Read Uab Meto YOHANES 17 Bible Online

YOHANES 17 - Uab Meto bible

YOHANES 17

¹Leka Usif Yesus na'uab nalali onane te, In anbaisenu neu neno tunan ma nak, “Ama, leku antelen, munaeb nai Ho Anmone, he nati' Ho Anmone nanaeb Ko.

²Onle Hom fe mulali neu In kuasat neu ale amonit, onane amsa of In fe honis nabal-bal neu sin le Hom fe mulali neu In.

³Lasi honis nabal-bal esle' i, he nati' sin nahin Ko, Uisneno amneot lo mese, ma nahin Yesus Kesel Afetin le Hom sonu.

⁴Au unaeb ulali Ko bi pah pinan, fun Au meup ulali ale mepu le Hom fe Kau sin.

⁵Es nane koi Ama, munaeb Kau nai ambi Ko meki apinat le Au mu'i ani anbi Ho matam nahunun na'ko pah pinan anhake.

⁶Au ulile ulali Ho kanam neu ale atoni, le Hom fe Kau sin na'ko pah pinan. Fun sin le nane Ho ini kum, ma Hom fe mulali sin neu Kau ma natuin nalali Ho a'am.

⁷Tomas i sin nahinen, nak ale sa' le Hom fe Kau sin nane na'ko Ama.

⁸Fun ale a'at le Ho mutiaba neu Kau, Au utiaba ulali neu sin ma sin ansimo nalali. Sin nahinen namneo, nak Au aum mu'ko Ama, ma sin anpalsai, nak Ho es amsonu Kau.

⁹Au onen toti neu sin. Au ka onen toti fa neu pah pinan, mes Au onen toti neu sin le Ama Hom fe mulali sin neu Kau. Fun sin le nane Ho ini kun.

¹⁰Ma ale sa' le Au ini, nane Ama ini, ma sa' le Ama ini, nane Au ini ma nanaeb Kau anbi sin.

¹¹Ma Au ka bi tenif pah pinan, mes sin bi pah pinan, ma Au et eu Ko. Koi Ama, le'u knino, ampanat sin bi Ho kanam, le Hom fe mulali neu Kau, he nati' sin fani mese onle Hit.

¹²Leka Au fe ok sin, Au panat sin bi Ho kanam, le Hom fe mulali neu Kau. Au panat sin, ma katit fa atoni mese anbi sin le namle'u, al in le anlek nani neu amle'ut, he nati' natiaba nani tuis anbi Sulat Knino.

¹³Mes tomas i, Au et eu Ko ma uton ale lasi i, leka Au fe bi pah pinan, he nati' Au amlilat nanokbon kun anbi sin.

¹⁴Au fe ulali Ho a'am neu sin ma pah pinan, onle Au amsa ka u'ko fa pah pinan.

¹⁵Au ka totif he nati' Ho mait sin na'ko pah pinan mes he nati' Ho mumafo sin na'ko amle'ut in tuaf.

¹⁶Sin ka na'ko fa pah pinan, onle Au amsa ka u'ko fa pah pinan.

¹⁷Muknino sin bi Ho amneot, fun Ho a'am nane amneot kun.

¹⁸Onle Hom sonu Kau neu pah pinan, onane amsa Au sonu sin neu pah pinan.

¹⁹Ma Au uknino Au aok neu sin, he nati' naknino sin bi amneot.

²⁰Ma Au onen totis ka al fa neu sin, mes neu ale atoni le sin anpalsai neu Kau natuin sin saksit.

²¹He nati' sin alsin anfani mese onle Ho, koi Ama, anbi Kau ma Au bi Ko, he nati' sin amsa anbi Hit. Oke te pah pinan anpalsai nak Ho es amsonu Kau.

²²Ma Au fen sin apinat le Hom fe Kau, he nati' sin anfani mese, onle Hit amsa mese.

²³Au bi sin ma Hom bi Kau, he nati' sin nanokbok anfani mese, he pah pinan nahin, nak Ho es ansonu Kau ma Hom nek sin onle Hom nek Kau.

²⁴Koi Ama, Au lomi he nati' sin, le Hom fe Kau sin, sin nabua nok Kau anbi bale le Au bine, he nati' sin nit Au apinat le Hom fe neu Kau. Fun Hom nek Kau nahunu na'ko pah pinan najalibon.

²⁵Koi Ama amneot! Pah pinan ka nahin Ko fa, mes Au uhin Ko. Ma sin le i nahin, nak Ho es ansonu Kau.

²⁶Au uton ulali Ho kanam neu sin ma of Au uton piut, he nati' manekat le Hom fe Kau nabala anbi sin ma Au amsa umesbok ok sin.”