunun nok hanan anaek nak, “Lazarus, anpoi aum nai!”

⁴⁴Oke te amates nane anpoi nem. In haen ma niman fe mafutu ma ankub in human neki pilu muti. Ma Yesus nak neu sin, “Him sefi ale piul muti nane ma maut he in nao.”

⁴⁵Ma anmu'i atoni namfaun anbi atoni Yahudi sin le nem ankiso bi Maria ma sin nit ale sa' le Yesus anmo'e, oke te sin anpalsai neu In.

⁴⁶Mes bian sin nao neu atoni Farisi sin ma anetun sin neu sa' le Yesus anmo'e nalali.

⁴⁷Oke te Ana' fuat knino nakaf sin ma atoni Farisi sin anboin Alef Lasi sin he nabuan ma nak, “Hit het mo'e sa' ka? Fun atoni i anmo'e lasi amkakat namfau.

⁴⁸Leka hit paleob In, of ale atoni anpalsai In. Nalali te atoni Roma sin neman ma nasik nan hit bale knino nok hit to.”

⁴⁹Mes atoni mese anbi nane kanan Nai Kayafas, le Ana' Lasi Fuat Amnanut bi ton nane, in nak neu sin, “Hi ka mihin fa sa'.

⁵⁰Ma hi ka mitenab mihin fa, mak leko nesi atoni mese anmate hen seka hit to na'ko hit to ok-oke he namle'u.”

⁵¹Nai Kayafas in na'uab lasi nane ka natuin fa in lomin, mes natuin in Ana' Lasi Fuat Amnanut bi ton nane in nabeno, nak Yesus hen mate anseka to.

⁵²Ma ka neu to Yahudi amnes, mes he nabuab ma nameseb anah-anah Uisneno le nasitbok kuk.

⁵³Ma na'ko neno nane sin malomin he namate Yesus.

⁵⁴Es nane Yesus ka nalilon fa anbi atoni Yahudi sin matan. In nao neu kuan mese kanan kuan Efraim anhaumak mnela paha snaen. In namaika anbi bale nane nok In asimo lasi sin.

⁵⁵Bi neno nane atoni Yahudi sin Neno Tolas Paskah anhaumaken. Ma atoni namfau na'ko pah nane sin nao neu Yerusalem he naknino sin aon nahunu na'ko Tolas Paskah nane.

⁵⁶Sin nami Yesus, leka sin fe anhake bi Ume Uisneno sin na'uaben es nok es nak, “Hi mitenab onme ka? In amsa of nem neu tolas ka?”

⁵⁷Onanae te Ana' fuat knino nakaf sin ma atoni Farisi sin napoitan plenat he nati' ale atoni le nahin Yesus namaika anbi me, sin naton he nati' sin anheke In.