Read Uab Meto YOHANES 7 Bible Online

YOHANES 7 - Uab Meto bible

YOHANES 7

¹Nalali te Yesus In nao natef pah Galilea. In kan lomif he namaika anbi pah Yudea, fun atoni Yahudi sin nami lalan he namate In.

²Bi leku nane atoni Yahudi sin neno naek anhaumak le antek nak Neno Naek La' Hau No'.

³Oke te Yesus In oilfin nak neu In, “Hom fen nai mu'ko i ma Hom nao meu pah Yudea, he nati' Ho asimo lasi sin amsa sin nit Ho mepu le Ho mo'e mani.

⁴Fun katitaf atoni mese le anmo'e sa' bi bale kolo, kalu in lomi he mahine bi mat-mat. Kalu Ho he mo'e lasi onane, mulile nai Ho aom neu pah pinan.”

⁵Fun In oilfin amsa nekan ka nateb fa knino neu In.

⁶Yesus nak neu sin, “Au leku fe kan tiaf, mes neu hi, ale leku naloitnon kun.

⁷Pah pinan kan sunatin ki fa, mes ansunatin Kau, fun Au saksi pah pinan in moet amle'ut.

⁸Him nao nai meu tolas nane. Au fe ka naof fun Au leku fe kan tiaf.”

⁹In nak sin onane, ma In nabala fe anbi pah Galilea.

¹⁰Leka Yesus oilfenu a'naon neu tolas nane, In amsa anao natuin mes atoni mese amsa ka nahinef.

¹¹Atoni Yahudi sin nami In anbi tolas nane ma nak, “In es me ka?”

¹²Ma anmu'i seof namfau na'ko atoni amfaun neu In. Bian nak, “In atoni alekot.” Mes bian anten sin nak, “Kahaf, In nasekeb to.”

¹³Mes katit fa atoni mese le na'uab mat-mat neu In fun sin namtausan atoni Yahudi.

¹⁴Leka tolas nane fe nanaobon, Yesus antam neu Ume Uisneno oke te nanoina anbin.

¹⁵Es nane te atoni Yahudi sin namkakan ma nak, “Leka me atoni i anmu'i hinef onane, mes in ka naskolaf!”

¹⁶Usif Yesus natae sin nak, “Au noina nane ka na'ko fa Au, mes na'ko In le ansonu Kau.

¹⁷Atoni le anmo'e natuin Uisneno lomin, of in nahin nak noina nane na'ko Uisneno ai na'ko Kau.

¹⁸Atoni le na'uab neu in aon, in naim kanaf neu in aon kun. Mes atoni le naim kanaf neu In le ansonu nani, atoni nane amneot ma kan mu'if lasi poiba ai mo'e anbi in.

¹⁹Ai Nai Musa kan fe nalali ki fa plenat knino? Mes katit fa es anbi ki le anmo'e natuin plenat knino nane. Hi he mimate Kau neu sa' ka?”

²⁰Atoni amfaun nane sin natae nak, “Hom nitu sae ka, sekau es he namate Ko ka?”

²¹Yesus natae sin nak, “Al Au mo'e lasi mese ma hi ala ki mimkak.

²²Nai Musa anfe ki plenat neu lasi mahelit — le namneo helit nane ka na'ko fa Nai Musa, mes na'ko hit am uf sin — ma him heli atoni anbi Neno Snasat.

²³Kalu atoni mese ansimo helit anbi Neno Snasat he nati' kais nale'un plenat Nai Musa, nansa' hi mito'an Kau, fun Au uleko atoni mese in aon bi Neno Snasat.

²⁴Kais him lef lasi natuin sa' le hi mit, mes amlef lasi nok amneot.”

²⁵Oke te atoni Yerusalem sin fauk na'uab nak, “Ai ka In fa ka le sin nami he namate?

²⁶Kiso In na'uab nok alekot ma sin ka na'uab fa sa' neu In. Hai nakaf sin, oni nahinen nak In Kesel Afetin ka?

²⁷Mes hai mihin atoni i na'ko me, mes leka Kesel Afetin he nem katit fa atoni mese le nahin In na'ko me.”

