Read Uab Meto KISAH RASUL-RASUL 1 Bible Online

KISAH RASUL-RASUL 1 - Uab Meto bible

KISAH RASUL-RASUL 1

¹Neu Nai Teofilus atoni makana, anbi au sulat ahunut au tui ale lasi le Usif Yesus anmo'e ma nanoni nani,

²talan te In na'aition neu neno tunan. Nahunu na'ko nane natuin mepu Smanan Knino In anfe nalali uab neu haefin le In anbeti nain sin.

³Leka In anfen anfani, In nalile In aon neu In haefin neki taka namfau, nak namneo In moni. Fun bi neno bo' ha, haefin nit In tenim teni ma In na'uab nok sin antom Plenat Uisneno.

⁴Ma bi neno le In antoko ma anbukae nok sin, In ba'an sin he kais a nao nasaitan kot Yerusalem, mes hen pao Ama In manta'en, le — In na'uab onane — “him nen milali na'ko Kau.

⁵Fun Nai Yohanes naslani ki neki oe, mes al anbi neno fauk of naslani ki neki Smanan Knino.”

⁶Ma alsin le nem nabua bi nane natan nak, “Usi, Hom lomi he muhakeb mufani plenat neu to Israel bi batan i ka?”

⁷Yesus natae nak, “Hi ka mibe'i mihin leku ma tabu le Au Ama anlek nani bi In kuasat.

⁸Mes of him simo kuasat, leka Smanan Knino sanu nem neu ki, ma of him fani Au saksi bi Yerusalem ma Yudea ma Samaria talan te pah pinan tukan.”

⁹Ma In na'uab namsopu onane te, In na'aition bi sin matan ma nope ana'mu nan In na'ko sin matan.

¹⁰Leka sin anbaisenu neu neno tunan bi leku Yesus na'aition, naskek onane atoni nua le anpake muti nalim anhake haumak sin,

¹¹ma nak neu sin, “Hoi atoni Galilea, nansa' him hake ma ambaisenu neu neno tunan ka? Yesus le na'aition sae bi neno tunan nasaitan ki, of ankoenon anfani nem onle hi mit In ansae neu neno tunan.”

¹²Oket haefin anfani neu Yerusalem na'ko nuaf le antek nak Nuaf Zaitun, le na'lo na'ko Yerusalem oni kilo mese.

¹³Leka sin ante Yerusalem sin nao neu ume le sin namaika anbin ma ansae neu ke'an fafon. Haefin nane esle Nai Petrus ma Yohanes, Nai Yakobus ma Andreas, Filipus ma Tomas, Bartolomeus ma Matius, Yakobus, Nai Alfeus in anmone ma Simon atoni Zelot ma Yudas, Nai Yakobus in anmone.

¹⁴Sin alsin nabua nekaf mese nok onen totis piut, nok bife fauk ma nok bi Maria, Yesus In ainaf ma Yesus olif tataf sin.

¹⁵Bi neno le sin nabua bi nane oni sin amfaun atoni natun mese bo'nua, oket Nai Petrus anfen anbi bae benu sin atnanan ma na'uab nak,

¹⁶“Bae benu alki, sa' le antui nani bi Sulat Knino mese natiabon, fun Smanan Knino an etun neki Nai Daud in fefan antom Nai Yudas, le anfani atopus neu ale atoni le anheke Yesus.

¹⁷Nai Yudas nane atoni mese nok hit, in mabeti amsa hen mepu nabua nok kit.”

¹⁸— Ma Nai Yudas ansos nan nain pisa mese neki in mo'et amle'ut upan; oket in mof anbentom ma tein anpe talan te in taifenu natlolo poi oke.

¹⁹Lasi nane mahine neu ale to bi kuan Yerusalem, es nane sin tek nani neki sin a'at nak, “Hakal-Dama,” le in oten Najan Na'.

²⁰“Fun antui nani bi sulat Sit Pules: Maut nai in bale maika nane luman, ma katit fa es he natua anbin: ma: Maut nai es ansimo mepu na'ko in.

²¹Es nane mes anmu'i atoni mese le nok kit hen fani saksi nak Usif Yesus anfen anfani na'ko amates. Atoni nane, atoni le afi nok kit tabua tok Usif Yesus, na'ko neno Nai Yohanes naslani atoni talan te Yesus na'aition nau neno tunan nasaitan kit.”

²³Ma sin nahakeb atoni nua: Nai Yusuf le antek Barsabas fun nakhata in kanan Yustus ma Nai Matias.

²⁴Ma sin anonen toti nak, “Koi Uisneno, Ho es muhin ale nekaf, mulile kai na'ko atoni nua i, sekau le Hom beti mani,

²⁵hen simo mepu atuthaes le Nai Yudas nasaitan nani fun in nao neu bale le natai nokan.”

²⁶Ma oket anfe neu sin sulat ma Nai Matias es anhel nan sulat nane. Onane te in anfani haef he nati' nabua nok haef bo'es am mese nane.