Read Uab Meto YOHANES 18 Bible Online

YOHANES 18 - Uab Meto bible

YOHANES 18

¹Leka Usif Yesus anonen toti nalali onane te, In anpoi na'ko bale nane ma nok In asimo lasi sin anlakan neu Noe Kidron panin. Bi nane anmu'i po'an mese, ma In nok In asimo lasi sin antaman neu po'an nane.

²Nai Yudas le ana'neb Yesus, nahin bale nane amsa, fun fe-fe'at Usif Yesus nok In asimo lasi sin nabuan anbi bale nane.

³Nai Yudas amsa nem neu bale nane nok solalus puknes ma ale atoni le anpao Ume Uisneno. Fun Ana' fuat knino nakaf sin ma atoni Farisi sin es anlelu sin, sin nekin paku, nopo ma suni.

⁴Usif Yesus nahin ale sa' le hen bol neu In, es nane In fonat nu ma nak neu sin, “Hi maim sekau ka?”

⁵Sin natae nak, “Yesus atoni Nazaret.” In nak neu sin, “Au es Kau i.” Nai Yudas le ananeb In, anhake nok sin anbi nane amsa.

⁶Leka Yesus nak neu sin, “Au es Kau i,” sin naskotun ma natselan neu najan.

⁷Ma In natan anteni nak, “Hi maim sekau ka?” sin natae nak, “Yesus atoni Nazaret.”

⁸Yesus natae nak, “Au uton ulali ki ak, Au es Kau i. Kalu hi maim Kau, maut he ale i sin naon.”

⁹Yesus na'uab onane he natis a'at le In naton nani nak, “Katit fa atoni mese anbi sin le Ho muna'at sin neu Kau, Au umautu he namle'u.”

¹⁰Oke te Nai Simon Petrus, le neki suni, in nosu suni nane ma nanana' neu Ana' Lasi Fuat Anaet in ate ma ansaip nafek in luken a'ne'u. Ate nane in kanan Nai Malkhus.

¹¹Usif Yesus nak neu Nai Simon Petrus, “Mutap mufani ho suni nane! Ai ho mutenab mak, Au he ka inuf klas mninut le Au Ama anfe nani neu Kau ka?”

¹²Oke te solalus sin nok sini nakaf ma atoni apaot sin le atoni Yahudi anlelu sin anheke Yesus ma anfutu In.

¹³Oke te sin neki Yesus nao nahunu neu Nai Hanas fun Nai Hanas nane Nai Kayafas in babaf, le anfani Ana' Lasi Fuat Anaet bi ton nane.

¹⁴Ma Nai Kayafas nane anfainek atoni Yahudi sin nak, “Leko nesi atoni mese anmate neu to ok-oke.”

¹⁵Nai Simon Petrus nok asimo lasi bian mese sin natuin Yesus. Asimo lasi nane nahin Ana' Lasi Fuat Anaet in sonaf po'an.

¹⁶Mes Nai Petrus nabala anbi mone anhaumak eno. Asimo lasi bian nane, le nahin Ana' Lasi Fuat Amnanut anpoi neu mone ma namolok nok bife apao eno nane he nok Nai Petrus antam.

¹⁷Ate bife apao eno nane nak neu Nai Petrus, “Ait ho amsa atoni nane in asimo lasi ka?” Nai Petrus natae nak, “Kahaf.”

¹⁸Fun bi leku nane mainikin, es nane te, ate sin ma apao Ume Uisneno sin nahopin ai ma anhaken hen lalan ai bi nane. Nai Petrus amsa anhake ma anlal ai nok sin.

¹⁹Oke te Ana' Lasi Fuat Anaet natan Yesus antom In asimo lasi sin ma antom In lasi noina.

²⁰Yesus natae neune nak, “Au u'uab mat-mat neu pah pinan. Au unoina piut bi ume onen totis ma anbi Ume Uisneno, le atoni Yahudi sin nem nabuan anbin. Au ka u'uab fa sa' anbi bale tolo'.

