Read Uab Meto YOHANES 19 Bible Online

YOHANES 19 - Uab Meto bible

YOHANES 19

¹Oke te Nai Pilatus neki Yesus anpoi ma anlelu atoni sin hen biso In.

²Ma solalus sin nakano sobe kisan ma antao neu Ini nakan. Ma sin napakeb In sobalu amtasa,

³oke te sin fonat nu neu In matan ma nak, “Selamat, Kesel atoni Yahudi!” Oke te sin anpas In human.

⁴Nai Pilatus anpoi anteni ma nak neu sin, “Kiso, au eki In anpoi neu ki, he nati' hi mihin, mak au ka upeni fa sanat sa' es anbi In.”

⁵Nalali te Yesus anpoi, fun nasobe kisan ma masobalu amtasa. Nai Pilatus nak neu sin, “Kiso atoni nane!”

⁶Leka ana' lasi fuat nakaf sin ma apaot sin ankiso nit In, sin alsin na'ba nak, “Mipeti In! Mipeti In!” Nai Pilatus nak neu sin, “Meki hem nao mipeti In, fun au ka upeni fa sanat sa' anbi In.”

⁷Atoni Yahudi sin natae neu in nak, “Hai mu'i fekat ma natuin fekat nane, In mes anmate, fun In tek In aon nak Uisneno Anmone.”

⁸Leka Nai Pilatus in nen uab nane te, in namtau.

⁹Oke te in tam anteni neu ume lef lasi ma nak neu Yesus, “Ho mu'ko me ka?” Mes Yesus ka nataef neu in.

¹⁰Oke te Nai Pilatus nak neu In, “Ho kam lomif he mu'uab mok kau ka? Ho ka muhin fa ka, nak au mu'i kuasat he ufetin Ko, au mu'i kuasat he upeti Ko ka?”

¹¹Usif Yesus natae nak, “Ho ka mu'if kuasat neu Kau, kalu Uisneno kan fe ko fa kuasat nane na'ko tunan. Es nane te, atoni, le nana'at Kau neu ko, in sanat nane a'nesin ko.”

¹²Na'ko tomas nane Nai Pilatus nami he nafetin In, mes atoni Yahudi sin na'ba ma nak, “Kalu ho mufetin In, Kesel kan masoba fa nok ko. Atoni le antek in aon on Usif, in namusu nok Kesel!”

¹³Leka Nai Pilatus in nen uab nane te, in lelu he neki Yesus anpoi ma in antoko anbi toko lef lasi, bi bale le kanan Litostrotos, a'at Ibrani nak Gabata.

¹⁴Neno nane neno loitan neu Tolas Paskah, oni leuk bo'es am nua. Nai Pilatus nak neu atoni Yahudi sin, “I hi Kesel!”

¹⁵Sin na'ba ma nak, “Mineku mis In! Mineku mis In! Mipeti In!” Nai Pilatus nak neu sin, “Au he upeti hi kesel fe ka?” Ana' fuat knino nakaf sin natae nak, “Hai ka mu'if usif bian na'ko Kesel.”

¹⁶Oke te Nai Pilatus nana'at Yesus neu sin he nati' sin napeti nani. Oke te sin ansimo Yesus.

¹⁷Yesus anloi In hau nehe ma anao neu bale le nakanab nak Bale Nui Nakaf, a'at Ibrani nak Golgota.

¹⁸Sin napeti In anbi bale nane. Sin napeti In nok atoni nua, le anbi aon bian ma bian ma Yesus anbi atnanan.

¹⁹Ma Nai Pilatus anlelu amsa hen tao tuis mese anbi hau nehe nane fafon le in hanan nak, “Yesus atoni Nazaret, Kesel atoni Yahudi.”

²⁰Atoni Yahudi namfaun anso'i tuis nane, fun bale le napeti Usif Yesus anbine anhaumak kot Yerusalem. Tuis nane neki a'at Ibrani, a'at Latin ma a'at Yunani.

²¹Ana' lasi fuat nakaf sin ma atoni Yahudi sin nak neu Nai Pilatus, “Kais hom tui mak: Kesel atoni Yahudi, mes so onle In nak kun: Au Kesel atoni Yahudi Kau.”

