Read Uab Meto YOHANES 9 Bible Online

YOHANES 9 - Uab Meto bible

YOHANES 9

¹Leka Yesus anfini te, In nit atoni mese le matan anfolo na'ko neno le nahonis nani.

²In asimo lasi sin natan neu In nak, “Am, nansa' ka es nahonis atoni i nok mat folo? Atoni i es nasanab ka, ai in amaf ma in ainaf ka?”

³Yesus natae nak, “In ka nasanab fa, in amaf ma in ainaf amsa kahaf. Mes natuin Uisneno In mepu he nalilon anbi in.

⁴Leka fe manas hit mes atmepu ansonu le ansonu Kau In mepu. Fun leka anfai, katit fa atoni mese le hen mepu.

⁵Leka Au fe bi pah pinan te, Au meusine pah pinan Kau.”

⁶Leka Yesus na'uab nalali ale lasi nane te In nalon ai nakiun neu nain, ma anselo In hape nok nain. Oke te anlapes nani neu atoni afolot nane in matan,

⁷ma nak neune, “Hom nao nai ma amboe ho aom bi Nifu Siloam.” Siloam in oten nak, “Le ansonu.” Atoni nane in nao ma anboe in aon. Leka in anfain nem te in kius nit kun.

⁸In anhaumak sin ma ale atoni sin le afi nahin in on atotis, sin nak: “Ai ba'is i ka le atoni atatotis?”

⁹Bian sin nak, “Ba'is i namneo.” Mes bian sin nak, “Kahaf, mes human on in.” Mes atoni nane in nak kun, “Namneo, au esle' i.”

¹⁰Sin nak neune, “Ho matam nit anfani onme ka?”

¹¹In natae nak, “Atoni le antek In nak Yesus, In es anselo nain ma anlapen neu au matak ma nak neu kau, Hom nao nai ma amboe ho aom neu Nifu Siloam. Oke te au nao ma au boe au aok, nalali te au kiso it.”

¹²Oke te sin nak neune, “In esme ka?” Atoni nane natae nak, “Au ka uhinef.”

¹³Oke te sin neki atoni afolot nane neu atoni Farisi sin.

¹⁴Fun neno le Yesus anselo nain ma naleko atoni nane in matan, antom nok Neno Snasat.

¹⁵Es nane te atoni Farisi sin natan neune nak: Hom kiso mit kum onme ka? In natae nak: “In lapen klofo homa neu au matak, oke te au boe au aok, ma tomas i au kiso it.”

¹⁶Oke te atoni Farisi bian sin nak, “Atoni i ka nem fa na'ko Uisneno, fun In kan panat fa Neno Snasat.” Bian na'uab anteni nak, “Leka me atoni asanat nabe'i hen mo'e lasi amkakat onane ka?” Oke te lasi matoes anbolan sin.

¹⁷Nalali te sin nak anteni atoni afolot nane, “Ma ho mutenab sa' ka neu In, fun In naleko ho matam?” In natae nak, “In Mafefa knino kun.”

¹⁸Mes atoni Farisi sin kan palsaif, nak: Atoni nane afi matan anfol ma fe in kiso nit. Es nane te sin anboin in amaf ma in ainaf.

¹⁹Ma natan neu sin nak, “Anah i, namneo hi anah ka? Le hi mak neno hi mihonis in matan anfolo ka? Ma tomas i in kiso nit onme ka?”

²⁰Onane te in amaf ma in ainaf natae nak, “Hai mihin, mak hai anah, fun nahonis nok mat folo.

²¹Mes leku i in kiso nit onme, hai ka mihinef. Ma sekau es naleko in matan, hai ka mihin fa amsa. Hi mitan neu in, fun ini naeken, ma in na'uab kun neu in aon.”

²²In amaf ma in ainaf na'uab onane, fun sin namtausan atoni Yahudi sin. Fun sin nekaf mese, nak ale atoni le antebes Yesus on Neno Anan, of anli'u napoitan na'ko ume onen totis.

²³Es nane in amaf ma in ainaf nak, “In naeken, so hi mitan neu in.”

²⁴Oke te sin anboin anteni atoni le lelo anfolo ma nak neune, “Ho mu'uab lasi amneot nai bi Uisneno matan. Hai mihin atoni nane asanat kun.”

²⁵Atoni nane natae nak, “In asanat ai kahaf, au ka uhinef. Mes au uhin lasi mese, afi au matak anfolo, mes muni i au kiso it.”

²⁶Ma sin nak neune, “In mo'e sa' neu ko ka? In naleko' ho matam onme ka?”

²⁷In natae sin nak, “Au eut ulali ki, ma hi kam nenaf. Hi he mitnin amteni neu sa' ka? Ai hi amsa amlomi hem fani In asimo lasi ka?”

²⁸Sin na'akan atoni nane ma nak neune, “Ho es amfani In asimo lasi. Hai kahaf, fun Nai Musa in asimo lasi es hai.

²⁹Hai mihin, Uisneno nakua a'an neu Nai Musa, mes atoni i, hai ka mihinef In nem na'ko me.”

³⁰Atoni nane natae neu sin nak, “Amkakat mese neu hi ka mihin fa In nem na'ko me mes In naleko' au matak.

³¹Hit tahin Uisneno ka nenaf atoni asanat, mes atoni amneot le anmo'e In lomin.

³²Na'ko un-unu tal neno i, fe kat nenaf anmu'i atoni le naleko' matfolo na'ko fe nahonis nani.

³³Kalu atoni nane ka nem fa na'ko Uisneno, In ka nabe'i fa hen mo'e ale sa'.”

³⁴Sin natae nak, “Ho le i nahonis ko anbi sanat, ma ho he munoina kai ka?” Oke te sin li'u napoitan in na'ko Ume onen totis.

³⁵Yesus In nen nak sin li'u napoitan atoni nane na'ko Ume onen totis. Oke te In nao ma nae'ku nok atoni nane ma nak neune, “Ho nekam nateb knino neu Anmone pah to ka?”

³⁶Atoni nane natae nak, “Uisneno, In sekau ka? He nati' au nekak nateb knino neu In?”

³⁷Yesus nak neune, “Ho mit mulali In, fun In es namolok nok ko, In kun esle' nane.”

³⁸In natae nak, “Au palsai Uisneno!” Oke te in nabes neu In.

³⁹Usif Yesus nak, “Au aum eu pah pinan i he ufek lasi; he nati' atoni le sin ka nitaf, ankiso nit, ma atoni le ankiso nit sin anfani matfolo.”

⁴⁰Atoni Farisi fauk le anbi nane, leka sin nen Yesus na'uab onane te, sin natan neu In nak, “Hai amsa amfolo ka?”

⁴¹Yesus natae sin nak, “Bati hi matam anfolo, hi ka mu'if sanat. Mes natuin hi mak: Haim kiso mit, es nane te hi sanat nabalah.”