Read Uab Meto YOHANES 3 Bible Online

YOHANES 3 - Uab Meto bible

YOHANES 3

¹Anmu'i atoni Farisi mese le atoni Yahudi sini nakaf kanan Nai Nikodemus.

²In nem nok fai neu Yesus ma nak, “Pak, hai mihin, Uisneno anlelu Ko, hem koenom aum on anoni. Fun kan mu'if atoni mese hen mo'e taka, le Ho mo'e, kalu Uisneno ka nok fa in.”

³Usif Yesus natae nak, “Au ak ko, katit fa atoni mese he nit Plenat Uisneno, kalu ka nahonis nafani fa in.”

⁴Nai Nikodemus nak neu In, “Leka me he nahonis nafani atoni mese le in namnasien ka? Nabe'i ka in antam anfani neu in ainaf apun, ma nahonis anteni ka?”

⁵Yesus natae nak, “Au ak ko, kalu ka nahonis fa atoni anbi oe ma Smanaf, in ka nabe'i hen tam neu Plenat Uisneno.

⁶Sa' le nahonis na'ko aof lo in aof kun, ma sa' le nahonis na'ko Smanaf lo in smanaf kun.

⁷Kais ho mumkak, natuin Au ak ko: Mes he nahonis nafani ki.

⁸Anin anfu neu me natuin in lomin. Hom nen in amiun, mes ho ka muhin fa in nem na'ko me ma in nao neu me. Onane amsa ale atoni le nahonis na'ko Smanaf.”

⁹Nai Nikodemus natae nak, “Lasi nane hen bol onme ka?”

¹⁰Yesus natae nak, “Ho anoni ko neu to Israel, mes ho ka muhin fa lasi nane ka?

¹¹Au ak ko, hai mi'uab neu lasi sa' le hai mihine, ma haim saksi meu lasi sa' le hai mit. Mes hi kam simo fa hai saksi nane.

¹²Leka Au u'uab neu ki lasi pah pinan, hi kam palsai mani fa; leka me Au he u'uab neu ki lasi Neno Tunan, of him palsai mani onme ka?

¹³Kan mu'if atoni mese le ansae neu Neno Tunan, al In kun le ansanu na'ko Neno Tunan, esle' Anmone Pah To.

¹⁴Onle Nai Musa nasaeb kauna anbi mnela paha snaen, onane amsa nasaeb Anmone Pah To,

¹⁵he nati' ale atoni le anpalsai neu In napeni honis nabal-bal.

¹⁶Fun Uisneno nek pah pinan onane, talan te In anfe In Anmone mes tilo, he nati' ale atoni le anpalsai neu In, kais namle'u, mes napeni honis nabal-bal.

¹⁷Fun Uisneno ansonu In Anmone neu pah pinan, ka neufa he nafek pah pinan in lasi, mes he nahoni nani natuin In.

¹⁸Atoni le nateb knino neu In, ka napenif le'at. Mes atoni le nekan ka nateb fa knino, in napeni nalali le'at, fun in kan palsai fa neu Uisneno Anmone mes tilo.

¹⁹Ma in le'at nane on i: Meusine nem nalali neu pah pinan, mes mansian anlomi nesin mesokan na'ko meusine, fun sin mo'et nane amle'ut kun.

²⁰Fun atoni le anmo'e amle'ut, in kan lomif meusine nane, he nati' in mo'et amle'ut nane kais natonon.

²¹Mes atoni le anmo'e lomin Uisneno, in nem neu meusine, he nati' natonon, nak ale in mo'et sin anmo'e nani anbi Uisneno.”

²²Nalali te Yesus nok In asimo lasi sin naon neu pah Yudea. In namaika nok sin anbi nane ma naslani atoni sin.

²³Mes Nai Yohanes amsa naslani atoni bi Ainon, anhaumak Salim, fun anbi bale nane oe naek. Atoni sin neman bi bale nane he naslani sin.

²⁴Bi neno nane fe ka natam fa Nai Yohanes neu o'of.

²⁵Nai Yohanes in asimo lasi sin anmatoen nok atoni Yahudi mese antom lasi he nakninok.

²⁶Oke te sin nem neu Nai Yohanes ma nak neune, “Pak, atoni le afi nok ko bi Yordan panin, le hom lekan mulali neu kai, In amsa naslani atoni ma atoni sin nao neu In.”

²⁷Nai Yohanes natae sin nak, “Katit fa atoni mese le he naiti sa' es neu in aon, kalu kan fene fa na'ko Neno Tunan.

²⁸Fun hi mes kim amsaksi, mak au uton ulali ki: Au ka Neno Anan kau fa, mes ansonu kau uhunun In.

²⁹Atoni fe'u in es anmu'i bife fe'u, mes atoin fe'u in soba anhake anhaumak in ma natnin ma in nekan namlil natuin in nen atoin fe'u nane in hanan. Es nane te au umlil ma au amlilat nane namtisien.

³⁰In mes nanae, mes au ubaunok.

³¹Atoni le nem na'ko fafon, in nesin kun ale sa'. Atoni le na'ko pah pinan in tam neu pah pinan ma nauab neki a'at pah pinan. Atoni le nem na'ko fafon in nesin ale sa'.

³²In ansaksi ale sa' le In nit nalali ma In nen nalali, mes katit fa atoni mese le ansimo In saksi nane.

³³Atoni le ansimo In saksi nane, in nateb, nak Uisneno nane lo amneot kun.

³⁴Fun atoni le Uisneno ansonu nani, In natiaba a'an Uisneno, fun Uisneno anfene Ini Smanan ka nok fa tu'as.

³⁵Amaf a'nek Anmone ma nana'at ale sa' neu In.

³⁶Atoni le anpalsai neu Anmone, in napeni honis nabal-bal. Mes atoni le ka natuin fa Anmone, of in ka nitaf honis, mes to'as Uisneno nabal-bal anbi in.”