Read Uab Meto KISAH RASUL-RASUL 10 Bible Online

KISAH RASUL-RASUL 10 - Uab Meto bible

KISAH RASUL-RASUL 10

¹Fun anbi Kaisarea anmu'i atoni mese kanan Nai Kornelius, solalus nakaf neu Solalus Italia.

²In namtaus Uisneno ma in ume nanan sin nabes neu Uisneno. Ma in anmo'e amnaut naek neu to Yahudi ma in anonen toti piut neu Uisneno.

³Anbi neno mabe mese oni leku tenu onane te in nit mnitas mese le ahake neno tunan mese antam neu in ume ma nak, “Kornelius!”

⁴In ankiso ahake nane nok amtaus ma nak, “Onme, Usif?” Ahake nane nak, “Ho onen totis ma ho mo'et amnaut, Uisneno ansimo ma Uisneno namnanu ko.

⁵Ma tomas i hom lelu atoni fauk nao neu kuan Yope he nunan atoni mese kanan Nai Simon le antek nak Nai Petrus.

⁶In namaika anbi Nai Simon apeu pasu in ume le anhaumak tasi.”

⁷Leka ahake neno tunan le na'uab nokan in nao, Nai Kornelis boin in ate sin nua nok solalus mese le namtaus Uisneno na'ko ale in Solalus le anpao in.

⁸Ma leka in na'uab neu sin ale lasi te, in anlelu sin nao neu kuan Yope.

⁹Ma nokfa onane te leka sin tenu sin fe anbi lanan ma anhaumak kuan Yope, oni leku bo'es am nua neno namtetu, Nai Petrus ansae neu ume penen hen onen toti.

¹⁰Oket in namnah ma anlomi hen bukae. Fun sin fe nabalab onane te in napeni mnitas mese.

¹¹In nit neno tunan natfei ma sa' fes onle pilu muti naek le nabonion neu pankin ha sin nasaunton nem neu najan.

¹²Ma anmu'i bi sa'af nane ale mu'it hae ha, kauna anonok ma kolo nok.

¹³Ma in nen hanfes nak, “Petrus hom fen nai, lolo nai ma bukae nai!”

¹⁴Mes Nai Petrus natae nak, “Kahaf, Usif, kahaf, fun au fe ka uah it fa sa' le le'u ma nuni kun.”

¹⁵Ma in nen hanaf anteni hae nua nak neune, “Sa' le Uisneno naknino, kais ho mak nuni.”

¹⁶Fun lasi nane anbol tal hae tenu, oke te sa' af nane na'aition anfani neu neno tunan.

¹⁷Ma Nai Petrus nekan na'unu fun natenab nak mnitas nane in oten he sa' ka? Onane te, atoni le Nai Kornelius anlelu sin he nami Nai Petrus in ume es me, ante ume nane enon.

¹⁸Ma sin anboin atoni mese ma natan, ai Nai Simon le antek nak Nai Petrus natua bi ume nane.

¹⁹Leka Nai Petrus fe natenab antom mnitas nane te, Smanan Knino nak neune, “Atoni nua nem nami ko.

²⁰Hom fen nai ma amsanu nai ma amnao mok sin, kais maim nekam, fun Au es alelu sin neman.”

²¹Oket Nai Petrus ansanu ma na'uab nok atoni nane nak, “Le hi mami, esle au; hi aim neu sa' ka?”

²²Ma sin natae nak, “Nai Kornelius, solalus nakaf, in atoni nek alekot ma amtaus Uisneno, ma atoni makana neu to Yahudi. Ahake neno tunan mese nalile lekat Uisneno neu in, anlelu kai hem hone ko meu in ume he in nen sa' le ho he mu'uab neun.”

²³Ma Nai Petrus natau sin hen tupan. Nokfa onane te in fen ma nao nok sin, fun bae knino sin fauk na'ko kuan Yope sin amsa nokan.

²⁴Ma sin nao neno es anten sin ante kuan Kaisarea. Bi kuan nane, Nai Kornelius in ini sin ma in bae benu bian le in anhone sin nabua hen pao Nai Petrus.