²¹Ho mutan Kau neu sa' ka? Mutan neu sin le sin nen nalali sa' le Au u'uab neu sin.”

²²Leka In na'uab onane te, atoni apaot le anhake anbi nane, anpas Yesus human ma nak, “Ho mutae Ana' Lasi Fuat Anaet onane ka?”

²³Yesus natae neune nak, “Kalu Au u'uab san, ame'ut Kau in sanat. Mes kalu Au uab nane namneo, hom pas Kau neu sa' ka?”

²⁴Nai Hanas ansonu In nok mafutu neu Nai Kayafas, Ana' Lasi Fuat Anaet nane.

²⁵Nai Simon Petrus fe anhake anlal ai. Atoni le nane nak neune, “Bae, ho amsa In asimo lasi ka?”

²⁶In na'tot, ma nak, “Kahaf.” Ana' lasi fuat anaet in ate mese le anmafamili nok ate le Nai Petrus ansaip nafek in luken nak, “Ait afi au ka it ko fa anbi po'an nane le ho mok In ka?”

²⁷Nai Petrus na'tot anteni, ma bi leku nane manu ankokle'o.

²⁸Oke te sin neki Yesus na'ko Nai Kayafas neu ume lef lasi. Tomas nane fe nok-noka. Sin kan taman fa neu ume lef lasi, he nati' kais neki hainisit neu sin aon, fun sin hen bukae Paskah.

²⁹Es nane Nai Pilatus anpoi neu sin ma nak, “Hi meki lasi sa' ka antom atoni i?”

³⁰Sin natae neu in nak, “Bait In ka atoni abulalut fa, hai ka mina'at fa In neu ama!”

³¹Nai Pilatus nak neu sin, “Hi mokan hem nao ma mifek In lasi natuin hi plenat knino.” Atoni Yahudi sin natae nak. “Hai ka mu'if mainuan he mimate atoni.”

³²Lasi anbol onane he nati' natiaba Yesus In a'an le In nau'ab nani, neu he namate In onme.

³³Nai Pilatus antam anfani neu ume lef lasi oke te anboin Yesus ma natan neu In nak, “Ai Ho Usif Ko neu atoni Yahudi sin ka?”

³⁴Yesus natae nak, “Ho mu'uab lasi i na'ko ho nekam ka, ai atoni bian es naton ko antom Kau ka?”

³⁵Nai Pilatus nak, “Ai au atoni Yahudi kau ka? Ho to ma Ana' fuat knino nakaf sin es nana'at Ko neu kau. Ai Ho mo'e sa' ka?”

³⁶Yesus natae nak, “Au plenat ka na'ko fa pah pinan i. Fun kalu Au plenat na'ko pah pinan i, Au ini sin of natau Kau, he nati' kais nana'at Kau neu atoni Yahudi. Mes Au plenat ka na'ko fa pah pinan i.”

³⁷Nai Pilatus nak neu In, “Kalu onane Ho Kesel Ko.” Usif Yesus natae nak, “Ho mak, Au le i Kesel Kau. Natuin lasi nane, nahonis Kau ma Au aum eu pah pinan i, he nati' Au saksi antom lasi amneot. Atoni le na'ko amneot, in nen Au hanak.”

³⁸Nai Pilatus nak neu In, “Lasi amneot nane esle' sa' ka?” Leka na'uab nalali onane te, Nai Pilatus anpoi neu atoni Yahudi sin ma nak neu sin, “Au ka upeni fa sanat sa' anbi In.

³⁹Mes natuin hi halat, leka Neno Paskah, au mes ufetin atoni mese neu ki. Him lomi, he nati' au ufetin Kesel atoni Yahudi neu ki ka?”

⁴⁰Sin alsin na'ba ma nak, “Kais In, so Nai Barabas!” Nai Barabas nane atoin amaufinut.