Read Uab Meto YOHANES 16 Bible Online

YOHANES 16 - Uab Meto bible

YOHANES 16

¹“Au eut ain ki ale lasi i, he nati' kais him tite Kau.

²Of sin napoitan ki na'ko ume onen totis. Ma leka leku nane anbol, ale atoni le sin namate ki, sin natenab nak sin mo'e luli besa neu Uisneno.

³Sin mo'en onane natuin sin ka nahin fa Ama nane ma Au amsa kahaf.

⁴Mes Au eut ki ale lasi i, he nati' leka In leku anbol te hi mihin, mak Au eut ulali neu ki.” “Au ka eut ki fa lasi na'ko neno ahunut, fun tomas i Au fe ubua ok ki.

⁵Mes tomas i Au he nao eu In, le ansonu Kau. Mes katit fa atoni mese anbi ki le natan Kau nak: Ho hem nao meu me ka?

⁶Mes natuin Au eut ki lasi nane, es nane te hi nekam antu'.

⁷Mes namneo le Au eut ki lasi: Leko nesi neu ki leka Au nao. Fun kalu Au ka nao, Atuntakus nane of ka nem fa neu ki. Mes leka Au nao of Au sonu In neu ki.

⁸Ma leka In nem of In nabe'ab pah pinan neu sanat, amneot ma lef lasi;

⁹antom sanat, fun sin kan palsai Kau fa;

¹⁰neu amneot, fun Au nao neu Ama hi ka mit amteni Kau fa;

¹¹neu lef lasi, fun anlef nalali; akuasat pah pinan i in lasi.

¹²Fe anmu'i lasi namfaun le Au he eut ki, mes tomas i hi fe kam sutai mibe'if.

¹³Mes leka Smanan Amneot nem, of In topu ki neu amneot, fun In of ka na'uab fa na'ko In aon, mes sa' le In nen of In na'uab nani ma In an etu ki neu ale lasi le of anbol.

¹⁴Of In nanaeb Kau, fun In an etu ki sa' le In ansimo na'ko Kau.

¹⁵Fun ale sa' le Au Ama ini, nane Au ini. Es nane Au tak ki: Of In an etu ki sa' le In ansimo na'ko Kau.”

¹⁶“Ala kle'o te hi ka mit amteni Kau fa, ma ala kle'o anteni of hi mit Kau.”

¹⁷Leka sin nen lasi nane te In asimo lasi sin na'uaben es nok es nak, “In na'uab neu kit on i neu sa' ka? Ala kle'o te hi ka mit amteni Kau fa, ma ala kle'o anteni of hi mit Kau. Ma Au nao neu Ama.”

¹⁸Sin nak anteni, “In nak sa' ka antom a'at ala kle'o? Hit ka tahin fa In lomin nane he sa'.”

¹⁹Yesus nahin, nak sin he natan In neu sa' es, es nane te In nak neu sin, “Ai hi mi'uab es nok es neu lasi le Au ak ki: Ala kle'o te hi ka mit amteni Kau fa, ma ala kle'o anteni of hi mit Kau?

²⁰Au ak ki: Tebes of hi amkae ma amkul, mes pah pinan of namlil. Of him susal mes hi susal nane anfani amlilat.

²¹Leka bife mese he nahoni, in nekan ansusal, mes leka in nahoin nalali in anah, in ka namnaun tenif susal nane, fun in namlil neu nahonis mansian mese neu pah pinan.

²²Onane amsa neu ki. Leku i him susal, mes leka Au mit amteni ki, hi nekam of namlil, ma katit fa atoni mese he nasik nan hi amlilat nane.

²³Ma anbi neno nane of hi ka mitan fa sa' neu Kau. Au ak ki: Tebes sa' le him toti neu Ama anbi Au kanak of In anfe nani neu ki.

²⁴Talan te leku i hi kam totif sa' anbi Au kanak. Him toti nai, ma of him simo, he nati' hi amlilat nane nanokbon.

²⁵Au u'uab ale lasi i neu ki eki leta. Mes leka In leku ante, Au ka u'uab a tenif eki leta, mes of Au u'uab muti monas neu ki antom Ama.

²⁶Bi neno nane of him onen toti anbi Au kanak. Es nane mihin nai, of Au ka totif na'ko Ama neu ki.

²⁷Fun Ama In nek ki, natuin him nek Kau ma ampalsai, ma Au aum u'ko Uisneno.

²⁸Au aum mu'ko Ama, ma Au aum meu pah pinan. Es nane, Au usaitan pah pinan ma nao neu Ama.”

²⁹In asimo lasi sin nak, “Kiso, tomas i Uisneno mu'uab muti ma Ho ka mu'uab fa meki leta.

³⁰Ma hai mihin, mak Ho muhin kum ale sa'. Ma ka nabe'if atoni natan sa' neu Ko. Es nane te haim palsai, mak Ho aum mu'ko Uisneno.”

³¹Usif Yesus natae sin nak, “Hi nekam nateb knino ka?

³²Kiso In leku anbol, ma anbol nalalien, of nasitab ki mese-mese neu in balan ma hi misaitan Kau Au mes. Mes Au ka mesef, fun Ama nok Kau.

³³Au u'uab ale lasi i neu ki, he nati' hi mipeni tetus aomina anbi Kau. Of hi mipeni hamu'it bi pah pinan, mes mimepan hi nekam. Au is ulali pah pinan.”