Read Uab Meto YOHANES 14 Bible Online

YOHANES 14 - Uab Meto bible

YOHANES 14

¹“Kais hi mi'unu nekam, so ampalsai neu Uisneno ma ampalsai neu Kau nok.

²Anbi Au Ama In ume anmu'i bale namfaun. Bait ka on fa nane, Au ka uton ki fa. Fun Au he nao eu bale nane he uloitan bale neu ki.

³Leka Au nao eu bale nane ma uloitan ulali bale neu ki, of Au fain aum ma ok ki neu Au bale, he nati' Au bi bale me, hi amsa ambin.

⁴Ma Au nao eu me te, hi mihin lanan nane.”

⁵Nai Tomas nak neu In, “Uisneno, hai ka mihin fa Hom nao meu me. Es nane hai he mihin lanan nane onme ka?”

⁶Usif Yesus nak neune, “Lanan he mihin Uisneno ma mipeni honis esle' Au. Katit fa atoni mese le he nem neu Ama, kalu ka nao natuin Kau fa.

⁷So hi mihin Kau, of hi mihin Au Ama amsa. Na'ko tomas i hi mihin In ma hi mit milali In.”

⁸Nai Filipus nak neu In, “Uisneno, amlekan kai Ama nane he nati' hai malin.”

⁹Usif Yesus nak neune, “Filipus, Au umaika ok ki lalob, mes ho ka muhin Kau fa ka? Atoni le in nit Kau, in nit nalali Ama. Leka me ho mak: Amlekan kai Ama nane.

¹⁰Ai ho kam palsai fa ka, mak Au bi Ama ma Ama anbi Kau ka? Sa' le Au uton ki, nane ka na'ko fa Au aok, mes Ama le anbi Kau, In es nanaoba kun In mepu.

¹¹Him palsai nai neu Kau, fun Au bi Ama ma Ama anbi Kau. Ai so him palsai nai, fun ale mepu nane sin.

¹²Au ak ki: Tebes, atoni le anpalsai neu Kau, of in nanaoba ale Au mepu sin, ma ale mepu le a nesi na'ko nane. Fun Au he nao neu Ama.

¹³Ma ale sa' le him toti ambi Au kanak, of Au mo'e ani, he nati' nanaeb Ama anbi An mone.

¹⁴Leka him toit sa' neu Kau anbi Au kanak of Au mo'e ani.”

¹⁵“Kalu him nek Kau, of hi mituin Au plenat sin.

¹⁶Of Au toti Ama ma of In anfe ki Atuntakus bian, he nati' In nok ki talan te nabal-bal,

¹⁷esle' Smanaf Amneot. Pah pinan ka nabe'i fa hen simo In fun sin ka nitef ma ka nahinef. Mes hi mihine, fun In nok ki ma of nabala anbi ki.

¹⁸Au of ka usaitan ki fa on anmanat ma anlaleb. Au fain aum eu ki.

¹⁹Al neon tuk es, pah pinan ka nit anteni Kau fa, mes hi mit Kau, fun Au moni ma of hi moni.

²⁰Bi neno nane of hi mihin, mak Au bi Au Ama, ma him bi Kau ma Au bi ki.

²¹Atoni le ansimo Au plenat ma anmo'e nani, in es a'nek Kau. Ma sekau nek Kau, Au Ama of a'nek in ma Au amsa of nek in ma of Au ulilok eune.”

²²Nai Yudas, le ka Nai Yudas Iskariot nak neu Yesus, “Uisneno, nansa' es Ho he mulile Ho aom meu kai ma ka neu fa pah pinan?”

²³Yesus natae nak, “Atoni le in nek Kau, of in natuin Au a'at ma Au Ama of In nek nani, ma of Hai aim meu in ma mibua mok in.

²⁴Atoni le in ka nek Kau, in ka natuin fa Au a'at. Ma a'at le him nen nane ka na'ko Kau fa, mes na'ko Ama le ansonu Kau.

²⁵Ale lasi nane Au u'uab ani neu ki, leka Au fe ok ki.

²⁶Mes Smanan Knino Atuntakus le Ama of ansonu nani anbi Au kanak. Of In nanoina ki ale sa' ma namnauba ki ale sa' le Au u'uab ulali neu ki.

²⁷Au ubela ki tetus ma aomina. Au fe ki Au tetus aomina. Ma sa' le Au fe ki, ka on fa le pah pinan anfe ki. Hi nekam kais na'unu ma kais mimtau.

²⁸Him nen milali, le Au u'uab neu ki ak: Of Au nao, mes of Au fain aum eu ki. Bait him nek Kau, of hi mimlil, fun Au nao neu Au Ama, natuin Ama In nesin Kau.

²⁹Au eut ain ki esle' i, nahunu na'ko lasi nane anbol, he nati' leka lasi nane anbol, him palsai nai.

³⁰Au ka u'uab a'tenif namfau ok ki, fun akuasat pah pinan nemen. Mes in kan mu'if kuasat neu Au aok.

³¹Maut he pah pinan nahin, Au nek Ama, ma Au mo'e ale sa' onle Au Ama naplenat nani neu Kau. Him fen nai ma hit nao nai ta'ko bale i.”