Read Uab Meto YOHANES 8 Bible Online

YOHANES 8 - Uab Meto bible

YOHANES 8

²Ma nokfa onane fe nok-nok ana In nao anteni neu Ume Uisneno ma ale to sin nem neu In, In antok ma nanoina sin.

³Oke te Ahin Sulat sin ma atoni Farisi sin neki nem neu In bife mese le napeni nan anmo'e lasi mapaisa.

⁴Sin nahakeb bife nane bi sin atnanan ma nak neu Yesus, “Am, sin hek nan bife i le fe anmo'e lasi mapaisa.

⁵Nai Musa antui bi Plenat Knino nak het poil tis ale bife le anmo'e lasi mapaisa onane. Am, mutenab onme ka neu lasi nane?”

⁶Sin na'uab onane hen su' nit In, he nati' sin napeni sa' he nasanab In. Mes Yesus naluli ma antui nain neki Ini klulun.

⁷Leka sin natan piut neu In, oke te In fen anhake ma nak neu sin, “Atoni le kan mu'if sanat anbi ki, so in poil nahunun bife nane neki fatu.”

⁸Oke te In naluli anteni ma antui neu nain.

⁹Mes leka sin nen a'at nane te sin anpoi mes-mese mulai na'ko amnasit. Nalali te al Yesus anmes nok bife nane le anhake nabala anbi in balan.

¹⁰Oke te Yesus anhake ma nak neune, “Hoi bife, sin esme ka? Katit fa atoni mese le nasanab ko ka?”

¹¹In natae nak, “Kan mu'if, Uisneno.” Oke te Yesus nak, “Au Amsa ka lomif he usanab ko. Hom nao nai, ma na'ko tomas i kais ho mo'e amteni sanat.”

¹²Ma Yesus na'uab anteni neu atoni amfaun nane nak, “Au le i meusine pah pinan Kau. Atoni le natuin Kau, of in ka naoinson fa anbi mesokan, mes of in anmu'i meusine honis.”

¹³Atoni Farisi sin nak neu In, “Hom saksi kum Ho aom, Ho saksit nane ka namneof.”

¹⁴Yesus natae neu sin nak: “Mautu Au saksi kuk Au aok, ma Au saksi nane namneo; fun Au uhin Au aum u'ko me ma Au he nao eu me. Mes hi ka mihin fa Au aum u'ko me ma Au he nao eu me.

¹⁵Hi mifek lasi natuin lekat mansian, Au ka ufek fa atoni mese amsa.

¹⁶Mes leka Au ufek lasi amsa, Au fekat nane namneo, fun Au ka mese fa mes Au ok In le ansonu Kau.

¹⁷Ma antui nani anbi hi Plenat Knino nak, atoni nua sin saksi nane namneo.

¹⁸Au saksi kuk neu Au aok ma Amaf amsa, le ansonu Kau, ansaksi neu Kau.”

¹⁹Ma sin nak neu In, “Ho Ama es me ka?” Yesus natae nak, “Hi ka mihin Kau fa ma Au Ama amsa kahaf. Kalu hi mihin Kau, hi mihin Au Ama amsa.”

²⁰Yesus na'uab ale a'at i, leka In nanoina anbi Ume Uisneno anhaumak peti fua tulu. Mes katit fa atoni mese le hen hek In, fun In leku fe kan tiaf.

²¹Oke te Yesus na'uab anteni neu atoni amfaun nane nak, “Au of anao, ma of hi mami Kau mes of hi mate bi hi sanat. Bale le Au he nao eune, hi ka mibe'i fa he aim meun.”

²²Ma atoni Yahudi sin nak, “Ai In hen lol nison ka, es nane In nak: Bale le Au he nao eune, hi ka mibe'i fa he aim meune ka?”

²³Oke te In nak neu sin, “Hi mi'ko pinan i, Au u'ko fafon. Hi mi'ko pah pinan, Au ka u'ko fa pah pinan i.

²⁴Natuin lasi nane, lelo Au ak ki, fun kalu hi kam palsai, nak Au esle' In, of hi mate ambi hi sanat.”

²⁵Sin nak neu In, “Ho sekau Ko ka?” Yesus natae sin nak, “Au he u'uab sa' anteni neu ki ka?

²⁶Anmu'i lasi namfaun le Au he u'uab ma ufek neu ki; mes In, le ansonu Kau, lo amneot, ma sa' le Au nen na'ko In, Au u'uab ani neu pah pinan.”

²⁷Sin ka nahin fa, fun In na'uab neu sin antom Amaf nane.

²⁸Ma Yesus nak, “Leka hi misaeb Anmone Pah To, of hi mihin mak Au esle' In ma Au ka mo'ef sa' na'ko Au aok. Mes Au u'uab ale lasi onle Ama nanoina neu Kau.

²⁹Ma In le ansonu Kau, In anhaek nok Kau. In kan paleob Kau fa he mes fun Au mo'e piut ale sa' le In anlomi.”

³⁰Leka Yesus na'uab nalali ale lasi nane te, atoni namfaun anpalsai neu In.