²⁵Leka Nai Petrus antam, Nai Kornelius ansimo in ma anli'tu nabes bi in haen.

²⁶Mes Nai Petrus anfiti in ma nak, “Hom fen nai, au amsa mansian onle ho.”

²⁷Ma fe na'uab nok Nai Kornelius, in antam ma nit atoni namfau le nabua anbi nane.

²⁸Ma in nak neu sin, “Hi mihin nak talas matani neu atoni Yahudi le he nabua ai hen tam neu atoni ufes in ume. Mes Uisneno nalile kau he kais au tek atoni le'u ai nuni.

²⁹Es nane te au ka mu'if mafena, leka hi mo'en kau he aum eu i. Ma tomas i au he uhin, hi mo'en kau neu lasi sa'.”

³⁰Ma Nai Kornelius nak, “Afi neno ha afinit oni neno onle i amsa, leku tenu neon mabe, au fe onen toti bi ume.

³¹Ma naskek onane te atoni mese anhake bi au matak, in pake muti nalim ma in nak: Kornelius, Uisneno nen nalali ho onen totis ma namnau ho mo'et amnaut.

³²Neu hom lelu atoni neu kuan Yope he nunan Nai Simon le antek nak Nai Petrus; in natua anbi Nai Simon, atoni apeu pasu in ume bi tasi ninen.

³³Es nane au lelu atoni neit neu ko, ma ho aumen mok nek amlilat. Neu tomas i hai mimtis es i bi Uisneno matan he mitnin ale sa' le Uisneno anlek nani neu ko.”

³⁴Nalali te Nai Petrus naiti uab ma nak, “Au uhin nok amneot Uisneno kan betif humaf.

³⁵Fun ale atoni na'ko uf-uf mes kun le namtaus Uisneno ma anmo'e amneot, in malomi neu Uisneno kun.

³⁶A'at nane In anlelu he natiaba neu to Israel. Ma a'at nane an etun halan nekaf natuin Yesus Neno Anan lo In Usif kun neu ale to ok-oke.

³⁷Fun hi mihin ale lasi le anbol bi pah Yudea, na'ko pah Galilea, neu lasi su' oel le Nai Yohanes an etun nani

³⁸antom Yesus atoni Nazaret: Le Uisneno anbeti In neki Smanan Knino ma matani; talan te In nao funam natef ale pah fun anmo'e alekot ma naleko ale atoni le kuasat Nitu naplenat sin, fun Uisneno anhake nokan.

³⁹Ma hai saksi kai, neu ale lasi le In anmo'e nani bi pah Yudea ma kot Yerusalem; ma sin namate In ma ankus naboni bi hau nehe.

⁴⁰Mes Uisneno nafena nafani bi neno tenu, ma Uisneno anlomi he nati' In nalile In aon,

⁴¹ka neu fa to ok-oke, mes neu saksi sin, le Uisneno anlek nani esle hai, le hai miah ma minu mokan bi neno In anfen anfani na'ko amates.

⁴²Ma In es anlelu kai he haim etun neu ale to ma amsaksi mak: In kun le Uisneno anlek nani hen fani Alef Lasi neu amonit ma amates sin.

⁴³Fun ale Mafefa knino sin saksi neu In ma nak; sekau nekan nateb knino neu In of ansimo sako sanat natuin In kanan.”

⁴⁴Leka Nai Petrus fe na'uab onane te, Smanan Knino ansanu nem neu ale atoni le sin nen a'at nane.

⁴⁵Ma ale atoni Yahudi le sin nekan nateb knino neu Yesus le sin nok Nai Petrus, sin namkakan fun sin nit, Smanan Knino ansanu neu to bian le ka nahin Uisneno.

⁴⁶Fun sin na'uab neki a'at huma-huma ma nanaeb Uisneno nok. Oke te Nai Petrus nak,

⁴⁷“Fun sin ansimo nalali Smanan Knino onle hit, es nane leko nesi hit taslani ale atoni nane sin.”

⁴⁸Oke te in anlelu naslani sin anbi Yesus Neno Anan In kanan. Ma sin antoti he Nai Petrus namaika nok sin neno fauk anbi nane.