Read Uab Meto YOHANES 12 Bible Online

YOHANES 12 - Uab Meto bible

YOHANES 12

¹Neno ne nahunun na'ko Neno Tolas Paskah, Yesus anao neu kuan Betania. Bale le afi Yesus nafena Nai Lazarus anbine.

²Sin anmo'e tolas neu In anbi nane ma bi Marta es nabiku. Nai Lazarus amsa anbukae nok Yesus.

³Bi Maria in naiti min fomeni ma'upa oni kati mese. Oke te in an'op neu Yesus In haen ma nose nameto neki in nakfunu. Ma ume nane nahenu nok mina in fon.

⁴Mes Nai Yudas Iskariot, le Yesus asimo lasi sin esle' he nana'at Yesus, na'uab nak:

⁵“Nansa' ka es ka nasosa fa min fomeni i, upan dinar natun tenu ma anfe nani neu atoni amamu'it sin ka?”

⁶In na'uab onane ka natuin fa in namnau amamu'it sin, mes natuin in abakat kun. Fe fe'at in nait noni na'ko kas le in anpao.

⁷Usif Yesus nak, “Maut he in mo'e lasi i fun namnau neno hen panola Kau.

⁸Fun atoni amamu'it sin nok ki piut, mes Au of ka ok ki fa piut.”

⁹Atoni Yahudi namfaun sin nen nak Yesus anbi nane, oke te sin nem neu In. Sin neman ka al fa natuin Yesus, mes natuin he nit Nai Lazarus le In nafena na'ko amates.

¹⁰Oke te Ana' fuat knino nakaf sin anmalomin he namate Nai Lazarus amsa,

¹¹fun natuin in, atoni Yahudi namfaun nasaitan sin ma anpalsai neu Yesus.

¹²Nokfa onane leka atoni amfaun le neman neu tolas nane sin nen, nak Yesus fe es lalan he nem neu Yerusalem.

¹³Es nane te sin naitin bone no' ma anpoin hen senu In ma sin anhunun nak, “Ampules Uisneno! Nahoeb alekot neu In le ankoenon nem bi Uisneno tunan In kanan, Kesel to Israel!”

¹⁴Yesus napeni bikase luke mnanu tipu mese oke te In antunon neun onle antui nalali nak,

¹⁵“Kais mimtau, hoi feotnai Sion, mail, hi Kesel ankoenon nemen, antunon neu bikase tipu luke mnanu.”

¹⁶Asimo lasi sin ka nahinef lasi nane, mes leka nalatan nalali Yesus, sin namnau nit, nak tuis nane antom neu In. Ma sin anmo'e nalali amsa neu In.

¹⁷Atoni amfaun le sin nok In, bi neno In no'en napoitan Nai Lazarus na'ko naukel ma nafena in na'ko amates, sin ansaksi nani antom In.”

¹⁸Es nane atoni amfaun nane sin nao hen senu In, fun sin nen, nak In es anmo'e lasi amkakat nane.

¹⁹Ma atoni Farisi sin na'uaben es neu es nak, “Hi mit kim meki hi matam, nak hi ka mibe'i fa he mo'e sa', mail pah pinan ok-oke nao natuin In.

²⁰Anbi ale atoni le a'naon hen onen toti bi neno tolas nane anmu'i atoni Yunani sin fauk amsa.

²¹Atoni nane sin neman neu Nai Filipus, le na'ko Betsaida pah Galilea ma natan neune nak, “Bae, haim lomi he mie'ku mok Yesus.”

²²Nai Filipus in nao ma anetun Nai Andreas. Oke te sin nua sin nem ma anetun lasi nane neu Yesus.

²³Mes Yesus natae sin nak, “Leku antelen he nati' nalatan Anmone Pah To.

²⁴Au ak neu ki: Leka ane fua mese kan mofu fa neu nain ma anmate, in mese nabala. Mes leka in anmate of in napoitan fuan namfau.

²⁵Atoni le a'nek in monin, of in naneku in monin. Mes atoni le ka nekaf in monin bi pah pinan i, of in anpanat nani neu honis nabal-bal.

²⁶Atoni le anlomi hen tuthae Kau, in mes natuin Kau; he nati' Au bi me te Au atuthaes amsa anbi nane. Atoni le antuthae Kau, of Au Ama naliatas nani.

