Read Uab Meto YOHANES 6 Bible Online

YOHANES 6 - Uab Meto bible

YOHANES 6

¹Nalali te Yesus anlak neu Nifu Galilea panin, le antek nak Nifu Tiberias.

²Atoni namfaun natuin In, fun sin nit ale lasi amkakat sin le In anmo'e nani esle' naleko' amenat sin.

³Oke te Yesus ansae neu nu'af ma antok anbi nane nok In asimo lasi sin.

⁴Ma Neno Paskah, atoni Yahudi sin neno naek anhaumaken.

⁵Leka Usif Yesus ankiso funam natef ma In nit atoni amfaun nem neu In. In nak neu Nai Filipus, “Hit sos utunu' na'ko me ka, he nati' atoni i sin anbukae ka?” (

⁶In na'uab lasi i hen su' nit Nai Filipus, In nahin nalali In hen mo'e sa'.)

⁷Nai Filipus natae neu In nak: “Utunu' le upan noni dinar natun nua of ka namno'uf neu sin. Maski atoni mes em napeni pis an es.”

⁸In asimo lasi mese, Nai Andreas, Nai Simon Petrus tataf nak neu In,

⁹“Amaf, li'ana mese es i le anmu'i utunu' pisa nim ma ika koe nua. Mes nane in oten sa' ka neu atoni amfaun i?”

¹⁰Yesus nak, “Amlelu atoni nane hen tokon. Bi bale nane anmu'i hun anaek. Ma atoni nane sin antokon oni sin nifun nim.

¹¹Oke te Yesus naiti utunu' nane ma an onen toti neu Uisneno ma anbati neu sin le antokon anbi nane. Onane amsa In anmo'e neu ika sin, fauk le sin anlomi.

¹²Ma leka sin namsenan, in nak neu In asimo lasi sin, “Mibua kit le pis anesit sin, kais ampolin sin.”

¹³Oke te sin nabua nani pis anesit na'ko utunu' pisa nim nane ma nahenu aba' bo'es am nua leka atoni amfaun sin bukae nalali.

¹⁴Leka atoni sin nit lasi amkakat le In anmo'e sin nak, “Namneo, In Mafefa knino, le he nem neu pah pinan.”

¹⁵Fun Yesus nahin, nak sin neman he naseke In hen fani Kesel. Onane te In naskotu anteni anmeskun neu nu'af.

¹⁶Leka neno anfai te, In asimo lasi sin ansanu neu nifu.

¹⁷Oke te sin sae neu belo' ma anlakan neu Kapernaum. Leka fai anmesok anfin Yesus fe ka nemaf neu sin amsa.

¹⁸Oke te tasi nane anpesen fun anin anfoe.

¹⁹Leka sin ansepo belo' ma anao oni kilo nim ai ne onane te, sin nit Yesus, In anao natuin oe fafon nem anhaumak belo' nane. Oke te sin namtaun.

²⁰Mes Yesus nak neu sin, “Kais mimtau, Au es Kau i.”

²¹Oke te sin nasaeb Yesus neu belo' ma leku nane amsa sini belo' ante nifu ninen le sin anali nao neune.

²²Nokfa onane te, atoni amfaun le sin nabala anbi nifu panin, sin nit, nak bi bale nane katit fa belo' bian al mese nane ma Yesus kan sae nok fa In asimo lasi sin neu belo' nane. Mes In asimo lasi sin anao anmesen.

²³Mes nalali te belo' bian neman na'ko Tiberias anhaumak bale le sin anbukae utunu', le Usif Yesus natulu nani nok onen totis.

²⁴Leka atoni amfaun nane sin nit, nak Yesus kanbine fa, ma In asimo lasi sin amsa kahaf, sin ansae neu belo' nane sin ma anao neu Kapernaum he nami Yesus.

²⁵Leka atoni amfaun nane sin nae'ku nok Yesus bi tasi panin sin nak neu In, “Pak, leka es Ho aum meu i ka?”

²⁶Yesus natae sin nak, “Au ak ki, hi maim Kau ka natuin fa hi mit lasi taka sin, mes natuin hi miah utunu' ma mimsen.

²⁷Kais hi mepu neu maka le of namle'u kun. Mes neu maka le naleko nabala talan te honis nabal-bal. Le Anmone Pah To hen fe ki. Fun In kun le Ama, Uisneno antao In malak neu In.”

²⁸Oke te sin nak neu In, “Hai he mo'e sa' ka, he nati' hai mepu Uisneno In mepu ka?”

²⁹Yesus natae sin nak, “Mepu le Uisneno anlomi, esle' him palsai neu In le Uisneno anlelu nani.”

³⁰Sin natae neu In nak, “Ho mo'e taka sa' ka, he nati' hai mit ma ampalsai neu Ko? Ho mepu meup sa ka?

³¹Hai babfin afi sin anbukaen mak muti anbi mnela paha snaen onle antui nalali nak: In anfen sin hen bukaen utunu' na'ko neno tunan.”

³²Yesus nak neu sin, “Au ak ki, ka Nai Musa fa es anfe ki utunu' na'ko neno tunan, mes Au Ama es anfe ki utunu' amneot na'ko neno tunan

³³Fun utunu' le ansanu na'ko Uisneno nane lo utunu' le ansanu na'ko neno tunan ma anfe honis neu pah pinan.”

³⁴Ma sin nak neu In, “Amaf, fe kai utunu' nane piut.”

³⁵Yesus nak neu sin, “Au utunu' honis Kau. Atoni le in nem neu Kau, of in ka namnahan tenif, ma atoni le anpalsai neu Kau, of in kan menon tenif.

