Read Uab Meto YOHANES 15 Bible Online

YOHANES 15 - Uab Meto bible

YOHANES 15

¹Usif Yesus nak, “Au le i tanu'an sena amneot in un ma Au Ama In hau tuaf kun.

²Ale tlaef le anbi Kau, ma ka nafuaf, In oet nisan, mes ale tlaef le nafua, In nakbala nani he nafua nes.

³Hi muti ki, fun a'at le Au u'uab ulali neu ki.

⁴Mibala nai ambi Kau ma Au bi ki. Onle hau tlaef le ka nafua anmes kun so nabala anbi tanu'an sena in un. Onane amsa hi ka mifuaf kalu hi ka mibala fa ambi Kau.

⁵Au le i tanu'an sena in un, ma hi le i tlaef ki. Atoni le nabala anbi kau ma Au ubala anbi in of in fuan nane namfaun. Fun hi ka mibe'i fa he mo'e sa' amkoit Kau.

⁶Atoni le ka nabala fa anbi Kau, anpolin napoitan onle hau tlaef ma anmate. Nalali te atoni nabuab nani ma anpolin natam nani neu ai, oke te anput.

⁷Leka hi mibala ambi Kau ma Au a'ak nane nabala anbi ki, him loim sa' te amtoti nai, ma of anfe nani neu ki.

⁸Leka hi mifua namfau, of nanaeb Au Ama, ma natuin lasi nane, him fani Au asimo lasi.”

⁹“Onle Ama In nek Kau, onane amsa Au nek ki. Mibala nai ambi Au manekat nane.

¹⁰Kalu hi mituin Au plenat, of hi mibala ambi Au manekak. Onle Au utuin Au Ama Ini plenat ma ubala a bi In manekan.

¹¹Au uton ale lasi i neu ki, he nati' Au amlilat nane anbi ki ma hi amlilat nane nanokbon.

¹²Au fe ki plenat i, he nati' hi manek es nok es. Onle Au nek ulali ki.

¹³Katit fa lasi manekat le a nesin na'ko atoni le nana'at in monin neu in bae benu sin.

¹⁴Au bae benu esle' hi, kalu hi mo'e ale sa' le Au uplenat neu ki.

¹⁵Au ka tek a teni ki fa ak ate, fun ate nane in ka nahin fa sa' le in tuan anmo'e. Mes Au tek ki ak bae, fun Au eut ulali neu ki, sa' le Au nen na'ko Au Ama.

¹⁶Fun hi es kam beti Kau fa, mes Au es a beti ki. Ma Au uki'ab ki, he nati' him nao nai ma mifua nai ma hi fuam nane nabala. He nati' him toti sa' na'ko Ama anbi Au kanak, In anfe nani neu ki.

¹⁷Au fe ki plenat i, he nati' hi manek es nok es.”

¹⁸“Kalu pah pinan na'unu nekan neu ki, mimnau nai, nak afi pah pinan na'unu nekan nahunu neu Kau.

¹⁹Bait hi mi'ko pah pinan of a nek ki on in ini ki. Mes hi ka mi'ko fa pah pinan, fun Au beti ulali ki na'ko pah pinan es nane pah pinan na'unu nekan neu ki.

²⁰Mimnau nai, sa' le Au uton ulali ki. Ate nane ka nesin fa in tuan. Kalu sin anli'u Kau, of sin anli'u ki amsa. Kalu sin natuin Au a'at, of sin natuin hi a'at amsa.

²¹Mes sin anmo'e lasi nane neu ki natuin Au kanak fun sin ka nahin fa In le ansonu Kau.

²²Bait Au ka aum fa ma ka u'uab fa neu sin, of sin kan mu'in fa sanat. Mes tomas i sin kan mu'in fa uab he nabonat ai naputi sin sanat.

²³Atoni le na'unu nekan neu Kau, in na'unu nekan neu Au Ama amsa.

²⁴Bait Au ka mepuf sa' bi sin atnanan onle katit fa atoni bian anmo'e nani, of kan mu'in fa sanat. Mes tomas i sin nit nalali ale sa', mes sin na'unu nekan neu Kau ma neu Au Ama amsa.

²⁵Mes lasi nane he natis nani a'at le antui nalali anbi sin Plenat Knino nak: Sin na'unu nekan neu Kau son-sona.

²⁶Of Au sonu neu ki Amela na'ko Ama, esle' Smanan Amneot, le anpoi na'ko Ama, of In saksi neu Kau.

²⁷Mes hi amsa mes amsaksi, fun afi unun hi mok Kau.”