²⁸Leka Yesus nanoina bi Ume Uisneno, In nak, “Namneo hi mihin Kau ma hi mihin Au u'ko me. Mes Au aum ka natuin fa Au lomik, mes In le ansonu Kau nane amneot, ma hi ka mihinef.

²⁹Au uhin In, fun Au aum u'ko In ma In es ansonu Kau.”

³⁰Sin nami hen heke In, mes katit fa atoni mese le antao niman neu In, fun In leku fe kan tiaf.

³¹Mes anbi atoni amfaun nane anmu'i atoni namfaun le nekan nateb knino neu In, ma sin nak, “Leka Kesel Afetin ankoenon nem, of In anmo'e lasi amkakat nesin na'ko le In anmo'e i ka?”

³²Atoni Farisi sin nen atoni amfaun le sin naseo neu Yesus. Es nane te atoni Farisi sin nok ana' lasi fuat nakaf sin anlelu apao Ume Uisneno sin nao hen heke Yesus.

³³Mes Yesus nak, “Au umaika ok ki al leku tuk es ma oke te of Au nao eu In le ansonu Kau.

³⁴Of hi maim Kau, mes of hi ka mie'ku fa mok Kau. Fun hi ka mibe'i fa he aim meu bale le Au bine.”

³⁵Atoni Yahudi sin na'uaben es neu es nak, “In he nao neu me ka, talan te hai of ka mie'ku fa mokan? Ai In he nao neu atoni Yahudi sin, le namaika anbi bale bian anbi atoni Yunani sin, he nanoina atoni Yunani sin ka?

³⁶In uab nane oten sa' ka le In nak: Of hi maim Kau, mes hi ka mie'ku mok Kau fa, ma: Hi ka mibe'i fa he aim meu bale le Au bine?”

³⁷Ma anbi Neno Amsoput na'ko tolas nane Yesus anhake ma na'uab nak, “Atoni le anmeno oe, leko in nem neu Kau ma in ninu nai!

³⁸Atoni le nekan nateb knino neu Kau, onle antui nani anbi Sulat Knino nak: Oe honis of ansai na'ko in nekan.”

³⁹Yesus namolok neu Smanan Knino, le atoni hen palsai neu In, of hen simo. Fun Smanan Knino fe ka nemaf, natuin fe ka nanaeb fa Yesus bi In neno maten.

⁴⁰Atoni bian na'ko amfaut nane le sin nen a'at nane sin nak, “Namneo, In Mafefa knino kun.”

⁴¹Bian sin nak, “In Neno Anan kun.” Mes bian anteni nak, “Kahaf, fun Neno Anan ka nem fa na'ko Galilea.

⁴²Fun Sulat Knino anetun nak: Neno Anan nane Nai Daud sufan ma na'ko kuan Betlehem, le afi Nai Daud namaika anbine.”

⁴³Oke te atoni amfaun nane sin nasulin natuin In.

⁴⁴Atoni bian anbi sin hen heke In, mes katit fa atoni mese le hen tao niman neu In.

⁴⁵Oke te apaot sin nem neu ana' lasi fuat nakaf sin ma atoni Farisi sin le nak neu sin, “Hi ka meki fa In neu sa' ka?”

⁴⁶Atoni apaot sin natae nak, “Katit fa atoni mese in uab on atoni nane!”

⁴⁷Atoni Farisi nane nak neu sin, “Ai hi amsa nasekeb ki ka?

⁴⁸Ai anmu'i es na'ko hiti nakaf sin ai na'ko atoni Farisi sin le nekan nateb knino neu In ka?

⁴⁹Mes atoni amfaun i le sin ka nahin fa plenat knino Nai Musa, sin ansuktok kuk!”

⁵⁰Mes Nai Nikodemus, atoni mese na'ko sin le afi nem neu Yesus nak neu sin,

⁵¹“Natuin plenat knino Nai Musa, ka nabe'i fa het hukum atoni mese, kalu fe kat nen ma ka tahinef sa' le In anmo'e?”

⁵²Sin natae nak, “Ho amsa atoni Galilea ko ka? Hom tae mit Sulat Knino ma of ho muhin mak katit fa Mafefa knino mese le he nem na'ko Galilea.”

⁵³Oke te sin anfani mes-mese neu sin ume.