Read Uab Meto YOHANES 21 Bible Online

YOHANES 21 - Uab Meto bible

YOHANES 21

¹Namuni te Usif Yesus nalilon anteni neu In asimo lasi sin bi Nifu Tiberias in ninen. Fun nalilon on i.

²Nai Simon Petrus, Nai Tomas le nak hata in kanan Nai Didimus, Nai Natanael na'ko kuan Kana pah Galilea, Nai Zebedeus anmone sin ma In asimo lasi bian sin nua sin nabuan anbi nifu ninen.

³Nai Simon Petrus nak neu sin, “Au he nao kifkai ika.” Sin nak neune, “Hai amsa he mok ko.” Oke te sin naon ma ansae neu belo'. Mes bi fai nane sin kan kifkai nan fa sa'.

⁴Leka manas hen sae, Yesus anhake bi nifu ninen. Mes asimo lasi sin ka nahinef, nak nane Yesus.

⁵Yesus nak neu sin, “Li'teun hi mui kit boe sa' ka?” Sin natae nak, “Kan mu'if.”

⁶Yesus nak neu sin, “Ampolin hi kifkai neu belo' aon bian a'ne'u, of hi mipeni.” Oke te sin anpolin kifkai nane ma sin kan hel nabe'ifa, natuin ika amfau le'uf.

⁷Asimo lasi le Yesus a'nek nani nak neu Nai Petrus, “Uisneno, es nane.” Leka Nai Petrus amnen, nak nane Uisneno, in pake in sobalu, fun in kan sobaluf, oke te in oklon antam neu nifu.

⁸Asimo lasi bian sin neman nok a'belo', fun sin ka na'lo fa na'ko meto, oni nehe natun mese, ma sin anhel kifkai le nahenu nok ika.

⁹Leka sin neman tia meto onane, sin nit ai fla ma ika nabelon anbi ai fla tunan ma utunu' nok.

¹⁰Yesus nak neu sin, “Meki kit ika fauk, esle' fe him kifkai man sin.”

¹¹Nai Simon Petrus ansae neu belo' oke te anhel kifkai nane neu meto. Kifkai nane nahenu nok ika naek: Natun mese bo'nim am tenu. Ma maski ika namfau, mes kifkai nane ka natpisuf.

¹²Yesus nak neu sin, “Aim nai ma miah nai.” Katit fa es na'ko asimo lasi sin he natan neu in nak, “Ho sekau Ko Uisneno?” Fun sin nahinen, nak In lo Uisneno kun.

¹³Yesus anfonat nem ma naiti utunu' ma anfe nani neu sin, ma ika amsa onane.

¹⁴I hae tenu, le Yesus nalilon neu In asimo lasi sin, namuni na'ko In anfen anfani na'ko amates.

¹⁵Leka sin nah nalali te, Yesus nak neu Nai Simon Petrus, “Simon, Nai Yohanes anmone, ai hom nek Kau nesin ale i sin ka?” Nai Petrus natae neu In nak, “Koi Uisneno, Ho muhin, nak au nek Ko.” Yesus nak neune, “Mutuku nai Au bibi kase sin.”

¹⁶Yesus nak anteni neune hae nua, “Simon, Nai Yohanes anmone, hom nek Kau ka?” Nai Petrus natae neu In nak, “Koi Uisneno, Ho muhin, nak au nek Ko.” Yesus nak neune, “Mutuku nai Au bibi kase sin.”

¹⁷Yesus nak anteni neune hae tenu, “Simon, Nai Yohanes anmone, hom nek Kau ka?” Nai Petrus nekan antu' fun Usif Yesus na'uab neune, hae tenu nak, “Ai hom nek Kau ka?” Ma in nak neu Yesus, “Uisneno, Ho muhin kum ale sa', Ho muhin, nak au nek Ko.” Yesus nak neune, “Mutuku nai Au bibi kase Sin.

¹⁸Au ak ko: Tebes leka ho fe munif ko, ho mufutu kum ho tnaman, ma hom nao meu me le hom lomi. Mes leka Ho mumnasi te, of ho menu ho nimam ma atoni bian es anfutu ko ma neki ko neu bale le ho kam lomif.”

¹⁹Yesus na'uab lasi i he nalile Nai Petrus of in anmate onme ma he nanaeb Uisneno. Leka na'uab nalali onane te, In nak neu Nai Petrus, “Mutuin Kau nai.”

²⁰Leka Nai Petrus a nik neu kotin, in nit asimo lasi le Yesus a'nek nani natuin sin. Asimo lasi le afi sin nah nabuan ma antoko anhaumak Yesus ma natan neu Yesus nak, “Uisneno, sekau es he nana'at Ko ka?”

²¹Leka Nai Petrus nit asimo lasi nane, in nak neu Yesus, “Uisneno, lasi sa' of anbol neu in ka?”

²²Yesus natae nak, “Kalu Au lomi, he nati' in nabala, talan te Au fain aum, ho kam tamaf meu lasi nane. Mes neu ho, mutuin Kau nai.”

²³Onane te hanaf i nasitbon neu bae knino sin, nak asimo lasi nane of kan matef. Mes Yesus ka na'uab fa nak asimo lasi nane of kan matef, mes “Kalu Au lomi he nati' in nabala talan te Au fain aum, ho kam tamaf meu lasi nane.”

²⁴Asimo lasi nane es ansaksi ale lasi i, ma antui nani he nati' hit tahin tak in saksit nane lo namneo.

²⁵Fun anmu'i anteni lasi namfaun le Usif Yesus anmo'e nani, mes kalu hen tui ale lasi nane mes-mese, pah pinan i kan mu'if bale he nabela ale sulat le hen tui nani.