²⁷Le'ku i, Au monik nanu'on ma Au he ak sa' ka? Ama, mufetin Kau na'ko tabu i ka? Kahaf, fun natuin lasi nane Au aum eu leku i.

²⁸Ama, munaeb Ho kanam nai.” Oke te sin nen hanaf na'ko neno tunan nak, “Au unaeb ulali In, ma of Au unaeb In anteni.”

²⁹Atoni amfaun le anhake anbi nane, sin nen hanaf nane, sin nak nane lotos napunu. Mes bian sin nak, “Ahake neno tunan es na'uab nok In.”

³⁰Usif Yesus natae sin nak, “Hanaf nane ka neu fa Au, mes neu ki.

³¹Tomas i nanaob lef lasi neu pah pinan i. Tomas i amsa anpolin napoitan kuasat pah pinan.

³²Ma Au, leka na'aiti Kau na'ko pah pinan, of Au hel eki atoni sin nem neu Kau.”

³³In na'uab onane, he nalile Ini maten onme ka?

³⁴Oke te atoni amfaun nane sin natae nak, “Haim nen milali Plenat Knino nak, Neno Anan anmoni nabala talan te nabal-bal. Leka me Ho mu'uab mak of na'ati Anmone Pah To ka? Anmone Pah To nane sekau kun ka?”

³⁵Yesus nak neu sin, “Meusine anbi hi atnanam al leku tuk es. Leka meusine nane fe anbi ki, ampalsai nai neu In, he nati' mesokan kais ankub ki. Atoni le na'oinson anbi mesokan in ka nahin fa he nao neu me.

³⁶Him palsai nai neu meusine, leka meusine anbi ki, he nati' him fani anah-anah meusine.” Leka namolok nalali onane, Yesus anpoi ma ka nalile fa In aon neu sin.

³⁷Usif Yesus anmo'e lasi amkakat namfau anbi sin matan, mes sin kan palsain fa neu In.

³⁸He nati' a'at le Mafefa Knino Nai Yesaya na'uab nani natiabon kun nak, “Uisneno, sekau es hen palsai neu hai a'at nane ka? Ma Uisneno tunan In nukun akuasat natonon neu sekau ka?”

³⁹Es nane te sin kan palsain fa fun Nai Yesaya na'uab nalali nak,

⁴⁰“In nafolob nalali sin matan, ma namanub sin nekan, he nati' kais sin nit neki sin matan, ma natenab neki nekan, oke te anfani neman, he nati' Au uleko' sin.”

⁴¹Nai Yesaya na'uab lasi, fun in nit nalali In apinat ma na'uab antom In.

⁴²Anmu'i atopu to Yahudi namfau le anpalsai neu In, mes natuin atoni Farisi sin, sin ka naton fa mat-mat, he nati' kais anpolin napoitan sin na'ko Ume onen totis.

⁴³Fun sin lomi he nanaeb mansian nesi na'ko nanaeb Uisneno.

⁴⁴Oke te Yesus anhunun nak, “Atoni le anpalsai neu Kau, nane in kan palsai fa neu Kau, mes neu In le ansonu Kau.

⁴⁵Ma atoni le in nit Kau, nane in nit In le ansonu Kau.

⁴⁶Au aum eu pah pinan on meusine, he nati' ale atoni le anpalsai neu Kau, kais nabala anbi mesokan.

⁴⁷Ma atoni le amnen Au a'ak ma ka natuinef, Au ka lefi fa in lasi. Fun Au aum ka neu fa hel lefi pah pinan in lasi mes he umonib ani.

⁴⁸Atoni le antite Kau ma kan simof Au a'ak, anmu'i alef lasi neu in. A'at le Au uton ulali, of anfani in alef lasi bi Neno Amsoput.

⁴⁹Fun Au uab nane ka na'ko fa Au, mes na'ko Ama le anlelu Kau. In kun es naplenat Kau sa' le Au he u'uab ani ma utiaba ani.

⁵⁰Ma Au uhin, ak Ini plenat nane lo honis nabal-bal. Es nane sa' le Au u'uab, Au utiaba onle Ama in nakua a'an neu Kau.”