Read Uab Meto KISAH RASUL-RASUL 12 Bible Online

KISAH RASUL-RASUL 12 - Uab Meto bible

KISAH RASUL-RASUL 12

¹Ma bi neno nane Kesel Nai Herodes in plenat anmatani neu tolas aknino sin.

²Ma in anlek he namate Nai Yakobus, le Nai Yohanes in olif neki suni.

³Leka Nai Herodes in nit nak to Yahudi namlil natuin in mo'et nane te in lek anteni hen heke Nai Petrus. Bi neno nane Neno Naek Utunu' Kan Pake fa Lalu haef.

⁴Leka anheke nalali Nai Petrus, oke te Nai Herodes anlelu he natam nani neu o'of. Fun nana'at nani neu solalus apaot sin pukan ha. Ma puknes solalus ha. In lomin he nati' neno Tolas Paskah anfini te in nahakeb in anbi atoni amfaut sin matan.

⁵Ma sin anpao Nai Petrus anbi o'of. Mes tolas aknino anonen piut neu Uisneno.

⁶Leka Nai Herodes he nahakeb Nai Petrus anbi to amfaut sin matan te, bi fai nane Nai Petrus antup nok niman makolen besi anbi solalus nua sin atnanan. Ma solalus bian sin anpao eno nane.

⁷Ma naskek onane te ahake neno tunan mese anhake haumak Nai Petrus ma meusine anpin bi ke'an nane. Ma ahake neno tunan anpo' nafen Nai Petrus ma nak, “Hom fen nai lab-lab!” Oke te kolen besi anmof na'ko Nai Petrus in niman.

⁸Ma ahake nane nak neune nak, “Ho mu'futu ho tnanam nai ma ampake ho penhae nasi.” Ma in anmo'e onane, oke te ahake neno tunan nak neune, “Hom pake ho tainusat ma mutuin kau nai!”

⁹Oke te in natuin ahake nane neu mone ma in ka nahinef nak sa' le ahake anmo'e nani he namneo ka, fun in natenab nak in nit mnitas mese.

¹⁰Ma leka sin anfini apao ahunut ma hae nua, nalali te sin ante eno besi naek le hen poi neu kot. Ma eno nane in natfei kun neu sin. Leka sin anpoi ante mone sin nao natuin lan tuk es, oke te ahake nane nao nasaitan Nai Petrus.

¹¹Ma leka Nai Petrus nekan nahin anfani te in nak, “Au fe uhin namneo nak Uisneno anlelu ahake neno tunan he nafetin kau na'ko Nai Herodes in niman ma na'ko ale sa' le to Yahudi sin nafnekan nani.”

¹²Ma leka Nai Petrus nekan anmiu, in nao neu bi Maria, Nai Yohanes le antek in kanan Nai Markus in ainaf ume. Bi ume nane to namfau nabua ma anonen toti.

¹³Ma leka in anleku eno te, ate bife mese kanan bi Rode in nem he nahin neu sekau es anleku eno nane.

¹⁴Ma leka in nen nahin Nai Petrus hanan in namlil. Natuin in namlil in ka nasoitan fa eno mes antam hen etun sin, nak Nai Petrus anhake es ume enon.

¹⁵Mes sin nak neune, “Ho mulae ka!” Mes in nak, “Namneo, in Nai Petrus kun.”

¹⁶Mes Nai Petrus in leku piut eno nane ma leka sin nasoitan eno ma sin nit Nai Petrus te sin namkak.

¹⁷Mes Nai Petrus anhosen sin neki niman, he namneb sin, ma in an etun sin neu Uisneno le antopu napoitan in na'ko o'of onme. Ma in nak, “Mitonan lasi i neu Nai Yakobus ma neu hit bae knino sin.” Oke te in anpoi ma nao neu bale bian.

¹⁸Ma nokfa onane te ale solalus apaot, sin nekan ankal ma natenab neu lasi sa' le anbol nok Nai Petrus.

¹⁹Oke te Nai Herodes anlelu he nami Nai Petrus, mes ka napeni fa in. Es nane te Nai Herodes anlelu he natan solalus apaot sin, oke te namate sin. Ma Nai Herodes nao na'ko Yudea neu Kaisarea ma namaika anbin.

²⁰Nai Herodes nato'an atoni Tirus ma Sidon. Es nane te sin nekaf mese ma nao neun. Ma sin anfuli Nai Blastus le anfani nakaf anbi Nai Herodes sonaf hen hake nok sin. Oke te sin antoti hen halan sin fun sin napeni mnahat na'ko Kesel Nai Herodes in pah.

²¹Ma bi neno le sin anlek nani te Nai Herodes anpake in pake kesel ma antoko bi mau toko in tunan ma nakua a'an neu sin.

²²Ma to ok-oke sin naba' ma nak, “I Uisneno in hanan ma ka atoni pah pinan in hanan!”

²³Ma bi leku nane amsa ahake neno tunan anpas Nai Herodes fun in ka namtaus fa Uisneno. Ma kaun sibe neku Nai Herodes ma anmate.

²⁴Ma Uisneno In a'an nasitbon piut ma atoni namfau nem he natnin.

²⁵Leka Nai Barnabas ma Nai Saulus nasopu sin mepu, sin anfani nem na'ko Yerusalem, ma nok Nai Yohanes le antek in kanan Nai Markus.