Read Uab Meto YOHANES 2 Bible Online

YOHANES 2 - Uab Meto bible

YOHANES 2

¹Bi neno tenu namuni te, anmu'i tolas mafe mamone bi kuan Kana, bi pah Galilea ma Yesus ainaf anbin.

²Sin anhone Yesus nok In asimo lasi sin amsa nem neu tolas nane.

³Leka sin tua mina amtasa oke, Yesus In ainaf nak neu In nak, “Sin tua mina amtasa oke.”

⁴Yesus natae nak, “Aina, hom lomi sa' na'ko Kau ka? Au leku fe kan tiaf.”

⁵Mes Yesus In ainaf nak neu atuthaes sin, “Hi mo'e mituin sa' le In na'uab neu ki.”

⁶Bi nane anmu'i kusi ne le naloitan sin neu hen fasen natuin halat atoni Yahudi. Kusi mese te oe nai nua ai nai tenu.

⁷Yesus nak neu atuthaes sin nane, “Him soet kit oe neu kusi nane sin tal nahenun. Ma sin antao oe tal nahenu.”

⁸Oke te Yesus nak neu sin, “Him kui nai ma meki nao neu tol tuaf.” Nalali te sin neki anao.

⁹Leka tol tuaf nane antamis oe le nabaina anfani tua mina amtasa — ma in ka nahin fa nane nem na'ko me, mes atuthaes sin le ankui oe nane sin nahinen — oke te in boin atoin fe'u nane,

¹⁰ma nak neune, “Ale atoni sin nabalab nahunun tua mina amtasa alekot, ma leka atoni sin ninu nalali lek-leko, oke te mubalab le ka alekot. Mes ho mupan kum tua mina amtasa alekot nane tal tomas i.”

¹¹Yesus anmo'e lasi nane on taka ahunut na'ko ale lasi taka sin anbi kuan Kana bi pah Galilea. Ma nok lasi nane te In nalile In apinat, ma In asimo lasi sin nekan nateb knino neu In.

¹²Nalali te Yesus In nao neu Kapernaum nok In ainaf ma In oilfenu ma In asimo lasi sin. Oke te sin namaika anbi nane neno fauka.

¹³Leka atoni Yahudi sin Neno Tolas Paskah anhaumak, Yesus anao neu Yerusalem.

¹⁴Leka In antam neu Ume Uisneno, In napeni atoni asosa biabak bijae molo, bibi kase ma kol ot kase, ma atoni atukal noni sin antokon bi nane.

¹⁵In anmo'e nan ue biso na'ko tani oke te anli'u napoitan sin na'ko Ume Uisneno nok ale sin bibi kase ma biabak. In opan ale noni le sin antukal neu nain ma aneusbai ale sin mei nane.

¹⁶In nak neu ale asosa kol ot kase sin, “Maiti ale sa' na'ko i, kais hi mo'e Au Ama ume neu bale masa.”

¹⁷Ma In asimo lasi sin namnau nit, nak afi antui nalali nak, “Au he nek Ho ume koi Uisneno, onle ai he notu nis Kau.”

¹⁸Atoni Yahudi sin anmatoe Yesus nak, “Ho mulile kai taka sa' ka, nak Ho mu'i hak he mo'e onane ka?”

¹⁹Yesus nak neu sin, “Pukai mani Ume Uisneno le i, ma of anbi neno tenu Au uhakeb ufani.”

²⁰Oke te atoni Yahudi sin nak neu In, “Afi atoni sin nahakeb Ume Uisneno i, ton bo'ham ne ma Ho he muhakeb mufani bi neno tenu ka?”

²¹Mes In antek Ume Uisneno nane antom In aon kun.

²²Namuni In anfen anfain na'ko amates, In asimo lasi sin namnau nit, nak In anetun nalali lasi nane. Oke te sin nekan nateb neu Sulat Knino ma neu a'at le Yesus nak neu sin.

²³Leka In fe anbi Yerusalem bi Neno Tolas Paskah, atoni namfaun anpalsai neu In kanan, natuin sin nit lasi taka le In anmo'e.

²⁴Mes Yesus ka nateb fa In aon neu sin, natuin In nahin sin alsin.

²⁵Ma In ka napane fa es, hen etun antom mansian, fun In nahin nalali sa' le anbi sin nekan.