Read Uab Meto YOHANES 5 Bible Online

YOHANES 5 - Uab Meto bible

YOHANES 5

¹Nalali te atoni Yahudi sin neno naek, es nane te Yesus In nao neu Yerusalem.

²Anbi Yerusalem anhaumak Eno Bibi kase anmu'i nifu mese, le antek neki a'at Ibrani nak Betesda. Anmu'i ke'an nim anbi nifu nane ninen.

³Anbi ale ke'an nane sin natupab atoni amenat namfaun. Atoni afolot, atoni hae hela, ma atoni men ole. Le sin anpao he oe nane nakebo.

⁴Fun fe-fe'at ahake Uisneno ansanu nem neu nifu nane ma ankebo oe nane. Atoni le antam nahunu neu nifu le in oe nane nakebo, in naleko' kun na'ko in menas, he men sa' amsa.

⁵Anbi bale nane anmu'i atoni mese le in namen ton bo'tenum fanu.

⁶Leka Yesus nit atoni nane antup, ma nahin nak in namen a'lo, In nak neune, “Hom lomi he muleko ka?”

⁷Atoni amenat nane natae neu In nak, “Uisneno, kan mu'if atoni le he nasanut kau neu nifu nane leka in oe nakebo. Fun leka au fe he nao eu nifu nane te, atoni bian ansanu nahunun kau.”

⁸Yesus nak neune, “Hom fen nai ma maiti ho nahe' ma amnao nai.”

⁹Ma bi leku nane amsa atoni nane naleko', oke te in naiti ini nahe' ma in nao kun. Mes neno nane Neno Snasat.

¹⁰Es nane te atoni Yahudi sin nak neu atoni le fe naleko nane, “Neno i Neno Snasat. Ho kais amloi ho nahe'.”

¹¹Mes atoni nane natae sin nak, “Atoni le naleko' kau, in es nak neu kau: Maiti ho nahe' ma amnao nai.”

¹²Sin natan neune nak, “Atoni nane sekau ka? Le nak neu ko: Maiti ho nahe', ma amnao nai?”

¹³Mes atoni le naleko nane, in ka nahin fa atoni nane sekau, fun Yesus nanonbon neu atoni amfaun le sin anbi bale nane.

¹⁴Nalali te Yesus nae'ku nokan bi Ume Uisneno, ma nak neune, “Ho muleko kum. Kais ho mo'e sanat anteni, he nati' kais lasi amle'ut nesin anbolan ko.”

¹⁵Atoni nane anpoi ma an etun neu atoni Yahudi sin, nak Yesus es naleko in.

¹⁶Es nane te atoni Yahudi sin nami lanan hen li'u Yesus fun In naleko' amenat bi Neno Snasat.

¹⁷Mes In nak neu sin, “Au Ama anmepu tal neno i, ma Au amsa mes he mepu.”

¹⁸Natuin lasi nane atoni Yahudi sin nami lanan nes-nesi he namate In. Fun ka al fa In tanhai Neno Snasat, mes natuin In nak Uisneno lo In Amaf kun ma onane te In nanesa In aon nok Uisneno.

¹⁹Usif Yesus natae sin nak, “Au ak ki, Anmone ka nabe'i fa hen mo'e sa' natuin In kuasat kun. So In nit fe Amaf anmo'e nani. Fun sa' le Amaf anmo'e, Anmone anmo'e amsa.

²⁰Fun Amaf In nek Anmone ma nalile neu In ale sa' le In anmo'e nani. Ma of Amaf nalile neu In ale mepu le naek a'nesin ale mepu nane talan te hi mimkak.

²¹Fun of Amaf nafena amates sin ma namonib sin, onane amsa Anmone of namonib atoni le In anlomi.

²²Amaf kan lefi fa lasi neu sekau, mes nana'at nani ale alef lasi neu Anmone In.

²³He nati' ale atoni sin nanaeb Anmone onle sin nanaeb Amaf. Atoni le ka nanaeb fa Anmone, in amsa kan nanaeb fa Amaf le anlelu Anmone.

²⁴Au ak ki: Atoni le natuin Au a'at ma anpalsai neu Amaf le anlelu Kau, in anmu'i honis nabal-bal. In ka napeni fa le'at, mes anpoi na'ko maten ma antam neu honis.

²⁵Au ak ki: In leku of nem ma ante es i, le amates sin nen Uisneno Anmone In hanan. Ma sin le amnen of anmonin.

²⁶Onle Amaf anmu'i honis anbi In aon, onane amsa In fe nani neu Anmone hen mu'i honis anbi In aon.

²⁷Ma In anfe kuasat neu Anmone he nafek lasi, fun In kun lo Anmone Pah To.

²⁸Kais hi mimkak natuin lasi nane, fun in leku of nem. Ale atoni le anbi nopu maten of amnen In hanan.

²⁹Oke te sin poin. Atoni le anmo'e alekot of anfen neu honis. Mes atoni le anmo'e amle'ut of anfen neu lasi fekat.

³⁰Au ka ube'i fa he mo'e sa na'ko Au kuasat: Au ufek lasi natuin sa' le Au nen ma Au fekat nane namneo. Fun Au ka utuin fa Au lomik, mes In kun le anlelu Kau In lomin.

³¹Kalu Au saksi neu Au aok, saksi nane ka namneof.

³²Mes kalu atoni bian es ansaksi neu Kau, Au uhin nak saksi nane namneo.

³³Him sonu haef neu Nai Yohanes ma in saksi nane amneot kun.

³⁴Au u'uab lasi i, ka natuin fa Au lomi mansian in saksi, mes natuin he nati' nahoni ki.

³⁵Nai Yohanes nane onle paku le notu ma ansinek ma hi mit in pinan nane leku tuk es.

³⁶Mes Au mu'i saksi mese le a'nesin Nai Yohanes ini esle' mepu le Amaf nana'at nani neu Kau, he nati' Au unaob ani. Mepu nane esle' Au mepu i, ma anfani saksi neu Kau, nak Amaf es ansonu Kau.

³⁷Amaf le ansonu Kau, In kun es ansaksi neu Kau. Hi kam nenaf In hanan ma hi ka mitaf In human.

³⁸Ma In a'an ka nabala anbi ki, fun hi kam palsai fa neu In le In ansonu nani.

³⁹Him soi Sulat Knino, fun hi mitenab mak of hi mipeni honis anbin. Ma Sulat Knino nane ansaksi neu Kau.

⁴⁰Mes hi ka aim fa meu Kau he mipeni honis nane.

⁴¹Au ka totif lasi naeba na'ko mansian.

⁴²Mes Au uhin ki, fun anbi hi nekam, hi ka mu'if manekat neu Uisneno.

⁴³Au aum eki Au Ama In kanan, mes hi kam simo Kau. Leka atoni bian nem neki in kanan kun of him simo in.

⁴⁴Leka me hi hem palsai kalu him simo pules es neu es, ma hi ka mami fa lasi pules le nem na'ko Uisneno mes tilo ka?

⁴⁵Kais hi mitenab mak of Au usanab ki bi Amaf In matan. Le he nasanab ki es Nai Musa, le hi mifnekan meune.

⁴⁶Fun leka him palsai neu Nai Musa, of him palsai neu Kau amsa fun in es antui nalali neu Kau.

⁴⁷Mes kalu hi kam palsai fa sa' le in antui nani, leka me hi hem palsai sa' le Au he u'uab ani ka?”