³⁶Mes Au ak ulali ki: Hi mit milali Kau mes hi kam palsaif.

³⁷Ale sa' le Ama anfe neu Kau, of nem neu Kau, ma atoni le nem neu Kau, of Au ka poilnef.

³⁸Fun Au sanu u'ko neno tunan ka natuin fa Au lomik, mes natuin In le ansonu Kau In lomin kun.

³⁹Ma ansonu le ansonu Kau In lomin esle' ale atoni le In anfe Kau sin kais anmu'i amnekut. Mes Au ufena ufani sin bi Neno Amsoput.

⁴⁰Fun i Au Ama lomin kun, he nati' ale atoni le nit Anmone ma anpalsai neu In napeni honis nabal-bal. Ma of Au ufena ufani sin bi Neno Amsoput.

⁴¹Oke te atoni Yahudi sin na'munu In, fun In nak, “Au utunu' Kau le ansanu na'ko neno tunan kun.”

⁴²Ma sin nak, “Ai In ka Yesus fa le Nai Yusuf anmone ka? Le hai mihin In amaf ma In ainaf? Leka me nabe'i In nak: Au sanu u'ko neno tunan?”

⁴³Yesus natae sin nak, “Kais hi mi'munu.

⁴⁴Katit fa atoni mese le he nem neu Kau, kalu Amaf le ansonu Kau ka nok fa in he nem neu Kau. Ma of Au ufena ufani anbi Neno Amsoput.

⁴⁵Fun antui nani anbi Mafefa knino sin sulat nak: Uisneno of nanoina ale atoni sin. Ma ale atoni le natnin ma ansimo noina na'ko Amaf, of nem neu Kau.

⁴⁶Lasi nane ka nak fa, anmu'i atoni le nit nalali Amaf. Al In kun le nem na'ko Uisneno, In es nit Amaf nane.

⁴⁷Au ak ki, Atoni le anpalsai, napeni honis nabal-bal.

⁴⁸Au utunu' honis Kau.

⁴⁹Hi babfin afi sin anbukae mak muti anbi mnela paha snaen ma sin anmate.

⁵⁰I utunu' le ansanu na'ko neno tunan kun: Atoni le anbukae u tunu nane of kan matef.

⁵¹Au utunu' honis Kau le ansanu na'ko neno tunan. Atoni le anbukae utunu' i, of anmoni talan te nabal-bal. Ma utunu' le Au fe ki nane lo Au nesak, le Au fe ani neu pah pinan in monin.”

⁵²Atoni Yahudi sin anmatoen es nok es nak: “Leka me atoni i hen fe kai In nesan he haim bukae ka.”

⁵³Ma Yesus nak neu sin, “Au ak ki, kalu hi kam bukae fa Anmone In nesan ma ka minu fa In na' of hi ka mu'if honis bi hi aom.

⁵⁴Atoni le in bukae Au nesak ma ninu Au na' in anmu'i honis nabal-bal ma of Au ufena ufani bi Neno Amsoput.

⁵⁵Fun Au nesak nane mnahat namneo ma Au na' nane mninut namneo.

⁵⁶Atoni le in bukae Au nesak ma ninu Au na', in nabala anbi kau ma Au ubala a'bi in.

⁵⁷On Ama amonit le ansonu Kau ma Au moni utuin Ama, onane amsa atoni le anbukae Kau, of anmoni natuin Au.

⁵⁸Fun i utunu' le ansanu na'ko neno tunan, ka on fa utunu' le hi babfin sin anbukae ma anmate. Atoni le anbukae utunu' i of anmoni nabal-bal.”

⁵⁹Usif Yesus na'uab ale lasi i sin anbi Kapernaum leka In nanoina sin anbi Ume unen totis.

⁶⁰Leka sin nen nalali lasi nane te, Yesus In asimo lasi sin namfaun nak, “A'at i matean le'uf kun, sekau he natnin nani ka?”

⁶¹Yesus In nahin nak, In asimo lasi sin na'munu neu lasi nane, In nak neu sin, “Lasi i naktulib hi nek palsait ka?

⁶²Neu lasi onme ka, leka hi mit Anmone Pah To ansae neu bale le afi In anbine ka?

⁶³Smanaf Uisneno nane es anfe honis, nesaf nane ka ma'osa fa. Ale a'at le Au u'uab ulali neu ki nane Smanaf Uisneno ma honis.

⁶⁴Mes hi bian sin kan palsain fa.” Fun Yesus nahin nalali, sekau esle' kan palsai ma sekau es of nana'at In.

⁶⁵Oke te In nak, “Es nane Au ak ulali ki: Katit fa atoni mese he nem neu Kau, kalu Ama kan fene fa lasi nane neu in.”

⁶⁶Na'ko leku nane, In asimo lasi sin namfau naskotun sin aon ma ka natuin anteni fa In.

⁶⁷Oke te Usif Yesus nak neu In asimo lasi sin bo'es am nau, “Ai hi amsa amlomi hem nao ka?”

⁶⁸Nai Simon Petrus natae neu In nak, “Uisneno, hai hem nao meu sekau ka? Ho a'at nane neki honis nabal-bal.

⁶⁹Haim palsai milali ma mihin mak, Ho le'u Knino Ko mu'ko Uisneno.”

⁷⁰Yesus natae neu sin nak, “Ai Au es ka beti ki fa hi bo'es am nua ka?” Mes es anbi ki in anfani Nitu.”

⁷¹Yesus uab nane antom Nai Yudas le Nai Simon Iskariot in anmone. Fun in kun es of nana'at Yesus, le In asimo lasi mese na'ko sin bo'es am nua nane.