³¹Ma In nak neu atoni Yahudi sin le anpalsai neu In nak, “Kalu hi mibala bi Au a'ak, him fani Au asimo lasi namneo.

³²Ma of hi mihin lasi amneot, ma lasi amneot nane of nafetin ki.”

³³Sin natae nak, “Nai Abraham sufan esle' hai, ma hai fe kam aetnom fa neu sekau. Leka me Ho mak: Of nafetin ki?”

³⁴Yesus nak neu sin: “Atoni le anmo'e sanat, nane sanat in ate.

³⁵Fun ate nane ka namaika fa piut anbi ume, mes anah nane namaika piut anbi ume.

³⁶Es nane leka Anmone nafetin ki, him fani atoni ao sona kun.”

³⁷“Au uhin, nak Nai Abraham sufan ki, mes hi mami he mimate Kau, fun Au a'ak ka napenif bale anbi hi nekam.

³⁸Sa' le Au it anbi Amaf, nane Au uton ani. Onane amsa hi mo'e sa' le him nen na'ko hi Ama.”

³⁹Sin natae neu In nak, “Hai Ama es Nai Abraham.” Yesus nak neu sin, “Bati Nai Abraham sufan ki, onane te of hi mo'e sa' le Nai Abraham anmo'e.

⁴⁰Mes le hi mo'e esle' mami he mimate Kau; Au, atoni le uton ki lasi amneot le Au nen na'ko Uisneno; mepu onane Nai Abraham kan mo'e nani fa.

⁴¹Hi mo'e sa' le hi ama anmo'e nani.” Sin natae nak, “Ka nahonis kai fa natuin lasi mapaisa. Hai Ama mese, es Uisneno.”

⁴²Usif Yesus nak neu sin: “Bati hi Ama es Uisneno, of him nek Kau, fun Au poi ma aum u'ko Uisneno. Ma Au ka aum fa natuin Au lomik, mes natuin In le anlelu Kau.

⁴³Hi ka mihin fa Au a'ak nane neu sa' ka? Natuin hi ka mibe'i fa hem nen Au a'ak.

⁴⁴Hi ama nane es Nitu ma him lomi he mituin hi ama in lomin. Na'ko un-unu Nitu nane namate atoni. In kan lomif lasi amneot, fun katitaf amneot anbi in. Leka in napoibon, nane in na'uab natuin in lomin kun. Fun in atoni apoiba, ma lasi moel in amaf es in.

⁴⁵Mes natuin Au etun ki lasi amneot, hi kam palsai fa neu Kau.

⁴⁶Sekau le anbi ki le nabe'i nalile nak Au mo'e sanat ka? Leka Au uton ki lasi amneot, nansa' hi kam palsai Kau fa?

⁴⁷Atoni le na'ko Uisneno, in nen a'an Uisneno. Mes hi ka mi'ko fa Uisneno, es nane te hi kam lomif hem nen In a'an.”

⁴⁸Atoni Yahudi sin natae Yesus nak, “Ai ka namneo fa ka le hai mak, Ho atoni Samaria ma amniut sae ka?”

⁴⁹Yesus natae nak, “Au ka nitu saef, mes Au unaeb Au Ama, ma hi ka minaeb Kau fa.

⁵⁰Au ka amif kanaf neu Au aok. Anmu'i Mese le In nami ma In amsa es nafek lasi.

⁵¹Au ak ki, atoni le natuin Au a'ak of in ka naben nitaf lasi maten tal nabal-bal.”

⁵²Atoni Yahudi sin nak neu In, “Hai mihinen, mak Hom nitu sae. Fun Nai Abraham anmaten, onane amsa Mafefa knino sin. Mes Ho mak: Atoni le natuin Au a'ak, of in ka naben nitaf lasi maten tal nabal-bal.

⁵³Ai hom nesin hit ama Nai Abraham ka le anmaet nalalien. Mafefa knino sin amsa anmaten. Ho munesa Ho aom mok sekau ka?”

⁵⁴Usif Yesus natae nak, “Bait Au unaeb Au kanak, lasi naeb nane ka maota fa. Au Ama es nanaeb Kau, le hi mak hai Uisneno es In.

⁵⁵Mes hi ka mihinef, so Au es uhine. Ma leka Au ak: Au ka uhin fa In, onane te Au atoni apoiba Kau onle hi amsa. Mes Au uhin In ma Au utuin In a'an.

⁵⁶Hi ama Nai Abraham namlil natuin in nit Au neno. In nit nalali ma in namlil kun.”

⁵⁷Ma atoni Yahudi sin nak neu In, “Ho uam fe kan tiaf ton bo'nim, leka me Ho mit Nai Abraham ka?”

⁵⁸Usif Yesus nak neu sin, “Au ak ki, nahunu na'ko nahonis Nai Abraham, Au aum ulalien.”

⁵⁹Oke te sin naitin fatu hen poli In, mes Yesus na'tolo ma anpoi nasaitan Ume Uisneno.