Read Uab Meto YOHANES 20 Bible Online

YOHANES 20 - Uab Meto bible

YOHANES 20

¹Bi neno klei nok-noka fe anmesok, bi Maria Magdalena in nao neu naukel nane. In nit, nak fatu le antobe naukel nane sin nait nani.

²In naen laba neu Nai Simon Petrus ma asimo lasi bian le Yesus a'nek nani ma nak neu sin, “Atoni sin nait neki Usif na'ko naukel ma hai ka mihin fa he nabela esme.”

³Oke te Nai Petrus ma asimo lasi bian nane sin naon neu naukel.

⁴Sin nua sin naen nabuan, mes asimo lasi bian nane in keo nesin Nai Petrus es nane in tia nahun neu naukel.

⁵In natnu neu naukel ma in nit piul amut nane nabelkon bi najan, mes in kan tamaf neu naukel nane.

⁶Nai Simon Petrus nem natuin in ma antam neu naukel nane. In nit piul amut nane nabelkon bi najan.

⁷Mes pilu le ana'mu Yesus a'nakan, ka nabela nabuabef nok piul amut nane, mes anunu naikan bi bale bian.

⁸Nalali te asimo lasi bian le antia nahunu bi naukel nane, in amsa antam. In nit ma anpalsai.

⁹Fun sin fe ka nahin fa Sulat Knino in hanan le nak: In mes anfen anfani na'ko amates.

¹⁰Oke te asimo lasi nane sin nua sin anfani neu ume.

¹¹Bi Maria anhake anhaumak naukel nane ma ankae. In ankae ma natnu neu naukel nane.

¹²In nit ahake sin nua le anpake muti nalim. Sin antoko anbi bale le natupab Yesus anbin. Es antoko tom a'nakan ma es antoko tom haen.

¹³Ahake neno tunan sin nak neune, “Aina, hom kae neu sa' ka?” Bi Maria natae neu sin nak, “Atoni sin nait neki au Uisneno, ma au ka uhin fa neu sin he nabela In esme ka?”

¹⁴Leka in na'uab nalali onane te, in nik neu kotin ma in nit Yesus anhake anbi nane. Mes in ka nahin fa, nak nane Yesus.

¹⁵Usif Yesus nak neune, “Aina hom kae neu sa' ka? Ho maim sekau ka?” Bi Maria natenab nak atoni nane apao po'an, es nane in nak neune, “Pak, kalu ho es maiti In, ame'ut kau, ho mubela In esme, he nati' au nao he aiti In.”

¹⁶Usif Yesus nak neune, “Maria!” Bi Maria a'nik ma nak neu In neki a'at Ibrani nak, “Rabuni!” in oten nak Anoni.

¹⁷Yesus nak neune, “Kaisa hom na' Kau, fun Au fe ka naof eu Ama. Mes hom nao nai meu Au bae sin ma ametun sin, mak Au he nao eu Au Ama ma hi Ama, eu Au Uisneno ma hi Uisneno.”

¹⁸Bi Maria Magdalena in nao ma anetun asimo lasi sin nak, “Au it ulali Uisneno,” ma nak Uisneno es anetun ale lasi nane neu in.

¹⁹Bi neno klei nane amsa, leka neno anfai Yesus asimo lasi sin nabuan anbi ume mese ma eno sin mae'ka fun sin namtausan atoni Yahudi sin. Bi leku nane Yesus nem ma anhake anbi sin atnanan ma nak neu sin, “Tetus aomina neu ki!”

²⁰Ma leka In na'uab nalali onane te, In nalile In niman ma In abnapan neu sin. Asimo lasi sin namlil, fun sin nit Uisneno.

²¹Ma Yesus nak anteni neu sin, “Tetus aomina neu ki. Onle Ama ansonu Kau, onane amsa tabu i Au sonu ki.”

²²Ma leka In na'uab nalali onane te, In fu sin ma nak, “Amsimo nai Smanan Knino.

²³Kalu him sako atoni in sanat, in sanat masako. Ma kalu hi milile atoni in sanat nabalah, in sanat mes nabala.”

²⁴Mes Nai Tomas, le asimo lasi sin bo'es am nua nane sin es, le antek in kanan Nai Didimus, in ka nabua fa nok sin, bi leku le Yesus nem neu sin.

²⁵Es nane asimo lasi bian anetun nak, “Hai mit milali Uisneno!” Mes Nai Tomas nak neu sin, “Leka au fe ka it fa kusat balan bi In niman, ma au fe ka utam fa au kluluk neu kusat nane balan ma utam au nimak neu In abnapan, au fe ka palsaif.”

²⁶Neno fanu namuni te Yesus asimo lasi sin nabuan tenin bi ume nane ma Nai Tomas nabua nok sin amsa. Leka ale eno sin mae'ka, Yesus nem ma anhake anbi sin atnanan ma nak neu sin, “Tetus aomina neu ki!”

²⁷Nalali te In nak neu Nai Tomas, “Tao ho klulum nai anbi i, ma amkiso Au nimak, menu ho niman ma mutam nai neu Au bnapak ma kais hom fani ka apalsait mes ampalsai nai.”

²⁸Nai Tomas natae neu In nak, “Koi au Uisneno, ma au Uisneno!”

²⁹Yesus nak neune, “Natuin ho mit Kau es hom palsai. Ua alekot neu atoni le ka nitaf mes anpalsai.”

³⁰Fun anmu'i taka namfaun le Yesus anmo'e anbi asimo lasi sin matan le kan tui nani fa anbi sulat i.

³¹Mes antui ale lasi i, he nati' him palsai, mak Yesus lo Neno Anan, Uisneno Anmone, ma natuin hi palsait hi mipeni honis bi In kanan.