²²Nai Pilatus natae nak, “Sa' le au tui ulali, matui nabala onane.”

²³Leka solalus sin napeti nalali Yesus, sin naiti Ini bael pake oke te sin anbati no ha, — solalus puknes napeni pa'es — ma sin naiti In sobalu betkone amsa. Sobalu nane ka maso' fa na'ko fafon antia pinan fun akne mese ah.

²⁴Es nane te sin na'uaben es neu es nak, “Kaisa hit ketu hen fani tuka fauk. Leko nesi hit hel sulat neun, he nati' sekau es napeni.” Lasi nane anbol he nati' natiaba sa' le antui nani anbi Sulat Knino nak, “Sin mabatin Au bael pake es neu es ma sin helan sulat neu Au sobalu betkone.” Lasi nane solalus sin es anmo'e nani.

²⁵Yesus In ainaf, ma In ainaf tata, bi Maria, Nai Klopas in fel ma bi Maria Magdalena sin anhake anhaumak hau nehe.

²⁶Leka Yesus nit In ainaf, ma asimo lasi le In nek nani anhake nokan, In nak neu In ainaf, “Aina, i ho anah!”

²⁷Oke te In nak neu In asimo lasi, “I ho aina.” Ma na'ko tomas nane asimo lasi nane ansimo bi Maria bi in ume.

²⁸Nalali te, Yesus nahin, nak ale sa' namtisien. In na'uab — nak — he nati' natiaba ale sa' le antui nani anbi Sulat Knino nak: “Au meon oe.”

²⁹Bi nane anmu'i bale mese le nahenu nok tua mahai. Sin posun hau suf putun, le anlep nani neu tua mahai neu kmeo panan, oke te nanona nani neu Yesus fefan.

³⁰Leka Yesus ninu tua mahai nane, In nak, “Lasi namtisien.” Oke te In naluli ma nana'at Ini Smanan.

³¹Natuin neno nane neno he naloitan ma he nati' atonin le napeti sin aon nitun kais naponiok nabala — fun Neno Snasat nane neno naek kun — es nane te atoni Yahudi sin neman neu Nai Pilatus ma antoti he nati' anipu atoni nane sin haekenu ma nasanut sin aon nitun na'ko hau nehe.

³²Oke te solalus sin neman ma anipu atoni nua in sin haekenu, le napeti sin nok Yesus.

³³Mes leka sin nem ante Yesus ma nit nak In anmaten sin kan ipuf In haen.

³⁴Mes solalus mese anbi sin napau Ini bnapan neki auni; ma naskek onane te na' ma oe ansai.

³⁵Ma atoni le nit lasi nane in es ansaksi lasi i ma in saksit nane namneo, ma in nahin, nak in na'uab amneot, he nati' hi amsa ampalsai.

³⁶Lasi nane anbol onane, he nati' natisi Sulat Knino hanan nak, “Of kan ipuf In nuif.”

³⁷Ma anmu'i anteni a'at le nak, “Of sin kiso neu In le sin napau nalali.”

³⁸Nalali te Nai Yusuf na'ko Arimatea — Yesus In asimo lasi amsa, mes ka natonon fa fun namtausan atoni Yahudi sin — in antoti neu Nai Pilatus he nati' in nasanut Yesus In aon nitu na'ko hau nehe. Ma Nai Pilatus ansimo in totis nane. Oke te in nem ma nasanut Yesus In aon nitu nane.

³⁹Nai Nikodemus amsa nem neu bale nane. In esle' afi nem neu Yesus nok fai. In neki klali ma hau oef fomeni, oni kati bo'nim.

⁴⁰Sin naiti Yesus In aon nitu, ma ana'mu neki pilu muti ma antao fobona, natuin atoni Yahudi sin halat, leka sin ansub nitu.

⁴¹Anmu'i po'an mese anhaumak bale le napeti Yesus anbin. Anmu'i naukel fe'u mese anbi nane, le fe kan subaf atoni mese anbin.

⁴²Fun naukel nane anhaumak, ma neno nane atoni Yahudi sin neno he naloitan, es nane sin nabela Yesus aon nitu anbi naukel nane.