Read Uab Meto YOHANES 4 Bible Online

YOHANES 4 - Uab Meto bible

YOHANES 4

¹Leka Usif Yesus nahin, nak atoni Farisi sin nen nak In napeni ma naslani atoni namfau nesin nai Yohanes.

²— Mes Yesus ka naslani fa atoni, al In asimo lasi sin, —

³In nasaitan pah Yudea ma anfani neu pah Galilea.

⁵Oke te In nem ante kuan mese anbi pah Samaria, kanan Sikhar anhaumak bale le afi Nai Yakub anfe nani neu in anah Nai Yusuf.

⁶Nai Yakub in oehani anbi nane. Natuin Yesus anhae es nane te In toko anbi oehani ninen. Oni leuk bo'es am nua.

⁷Yesus asimo lasi sin nao neu kot hen sosan bukael. Oke te bife Samaria mese nem hen sote oe. Yesus nak neune, “Hom fe Kau oe he inu.”

⁸

⁹Bife Samaria nane nak neu In, “Ho atoni Yahudi Ko, au bife Samaria kau. Leka me Hom toti oe na'ko kau he minu?” (Fun atoni Yahudi ka nabuan fa nok atoni Samaria.)

¹⁰Yesus natae neune nak, “Kalu ho muhin halinat Uisneno ma In sekau kun le nak ko: Fe Kau oe he inu, of hom toti neu In ma In anfe ko oe honis.”

¹¹Bife nane nak neu In, “Uisneno, Ho ka mu'if sote ma oehani i mnanu kun. Ho mupeni oe honis nane na'ko me ka?

¹²Ai ho munae nesin mu'ko hai ama uf Nai Yakub le in es anfe kai oehani i. Fun in ninu anbin nok in anhin ma in mu'it sin ka?”

¹³Yesus natae neune nak, “Atoni le in ninu na'ko oe i, of in anmeno anten.

¹⁴Mes atoni le in ninu oe le Au he fene, of in kan menof talan te nabal-bal. Fun oe le Au he fene, of anfin oemata le ansai piut ma anfene honis nabal-bal.”

¹⁵Bife nane nak neu In, “Uisneno, amfe kau oe nane, he nati' kais au meno; ma kais au aum a'teni eu bale i he sote oe.”

¹⁶Yesus nak neune, “Hom nao nai, amboin ho mone, oke te mokan nem neu i.”

¹⁷Bife nane nak, “Au ka mu'if mone.” Yesus nak neune, “Namneo, ho ka mu'if mone.

¹⁸Fun ho mamone mulali mok atoni nim, ma le ho mokan muni i, nane ka ho mone fa. Bi lasi i ho mu'uab namneo.”

¹⁹Bife nane nak neu In, “Uisneno, au fe uhin, nak Ho mafefa knino Ko.

²⁰Hai babfini afi anli'tu ma nabes anbi nu'af i, mes hi mak bale onen totis al anbi Yerusalem.”

²¹Yesus nak neune, “Hoi bife, hom palsai Kau nai, of in leku ante, nak of hi mibes meu Amaf kan bi fa nu'af i ma kan bi fa Yerusalem amsa.

²²Hi mibes neu sa' le hi ka mihinef, mes hai mibes neu sa' le hai mihine, fun lasi honis nem na'ko atoni Yahudi.

²³Mes in leku of nem, ma tomas i nem nalalien, nak ale ali'tus amneot of anli'tu neu Amaf anbi Smanaf ma amneot. Fun Amaf anlomi ale ali'tus onane.

²⁴Uisneno nane Smanaf, ma atoni le nabes neu In, so nabes anbi Smanaf ma amneot.”

²⁵Bife nane nak neu In, “Au uhin nak Neno Anan of ankoenon nem le antek amsa nak Kesel Afetin. Leka In ankoenon nem of In naton kai ale sa'.”

²⁶Yesus nak neune, “In kun esle' Au, le namolok nok ko.”

²⁷Bi leku nane amsa In asimo lasi sin anfani neman. Sin namkakan fun in namolok nok bife nane. Mes katit fa atoni mese le he na'uab nok bife nane nak, “Hom lomi sa' ka? Ai he natan neu Yesus nak: Amaf, Ho mumolok mokan neu sa' ka?”

