Read Uab Meto YOHANES 13 Bible Online

YOHANES 13 - Uab Meto bible

YOHANES 13

¹Nahunu na'ko Neno Tolas Paskah he nanaobon, Yesus nahin nak In leku antelen he nati' In nasaitan pah pinan i ma anfani neu In Amaf. Onle In nek In asimo lasi sin, onane amsa In nek sin tal namsopun.

²Sin fe anbukae nabuan nok Yesus. Nitu antam neu Nai Yudas Iskariot le Nai Simon Iskariot anmone in nekan hen aneb Yesus.

³Yesus nahin, nak In Amaf nana'at nalali ale sa' neu In. Ma In nahin amsa In nem na'ko Uisneno ma of anfain neu Uisneno.

⁴Oke te Yesus anfen ma nauf napoitan In sobalu. In naiti piul muti ma anfutu nani neu In atnanan.

⁵Nalali te In antesi oe neu topa, ma anboe In asimo lasi sin haekenu ma nose nameto neki piul muti le anfutnon bi In atnanan.

⁶Leka In nem ante Nai Simon Petrus, Nai Simon Petrus nak neu In, “Uisneno, Ho hem boe au haek ka?”

⁷Yesus natae neune nak, “Lasi le Au he mo'e, ho ka muhinef, mes namuni te of ho muhine.”

⁸Nai Petrus nak neu In, “Uisneno, of Ho kam boef au haek talan te nabal-bal.” Usif Yesus natae nak, “Kalu Au ka boef Ho haem, of ho ka mupeni fa pa' anbi Kau.”

⁹Nai Simon Petrus nak neu In, “Kalu onane Uisneno, kais al au haek mes au nimak ma au nakak nok!”

¹⁰Yesus natae neune nak, “Atoni le naniu nalali, in aone muti. Es nane kais in naniu anteni. So al atboe in haen. Ma hi amsa muti ki, mes ka ala ki fa.”

¹¹Fun In nahin nalali, sekau of es nana'at In. Es nane te In nak, “Hi ka muti fa ala ki.”

¹²Leka In anboe nalali sin haekenu, In anpaek nafani In sobalu ma anfain neu In balan. Oke te In nak neu sin, “Hi mihin lasi le Au mo'e neu ki ka?

¹³Him tek Kau mak, Anoni ma Usif. Namneo onane, fun Au Anoni Kau ma Au Usif Kau.

¹⁴Kalu Au on hi Uisneno ma hi Anoni, Au boe hi haem, hi amsa mes a'maboe haem es nok es.

¹⁵Fun Au fe ki leta mese, he nati' hi amsa amo'e onle Au mo'e ulali neu ki.

¹⁶Au ak ki: Namneo atuthaes mese ka nesin fa in Usif, ai haef ka nesin fa in le ansonu nani.

¹⁷Leka hi mihin lasi i, alekot neu ki kalu hi mo'e mani.

¹⁸Au ka u'uab fa neu ki ala ki. Au uhin, sekau le Au beti ulali. Mes he natis a'at i: Atoni le anbukae Au utunu' nane, in naiti haen tikan neu Kau.

¹⁹Au u'uab lasi i neu ki tomas i, nahunu na'ko lasi nane anbol. He nati' leka lasi nane anbol, hi nekam nateb knino, nak: In kun esle' Au.

²⁰Au ak ki, namneo: Sekau ansimo atoni le Au sonu ani, in ansimo Kau. Ma sekau ansimo Kau, in ansimo In le ansonu Kau.”

²¹Leka Usif Yesus na'uab nalali onane te In nekan antu' ma ansaksi nak, “Au ak ki, tebes atoni mese anbi ki of nana'at Kau.”

²²Oke te asimo lasi sin anmakison es neu es, fun sin natenab, In uab nane antom neu sekau ka?

²³In asimo lasi mese le In nek nisan, napesion neu In aon bian a'ne'u.

²⁴Nai Simon Petrus antian matan neune ma nak, “Ati Hom toti mit, In na'uab neu sekau ka?”

²⁵Asimo lasi nane naklelon ma nak neu In, “Uisneno, sekau kun ka?”

²⁶Yesus natae nak, “Atoni le Au he fene utunu' le Au lep ani bi mako', in esle' nane.” Oke te in naiti utunu' ma anlep nani ma anfe neu Nai Yudas, Nai Simon Iskariot in anmone.

²⁷Leka Nai Yudas ansimo nalali utunu' nane, Nitu antam neu in nekan. Oke te Yesus nak neune, “Sa' le ho he mo'e, mo'e mani nai lab-lab.”

²⁸Mes katit fa atoni mese anbi sin le antoko anbi nane nahin sa' le Yesus na'uab nani neu Nai Yudas.

²⁹Fun Nai Yudas in es anpao aul noni, es nane bian sin natenab, oni Yesus anlelu hen sos sa'-sa' neu tolas nane, ai hen fe sa' neu amamu'it sin.

³⁰Nai Yudas ansimo utunu' nane, oke te in anpoi. Ma neno anfaien.

³¹Leka Nai Yudas anao, Yesus nak, “Tomas i nanaeb Anmone Pah To ma nanaeb Uisneno anbi In.

³²Kalu nanaeb Uisneno anbi In, of Uisneno nanaeb In amsa anbi In. Ma Uisneno of nanaeb In lab-lab.

³³Hoi Au anhin, Au ubua ok ki al leku tuk es. Of hi maim Kau, onle Au u'uab neu atoni Yahudi sin: Au nao bi me te, hi ka mibe'i fa he aim meune, es nane te Au uton ain ki esle' i.

³⁴Au fe ki plenat fe'u mese, he nati' hi manek es nok es. Onle Au nek ki, hi amsa amanek es nok es.

³⁵Leka hi manek es nok es, of ale atoni nahin, nak Au asimo lasi ki.”

³⁶Nai Simon Petrus nak neu Yesus, “Uisneno, Ho hem nao meu me ka?” Yesus natae nak, “Au he nao eu me te, ho ka mube'i fa he mutuin Kau esle' i, mes namuni te of ho mutuin Kau.”

³⁷Nai Petrus nak neu In, “Uisneno, nansa' ka es ka nabe'i fa au utuin Ko esle' i? Au he una'at au monik neu Ko.”

³⁸Yesus natae nak, “Ho he muna'at ho monim neu Kau ka? Tebes Au ak ko: Nahunu na'ko manu ankokle'o, ho mutotan mulali Kau haef tenu.”