²⁸Oke te bife nane in nao nasaitan in kusi oe anbi bale nane ma nao neu kot hen etun ale atoni anbi nane.

²⁹“Aim nai, ma amkiso! Atoni le In naton kau ale sa' le au mo'e ulali. Ait In Kesel Afetin ka?”

³⁰Oke te sin anpoi na'ko kot ma neman neu Yesus.

³¹Onane te In asimo lasi sin nak neu In, “Pak, ambukae nai.”

³²Mes In nak neu sin, “Au mu'i mnahat le hi ka mihinef.”

³³Asimo lasi sin nauaben es neu es nak, “Ai anmu'i atoni le nekin sa' neu In hen bukae ka?”

³⁴Yesus nak neu sin, “Au mnahat nane esle' Au mo'e In le ansonu Kau In lomin, ma usopu mepu le In nana'at neu Kau.

³⁵Fun hi mak: Al funan ha te neno abut ante. Mes Au ak ki: Him kiso nai funam natef ma mipene mit ale lele le namnatu ma anmeto neu hen seki ma anlefi.

³⁶Fun a'abut nane ansimo nalali in baen ma in nabua abut neu honis nabal-bal. Talan te akifut ma a'abut sin alsin namlil.

³⁷Fun lasi i anmatom nok amnait uab nak: Atoni es ankifun ma bian es ana'but.

³⁸Au lelu ki hem abut sa' le hi kam hae fa neun. Atoni bian sin es anhaen ma hi aim hem abut sin haet nane.”

³⁹Atoni Samaria namfaun le sin anbi kot nane sin anpalsai neu In, fun bife nane le ansaksi nak, “In naton neu kau ale sa' le au mo'e ulali.”

⁴⁰Leka ale atoni Samaria nane sin nem ante Yesus sin antoti neu In he nati' In nabala nok sin; ma In nabala nok sin neno nua.

⁴¹Ma atoni namfau anteni le anpalsai natuin In a'at.

⁴²Ma sin nak neu bife nane, “Haim palsai, mes ka natuin fa sa' le ho mu'uab, fun haim nen kim neu In, ma mihin mak, In kun namneo-namneo Kesel Afetin neu pah pinan.”

⁴³Neno nua namuni te Yesus In nao na'ko bale nane neu pah Galilea.

⁴⁴Fun Yesus ansaksi kun nak, mafefa knino mese ka napenif kan tola bi in kuan.

⁴⁵Mes leka In nem ante Galilea, atoni Galilea ansimo In, fun sin nit nalali ale sa' le In anmo'e bi tolas anbi Yerusalem, fun sin amsa nokan anbi tolas nane.

⁴⁶Oke te Usif Yesus anfani anteni neu kuan Kana bi pah Galilea, bi bale le In anmo'e oe anfani tua mina amtasa. Ma anbi Kapernaum anmu'i atoni mese le anmepu bi sonaf, in anah namen.

⁴⁷Leka in nen nak Yesus nem na'ko Yudea neu Galilea, in nao neu Yesus ma antoti he nati' In nem ma naleko in anah, fun in anah nane hen maten.

⁴⁸Yesus nak neune, “Kalu hi ka mitaf lasi taka ma lasi amkakat hi kam palsaif.”

⁴⁹Atoni nane nak neu In, “Uisneno, amkoenom aum fe nahunu na'ko au anah hen mate.”

⁵⁰Yesus nak neune, “Hom nao nai, ho anah anmoni!” Atoni nane anpalsai neu a'at le Yesus na'uab neune oke te in nao.

⁵¹Leka in fe anbi lanan atnanan te, in ate sin neki hanaf neune nak, in anah anmoni.

⁵²In natan neu sin nak, afi leuk fauka te anah nane naleko'. Sin natae nak, “Afi neno oni leuk mese te in men maininit naleko' kun.”

⁵³Onane te amaf nane namnau nit, nak afi neno onane te Yesus na'uab neun nak, “Ho anah anmoni.” Oke te in palsai, nok in ume nanan sin.

⁵⁴Ma nane lasi taka hae nua le Yesus anmo'e, leka In anfani nem na'ko Yudea neu Galilea.